Read gitonga Mateyu 2 Bible Online

Mateyu 2 - gitonga bible

Mateyu 2

¹Kweni wachipapika Yesu mu Betelehemu waku Yuda mu mazuŵa ghaku Herode karonga yo, wonani, ŵaukwi ŵaku vuma ŵanguza ku Yerusalemu, ŵakuti,

²“We pani yo wakuwa Karonga wa ŵaYuda? Chifukwa ku vuma tinguwona nyenyezi yake, ndipo taziya kumlambiya.”

³Kweni Herode karonga yo wanguti wavwa ichi wangutenthema, ndi Yerusalemu yose pamoza nayo.

⁴Ndipo wati waungang'iska wose ŵazukuru ŵara ndi ŵalembi[1] ŵa khamu lo, wanguŵafumba po Kristu wangapapikiya.

⁵Ndipo iwo ŵangumnene, “Mu Betelehemu waku Yuda; chifukwa ndimo kwalembeke mu mchimi yo,

⁶‘Ndipo iwe Betelehemu, mu charu chaku Yuda, kuti ndiwe mumana limu kose cha mu ŵarongozgi ŵaku Yuda; chifukwa mwaku iwe mutuliyenge chirongozgi, mweniyo wakawusanga khamu langu Yisraele.’ ”

⁷Sono Herode wanguŵadana ŵaukwi kuubende, wanguŵakokoska nyengo yakuwoneke nyenyezi.

⁸Ndipo wanguŵatuma ku Betelehemu, wanguti, “Kaninga, mukapenje kwarwana vyapa mwana yo, asani mwamsaniya, nditauliyeni, viyo kuti nane so ndizichimlambiya.”

⁹Ndipo iwo, ŵati ŵavwa karonga yo, ŵanguruta; ndipo, wonani, nyenyezi yo ŵanguwona ku vuma, yinguŵadanjiriya, mpaka yinguzachima pachanya po wenga mwana yo.

¹⁰Ndipo ŵachiwona nyenyezi yo ŵangukondwere ndi likondwa likuru ukongwa.

¹¹Wangusere mu nyumba, ndipo ŵanguwona mwana ndi Mariya anyina; ndipo ŵakuwa pasi ŵangumlambiya. Ndipo ŵati ŵabanuwa mbiku zawo; ŵangupaska mipasku, golide, libane, ndi muro.

¹²Ndipo pakucheŵeskeka mu loto kuti ŵareke kuwere so kwaku Herode, ŵangukiya mu nthowa yinyake kuwere ku charu chawo.

¹³Ndipo ŵati ŵaruta iwo, wonani, mungelo wa Ambuya wangumwoneke Yosefe mu loto, wakuti, “Yuka, to mwana yo ndi anyina, thaŵiyani ku Egipiti, ndi mukaje kweniko mpaka pondikuneniyani; chifukwa Herode wapenjenge mwana yo kumubaya.”

¹⁴Ndipo wachiyuka iyo wanguto mwana ndi anyina ndi usiku ndi ŵanguruta ku Egipiti,

¹⁵ndipo ŵanguja kweniko mpaka nyifwa yaku Herode. Mwakuti lifiskike nenedu lakutuwa ku Ambuya mwamchimi yo, “ku Egipiti ndingumdana mwana wangu.”

¹⁶Herode, pakuwona kuti wapusikika ndi ŵaukwi, wangukaripa ukongwa, ndipo wangutuma ndi wangukoso ŵana ŵanthurumi wose mu Betelehemu ndi mu mphaka zake zose, ŵa virimika viŵi ndi pasi pake, kwakulingana ndi nyengo yo ŵanguziya ŵaukwi wo.

¹⁷Penipo lingufiskika nenedu lamwaku Yeremiya mchimi, yo watinge,

¹⁸“Liu mu Rama linguvwika, maliro ndi chitenje chikuru, Rakelo watenjere ŵana ŵake; ndipo kuti wakhumba kusangaruskika cha, pakuti palive iwo.”

¹⁹Kweni wati wafwa Herode, wonani mungelo wa Ambuya mu loto wangumwoneke Yosefe mu Egipiti, wakuti,

²⁰“Yuka, to mwana yo ndi nyina, kanga ku charu chaku Yisraele, chifukwa ŵafwa wo ŵapenjenga umoyo wa mwana yo.”

²¹Ndipo wachiyuka iyo wanguto mwana, ndi nyina, ŵanguwere mu charu chaku Yisraele.

²²Kweni pakuvwa kuti Arkelao wausanga mu Yuda mu malo ghaku Herode awiske, wangopa kuya kweniko; kweni pakuchenjezgeka mu loto, wangulazgiya ku mphaka za Galile.

²³Ndipo wanguza ndi wanguja mu muzi wakuzumbulika Nazarete: viyo kuti lifiskike nenedu la ŵamchimi, kuti, “Wazumbulikenge mu Nazarene.”