Read gitonga Mateyu 25 Bible Online

Mateyu 25 - gitonga bible

Mateyu 25

¹“Penipo ufumu wa kuchanya ulinganizgikenge ku mbeta chumi, zenizo zinguti zato nyali zawo, zingutuwa kwachikumana ndi mweni-nthengwa.

²Zinkhonde mwaku zo zenga zizereza, ndi zinkhonde zenga zazeru.

³Chifukwa zizereza, zichito nyali zawo, zengavi kutole pamoza nazo mafuta.

⁴Kweni zazeru zingutole mafuta mu viyaŵi vyawo pamoza ndi nyali zawo.

⁵Kweni wachiswera mweni-nthengwa yo, zose zingusiwa ndi zingura.

⁶Ndipo ndi usiku pakati kunguŵapo kudana, ‘Ehe, mweni-nthengwa yo! Tuwani kwachikumana nayo!’

⁷Sono zinguyuka mbeta zo zose, ndi zingunozga nyali zawo.

⁸Ndipo zizereza zingunene zazeru, ‘Tipaskeniko mafuta ghinu, pakuti nyali zidu zizimwa.’

⁹Kweni zazeru zo zingwamuka, zinguti, ‘Kokuli kuti ghangakwana ndi ifwe ndi imwe cha: ukongwa kaninga ku ŵakusaska, mujiguliye ghinu.’

¹⁰Ndipo zichiruta kwachigula, wanguza mweni-nthengwa yo; ndipo zakurongosoleka zingusere pamoza nayo ku zowara, ndipo chingujarika chisasa.

¹¹Kweni pavuli pake zinguza so mbeta zinyake zo, zakuti, ‘Ambuya, Ambuya, tijuriyeniko!’

¹²Kweni wakwamuka wanguti, ‘Ndikuneniyani, kuti ndikuziŵani cha.’

¹³Viyo khazgani, pakuti mulive kuliziŵa zuŵa chingana ndi ora.

¹⁴“Chifukwa kwe nge ndimo munthu, wachiruta kunyake, wangudana ŵaŵanda ŵake, ndipo wanguŵapazgiya usambasi wake.

¹⁵Ku yumoza wangupaska matalente ghakhonde, ku munyake ghaŵi, ndi ku munyake limoza; kwaku yose kwakulingana ndi nthazi yakuyija. Ndipo wangutuwako.

¹⁶Sono yo wanguronde matalente ghankhonde wanguruta ndi wangutataliya nagho, ndipo wangwanduwa matalente ghanyake so ghankhonde.

¹⁷Kwakulingana nako yo wa ghaŵi wangwanduwa ghanyake ghaŵi.

¹⁸Kweni mweniyo wanguronde limoza, wangukumbiya pasi, ndipo wangubisa ndrama ya mbuyake.

¹⁹Ndipo pavuli pa nyengo yitali wanguza mweneko wa ŵaŵanda yaŵa, ndipo wangukokoskana nawo makani.

²⁰Ndipo yo wanguronde matalente ghankhonde wanguza, wangupinga matalente, ghanyake ghankhonde wakuti, ‘Ambuya, mungundipazgiya matalente ghankhonde; wonani, ndikwanduliyako matalente ghanyake ghankhonde!’

²¹Mbuyake wangumnene. ‘Nchamampha muŵanda we wamampha ndi wamagomekezgeka; waŵa wamagomekezgeka pa vinthu vimanavi; pa vinandi ndikuŵikenge: sere muchimwemwe cha mbuyako.’

²²Ndipo yo nayo wa matalente ghaŵi wanguza, ndipo wangunena, ‘Ambuya, mungundipazgiya matalente ghaŵi: awonani, ndikwanduliyako matalente ghanyake ghaŵi.’

²³Wanguti kwaku iyo mbuyake, ‘Nchamampha, muŵanda wamampha ndi wamagomekezgeka we, pa vinthu vimanavi waŵa wamagomekezgeka ndikuŵikenge pa vinandi; sere mu chimwemwe cha mbuyako.’

²⁴Ndipo yo nayo wanguronde talente limoza, wachiza, wanguti, ‘Mbuya, ndingukuziŵa kuti we munthu mnononu, wakuvuna po wengavi kumija, ndi wakuyora po wengavi kuparghang'a,

²⁵ndipo pakopa ndingwachibisa pasi talente lako, Awona, we nalo lako.’

²⁶Kweni Mbuyake wakwamuka wangumnene, ‘Muŵanda mheni ndi mlesi, unguziŵa kuti ndivuna po ndengavi kumija, ndiyora po ndengavi kuparghang'a?

²⁷Viyo ungwenere kuŵika ndrama yangu ku ŵasintha-ndrama, ndipo ine, ndati ndaza, mphanyi ndaronde lo langu ndi chanduwu.

²⁸Viyo mkwamphuweni talente lo, ndipo paskani kwaku yo we nagho matalente chumi.

²⁹Chifukwa kwaku yose wakuŵa navyo kupaskikenge, ndipo waŵenge ndi uzari: kweni kwaku yo walive, chingana ndi lo we nalo lituzgikengeko kwake.

³⁰Ndipo muŵanda yo mzira-upiripiri mtayeni ku mdima wakubwaro: ko kuŵenge kuliya ndi mkukutu wa minyu.’

³¹“Kweni penipo wakazanga Mwana wa munthu mu unkhankhu wake, ndi ŵangelo wose pamoza nayo, penipo wajariyenge pasi pa chitengo cha ukhankhu wake.

³²Ndipo yikawunjikikanga paurongo pake mitundu yose; ndipo wakaŵagawuwanga yumoza ku munyake, uli ndimo mliska wagawuliya mberere ku mbuzi;

³³ndipo wakajarikanga mberere zo ku janja lake la marghe, kweni mbuzi zoku maze.

³⁴Sono karonga yo wakaneniyanga ŵaku marghe, ‘Zaninge, mwaŵakutumbika ŵa Ada, harani ufumu wakurongosoleke imwe kutuwa ku mtendeku wa charu:

³⁵chifukwa ndingufwa msara, ndipo mungundipaska kurgha: ndenga wa nyota, ndipo mungundimweska: ndenga mlendo ndipo mungundironde:

³⁶wankhuli, ndipo mungundivwarika: ndingutama, ndipo munguchezga nane: ndenga mu ulinda, ndipo munguza kwaku ine.’

³⁷Sono ŵarunji wo ŵamukumwamuka ŵakuti, ‘Ambuya, tingukuwonani zuŵanjiwanja, ndipo tingukuhiŵani? Pamwenga wanyota, ndipo tingukumweskani?

³⁸Ndipo zuŵanji tingumuwonani mlendo, ndipo tingumrondeni? Pamwenga wankhuli, ndipo tingumuvwarikani?

³⁹Ndipo tingukuwonani zuŵanji wakutama, pamwenga mu ulinda ndipo tinguza kwinu?’

⁴⁰Ndipo karonga yo wakwamuka wanenenge kwaku wo, ‘Ndikuneneskiyani, mwenimo munguchitiya yumoza waku wo ŵabali ŵangu, ŵamanako wo, munguchitiya ine.’

⁴¹Pavuli waneniyenge ŵaku maze, ‘Tuwaniko kwangu, mwaŵakutembeke, ku motu wamuyaya, wakurongosoleke diabolo yo ndi ŵangelo ŵake;

⁴²chifukwa ndingufwa msara, ndipo kuti mungundipaska kurgha cha: ndinguŵa ndi nyota, ndipo kuti mungundimweska cha,

⁴³ndenga mlendo, ndipo kuti mungundironde cha; wankhuli, ndipo kuti munguvwarika cha: wakutama, ndi mu ulinda, ndipo kuti munguchezga nane cha.’

⁴⁴Sono iwo nawo ŵamukenge, kuti, ‘Ambuya, tingukuwonani zuŵanji wanja, pamwenga wanyota, pamwenga mlendo, pamwenga wankhuli, pamwenga wakutama, pamwenga mu ulinda, ndipo tengavi kukuteŵetiyani?’

⁴⁵Sono waŵamukenge, wakuti, ‘Ndikuneneskiyani, mwakuti mwengavi kuchitiya yumoza waku wo ŵamanako kwakuruska, kuti munguchitiya ine cha.’

⁴⁶Ndipo yaŵa ŵarutenge ku chilanga chamuyaya: kweni ŵarunjiwo ku umoyo wamuyaya.”