Read gitonga Mateyu 21 Bible Online

Mateyu 21 - gitonga bible

Mateyu 21

¹Ndipo penipo waŵandikiyanga ku Yerusalemu, wati wafika ku Betefage, ku phiri la Olivete, Yesu wangutuma ŵasambizi ŵaŵi,

²wakuŵanene, “Kaninga ku muzi wakuthyana namwe ndipo sosonukweni mwamsaniya mbunda yakumangika, ndi mwana-mbunda pamoza nayo: muzifwatuwe, muze nazo kwaku ine.

³Asani yumoza wangakamba namwe kanthu, mukatinge, ‘Ambuya atizikhumba,’ ndipo sosonukweni amkuziwezge so kuno.”

⁴Kweni chinguŵapo ichi, alinga kuti lifiskike nenedu la mchimi yo,

⁵“Ŵaneniyeni ŵanthu ŵaku Zioni, Awonani, Karonga winu watukuziyani, mpovu, ndi wakugara pa mbunda, ndi pa kambunda, mwana wa mbunda.”

⁶Ndipo ŵasambizi wo ŵanguruta, ŵanguchita uli ndimo Yesu wanguŵalanguliya,

⁷ŵanguza nazo, mbunda ndi mwana-mbunda, ŵanguyarapo paku zo minjirira yawo; ndipo wanguja pachanya paku zo.

⁸Ndipo urapasi wa mzinda ungutandika minjirira yawo mu nthowa; ŵanyake ŵatemanga vivwati vyamiti ŵatandikanga mu nthowa.

⁹Ndipo mizinda yakudanjiya ndi yakurondo yabongonga, yakuti, “Hosana,[9] Mwana waku Davidi! Ngwakutumbikika yo watuziya mu zina la Mbuya, Hosana mu mdengwendi!”

¹⁰Ndipo wati wasere iyo mu Yerusalemu, msumba wose unguyaghayika, wakuti, “Njani uyu?”

¹¹Ndipo yanenanga mizinda yo, “Uyu ndi mchimi Yesu, waku Nazarete waku Galilie.”

¹²Ndipo Yesu wanguza mu kasopi waku Chiuta, ndipo wangupong'a kubwaro wose ŵakusaska ndi ŵakugula mu kasopi yo ndipo wangugadabuwa magome gha ŵakusintha-ndrama, ndi vitengo vya ŵakusaska nkhunda.

¹³Ndipo wanguŵanene, “Kwalembeka, ‘Nyumba yangu yidanikenge nyumba ya kuromba’: kweni imwe mwayisanduska mphanji ya ŵakupoka.”

¹⁴Ndipo ŵanguza kwake mu kasopi ŵachiburumutiya ndi ŵakuganthiya; ndipo wanguŵachizga.

¹⁵Kweni ŵazukuru ŵara ndi ŵalembi; ŵachiwona vyanthazi vyo wangutata, ndi twana twaku bongo mu kasopi, “Hosana, Mwana waku Davidi!” Ŵangukalipa,

¹⁶ndipo ŵangumnene, “Kumbi utuvwa cho yaŵa ŵakamba?” Yesu wanguŵanene, “Inya, asi mwaŵerenga kali, kuti, Kutuwa ku mlomo wa ŵamjedu ndi ŵakonkha mwarongosole thokozu?”

¹⁷Ndipo wanguŵasiya wangutuwa ku msumba, wanguruta ku Betaniya, ndipo wangugona kweniko.

¹⁸Ndipo ndi mlenji, wachiwere ku msumba wo, wanguvwa nja.

¹⁹Ndipo pakuwona mkuyu umoza mu mphepete mu nthowa, wanguza kwaku wo, ndipo kuti wangusaniyamo kanthu cha, kweni mane pe, ndipo watiti kwaku wo, “Pako pangaŵa so chipasi cha muyaya!” Ndipo sosonukweni ungumira mkuyu wo.

²⁰Ndipo ŵachiwona ichi ŵasambizi wo ŵanguzizwa, ŵatinge, “Wamira uli ruŵi mkuyu wo?”

²¹Kweni wakwamuka Yesu wanguti, “Nadi ndikuneneskiyani, asani mungaŵa ndi chivwanu, ndi mungadonda cha, kuti muchitenge cho cha mkuyu wo pe cha, kweni chingana munganene phiri ili, ‘Uzulike ndi upong'eke mu nyanja,’ chikachitikanga.

²²Ndipo vyose vyo mungapempha mu kuromba ŵakuvwana murondenge.”

²³Ndipo wati waza mu kasopi, ŵanguza kwaku iyo, ŵazukuru ŵara ndi ŵaraŵa khamu lo, wachisambizga, wakuti, “Uchita vyenivi ndi mtufu nuwu? Ndipo yo wakukupaska mtufu wo njani?”

²⁴Kweni wakwamuka Yesu wanguŵanene, “Nane ndikufumbeninge mazu ghamoza, ghenigho asani mungandinene, nane ndineniyenge imwe nthazi mwaku yeniyo ndichitiya vyenivi.

²⁵Ubatizo waku Yohane ungutuliya nunkhu? Kutuwa kuchanya, pamwenga ku ŵanthu?” Kweni iwo ŵangususkana mwaku ŵija, ŵakuti, “Asani tititi, ‘Kutuwa kuchanya’; watineniyenge, kuti, ‘Na chifukwa chine mungureka kuvwana mwake?’

²⁶Kweni asani tititi, ‘Kutuwa ku ŵanthu’; titopa mzinda wo; chifukwa wose ŵe nayo Yohane nge ndi mchimi.”

²⁷Viyo ŵakumwamuka Yesu ŵanguti, “Kuti tiziŵa cha.” Nayo so wanguŵanene, “Chingana ndine kuti ndineniyenge imwe cha nthazi yo ndichitiya vyenivi.

²⁸“Kweni imwe murunguruka uli? Munthu wenga ndi ŵana ŵaŵi: ndipo wati waza ku wakudanga, wanguti, ‘Wamwana, kanga, katate nchitu le mu munda wa mphereska.’

²⁹Ndipo iyo wakwamuka wanguti, ‘Kuti ndikhumba cha’: kweni pavuli wangung'anamuka ndi wanguruta.

³⁰Ndipo wati waza ku wachiŵi, wangukamba kwakukozgana. Ndipo iyo, wakwamuka, wanguti, ‘Ndirutenge, ambuya’: kweni kuti wanguruta cha.

³¹Mwaku wo ŵaŵi njani wanguchita khumbu la awiske?” Watiti, “Wakudanga yo.” Yesu wanguŵanene, “Nadidi ndikuneniyani kuti ŵamsonkhu ndi ŵanthukazi ŵareŵi ŵakudanjiriyeninge mu ufumu waku Chiuta.

³²Chifukwa Yohane wanguziya imwe mu nthowa ya urunji, ndipo kuti munguvwana mwake cha; kweni ŵamsonkhu ndi ŵanthukazi ŵareŵi ŵanguvwana mwake: kweni imwe, chingana munguchiwona, kuti mungung'anamuka cha kuvwaniya mwaku iyo.

³³“Avwani ntharika yinyake. Kwenga munthu, mweni-nyumba yo wangupanda munda wa mphereska, wanguwusitiya lisitu, wangukumba chakukandiyamo mphereska, ndi wanguzenga chigongwe ndipo wanguwupazgiya ŵalimi, ndipo wangamtembeya ku charu chinyake.

³⁴Kweni penipo yingufika nyengo ya vipasi, wangutumizga ŵaŵanda ŵake ku ŵalimi wo, kwachironda vipasi;

³⁵ŵalimi wo ŵanguko ŵaŵandaŵake, ŵangumpuma yumoza, munyake ŵangupong'a mya.

³⁶Wangutumizga ŵaŵanda ŵanyake kwakuruska ŵakudanga wo: yaŵa nawo ŵanguŵachitiya kwakulingana.

³⁷Kweni pavuli wangutumizga kwaku wo mwana wake, wakuti, ‘Ŵamuphwerenge mwana wangu.’

³⁸Kweni ŵalimi wo, ŵachiwona mwana yo, ŵangukambirana mwaku ŵija, ‘Mwenuyu ngwakuhara; tiyeni tibaye, ndipo tito chihara chake.’

³⁹Ndipo ŵangumko, ŵangumpong'a kubwaro ku munda wa mphereska, ndipo ŵangumbaya.

⁴⁰Viyo penipo wazenge mwenimunda wamphereska yo, waŵachitiyenge chine ŵalimi munda ŵa?”

⁴¹Ŵamnene, “Waŵanangenge uheni ŵaheni ŵa, ndipo munda wa mphereska wapazgiyenge ku ŵalimi ŵanyake, ŵeniwo ŵamuwezgiyenge vipasi vyo mu nyengo zawo.”

⁴²Yesu watiti kwaku wo, “Kumbi kali kose mundaŵerenge mu malembo: ‘Mwa wo ŵakuzenga nyumba ŵanguwukana, weniwo waŵa mutu wa nyondu: ichi ndi nchitu ya Ambuya. Ndipo nchakuziziswa mu maso ghidu?’

⁴³“Chifukwa chenichi ndikuneniyani, ukwamphulikenge kwaku imwe ufumu waku Chiuta, ndipo upaskikenge ku mtundu wakupasa vipasi vyake. [

⁴⁴Ndipo yo wangawapo pa mwa wenuwu watikinyikenge: kweni pakumweniyo umuwiyenge, umuthibuskenge.”]

⁴⁵Ndipo ŵazukuru ŵara ndi ŵaFarisi, ŵati ŵavwa ntharika zake, ŵanguteska kuti wanenanga iwo.

⁴⁶Ndipo pakupenja kuti ŵamuko, ŵangopa mizinda yo, pakuti yenga nayo nge ndi mchimi.