Read gitonga Mateyu 27 Bible Online

Mateyu 27 - gitonga bible

Mateyu 27

¹Ndipo kwati kwacha wose ŵazukuru ŵara ndi ŵara ŵa khamu lo ŵangupanga upu paku Yesu, kwachimbaya;

²ndipo ŵati ŵamumanga, ŵanguruta nayo, ŵangumpereka kwaku Pilato, nduna yo.

³Sono Yuda, yo wangumpachiya, wachiwona kuti wasuskika, wangujipezga, ndi wanguwezge ŵazukuru ŵara ndi ŵara vyasiliva vyo machumi ghatatu,

⁴wakuti, “Ndalakwa, ndawakupachiya ndopa zizirakalema.” Kweni iwo ŵatinge, “Nchine, kwaku ifwe? Kweniko wamweni.”

⁵Ndipo wati wapong'a pasi vyasiliva vyo mu kasopi, wanguruta; ndipo wakutuwako wangujigwinjiriya.

⁶Ndipo ŵazukuru ŵara ŵanguto vyasiliva vyo, ŵakuti, “Kuti kuyamu cha kuvipong'a mu chambiku, pakuti ndi ndrama za ndopa.”

⁷Ndipo ŵangupanga upu, ndi ŵangugula navyo munda wa muwumbi kwachiŵikamo ŵalendo.

⁸Chifukwa chenicho munda unguzumbulika, Munda wa ndopa, mpaka kuno ku le.

⁹Penipo lingufiskika nenedu lo lamwaku Yeremiya mchimi yo, lakuti, “Ndipo ŵanguto vyasiliva machumi ghatatu gho, mtengu waku mweniyo paku mweniyo mtengu ungutemeke ndi ŵanyake ŵamu ŵana ŵaku Yisraele,

¹⁰ndipo ŵanguvipaska pa munda wa muwumbi wo, nge ndimo Mbuya wangundilanguliya.”

¹¹Ndipo Yesu wanguma paurongo pa nduna yo: ndipo nduna yingumfumba, yakuti, “Kumbi ndiwe karonga wa ŵaYuda?” Yesu wanguti kwaku iyo, “Iwe unena.”

¹²Ndipo wachisumulika ndi ŵazukuru ŵara ndi ŵara, kuti wangwamuka kanthu cha.

¹³Sono Pilato wangunena nayo, “Asi utuvwa vyose vyo ŵatukusimikizga?”

¹⁴Ndipo kuti wangwamuka cha, chingana nkhu mazu ghamoza, viyo kuti nduna yo yinguzizwa ukongwa.

¹⁵Kweni pa dghera yinguziŵiriya nduna kufwatuliya mzinda wamkoli yumoza, mweniyo ŵangakhumba.

¹⁶Ndipo pa nyengo iyi ŵenga nayo wamkoli wathenthe, wakuzumbulika Baraba.

¹⁷Viyo ŵati ŵaunjikana iwo, wanguŵafumba Pilato, “Mukhumba ndikufwatuliyeni yani? Baraba, pamwenga Yesu yo wazumbulika Kristu?”

¹⁸Chifukwa wanguziŵa kuti nchifukwa cha chiŵinu ndichu ŵangumpereke.

¹⁹Kweni wachija iyo pa chakweruzgiyapo, muwoli wake wangumutumiya mazu, wakuti, “Uŵevi kanthu ndi murunji mweniyo; chifukwa le mu lotu ndakomwiyapo vinandi pa chifwa chake.”

²⁰Kweni ŵazukuru ŵara ndi ŵara ŵangukakamizga mizinda yo kuti ŵapemphe Baraba ndiyo, ndi ŵamunange Yesu.

²¹Ndipo nduna yo yinguŵafumba, “Mukhumba ndikufwatuliyeni nunju waku wo ŵaŵi?” Ndipo wanguti, “Baraba.”

²²Pilato waŵenene, “Na, ndichitengenji ndi Yesu wakuzumbulika Kristu?” Watiti wose, “Wapayikike!”

²³Ndipo wanguti iyo, “Chifukwa chine? Wachita chiheni nichi?” Kweni iwo ŵangukambura ukongwa, kuti, “Wapayikike!”

²⁴Ndipo Pilato, pakuwona kuti wengavi kovya kanthu, kweni ukongwa kuti chichitika chiwawa, wanguto maji, wangusamba mu manja paurongo pa mzinda wo, wakuti, “Nde wambura kalema ku ndopa za murunji uyu: kweniko mwaŵeni!”

²⁵Ndipo khamu lo lose lakwamuka, linguti, “Ndopa zake ziŵe paku ifwe ndi pa ŵana ŵidu!”

²⁶Sono wanguŵafwatuliya Baraba: kweni Yesu, wati wamukwechuwa, wangumukombo kuti wapayikike.

²⁷Ndipo ŵankhondo ŵa nduna, ŵati ŵamtole Yesu ku mphara ŵanguwunganiska liŵanja lose.

²⁸Ndipo ŵati ŵamuzuwa, ŵangumuvwarika raya lichesamu.

²⁹Ndipo ŵati ŵapika ndumbu ya minga ŵanguyiŵika pa mutu wake ndi dete mu janja lake lamarghe: ndipo pakumulambiya paurongo ŵangumtoza ŵakuti, “Mauleni, karonga wa ŵaYuda!”

³⁰Ndipo ŵangumfunyiya mata, ndipo ŵangulito dete, ŵangumkoso ku mutu.

³¹Ndipo ŵati ŵamtoza ŵangumzuwa raya lo, ndi ŵangumvwarika minjirira yake, ndipo ŵangumgumizga kwachipayikika.

³²Ndipo ŵachituwa ŵangusaniya munthu mKurene, zina Simone: ŵangumkakamizga mweniyo kuti wanyamuwe mphinjika.

³³Ndipo ŵati ŵaza ku malo ghakuzumbulika Golgota (cho ching'anamuwa malo gha bwaza),

³⁴ŵangumpaska kumwa mphereska zakusazgamo nduru: ndipo wati walaŵa kuti wangukhumba kumwapo cha.

³⁵Ndipo ŵati ŵampayika ŵangugaŵana minjirira yake, pakupong'a mphenduzga:

³⁶ndipo pakuteka pasi ŵamlindizganga penipa.

³⁷Ndipo ŵanguŵikapo pachanya pa mutu wake kafukwa kake kakulembeka, MWENUYU NDI YESU, KARONGA WA ŴAYUDA.

³⁸Penipo ŵangupayikika pamoza nayo ŵakupoka ŵaŵi, yumoza ku marghe ndi yumoza ku maze.

³⁹Ndipo ŵarutanjiya ŵamtukanga, ŵakupukung'a mitu yawo,

⁴⁰ŵakuti, “Wakubwanganduwa kasopi we, ndi wakumuzenga mu mazuŵa ghatatu, jitaske: asani we Mwana waku Chiuta, sika ku mphinjika yo.”

⁴¹Kwakulingana nako ŵazukuru ŵara ŵangumuyeya, pamoza ndi ŵalembi ndi ŵara, ŵatinge,

⁴²“Wangutaska ŵanyake; walive nthazi kujitaska yija. Ndiyo karonga waku Yisraele! Wasike sono ku mphinjika yo, ndipo tivwanenge mwake.

⁴³Wangugomekezga mwaku Chiuta, wamtaske sono, asani watumukhumba: chifukwa wanguti, ‘Ndine Mwana waku Chiuta.’ ”

⁴⁴Ŵakupoka nawo ŵakupayikika pamoza nayo ŵamtozanga ghenigho pe.

⁴⁵Kweni kutuwa ku ora lachinkhonde ndi chimoza kunguŵapo mdima pa charu chose mpaka ku ora lachinkhonde ndi chinayi.

⁴⁶Ndipo akhumba pa ora lachinkhonde ndi chinayi wangubongo Yesu ndi mazu ghakuru, wakuti, “Eli, Eli, lama sabakatani?” Lo lititi, “Chiuta wangu, Chiuta wangu, chifukwa chine mwandisiya?”

⁴⁷Ndipo ŵanyake ŵaku wo ŵangumapo, ŵachivwa, ŵatinge, “Mwenuyu wadana Eliya.”

⁴⁸Ndipo sosonukweni yumoza waku wo wanguchimbiya, wanguto buwura wangumuzaza ndi vinyo wakusasa, ndipo wangumuŵika ku dete, ndi wamumweskanga.

⁴⁹Kweni ŵakujapo ŵanguti, “Reka; tiwone vinu Eliya wazenge kwazimtaska.”

⁵⁰Kweni Yesu wati wakambura so ndi mazu ghakuru, wangukombo mzimu wake.

⁵¹Ndipo onani, chijaru cha kasopi chinguparuka pakati, kutuwa pachanya pasi mbwitu. Ndipo charu chingundengandenga; ndi majarawi ghangusweka,

⁵²miunda yingubanuka; ndipo mathupi ghanandi gha wakupaturika wo ŵangura, ghanguyuskika,

⁵³ndipo wakutuwa mu masano pavuli pa chiyuka chake ŵangusere mu msumba wakupaturika, ndipo ŵanguwoneke ŵanandi.

⁵⁴Kweni kenturione yo, ndi wo ŵapamoza nayo ŵakulindizga Yesu, wachiwona chiyeuyeu ndi vyo vinguŵapo ŵangopa ukongwa, ndipo ŵanguti, “Nadidi mwenuyu ndi Mwana waku Chiuta.”

⁵⁵Ndipo kwengako kweniko ŵanthukazi ŵanandi, ŵakulereske patari, ŵeniwo ŵangurondo Yesu kutuwa ku Galile, ŵakumteŵete;

⁵⁶mwaku wo mwenga Mariya Magdala, Mariya, anyinawo ŵaku Yakobe ndi Yose, ndi anyinawo ŵa ŵana ŵaku Zebediya.

⁵⁷Kweni kwati kwaŵa mazuro wanguza munthu msambasi waku Arimataya, zina lake Yosefe, mweniyo nayo wenga mzambizi waku Yesu.

⁵⁸Wanguza kwaku Pilato, ndipo wangupempha thupi laku Yesu. Sono Pilato wangulangula kuti liperekeke.

⁵⁹Ndipo Yosefe wanguto thupi lo, wangulifunga mu bafuta wakutowa,

⁶⁰ndi wanguliŵika mu muunda wake ufya, wo wanguchonga mu jarawi: ndipo wati wagadabuliyako mwa ukuru ku khomu la muunda, wanguruta.

⁶¹Ndipo kwenikuwa, kwenga Mariya Magdala ndi Mariya munyake yo, ŵakuja pasi pakuthyana ndi muunda wo.

⁶²Ndipo ndi mlenji, weniwo wenga zuŵa la pavuli pa Chirongosole, ŵazukuru ŵara ndi ŵaFarisi ŵanguwunjikana kwaku Pilato,

⁶³ŵakuti, “Abwana, takumbuka kuti mrandizgi yo weche wamoyo wanguti, ‘Pavuli pa mazuŵa ghatatu ndiyukenge.’

⁶⁴Viyo langulani kuti muunda wo ukhozgeke mpaka zuŵa lachitatu, vinu kokuli ŵasambizi ŵake ŵangaza ndi kumuba, ndi ŵangakambiya khamu lo, kuti, ‘Wayuka ku ŵakufwa’: ndipo urandizgi wakumariya wo ukaŵanga uheniku ku wakudanga wo.”

⁶⁵Pilato wanguŵanene, “Mwe nawo ŵaronda ŵankhondo; kaninga muwokhozge mo muziŵiya.”

⁶⁶Ndipo ŵanguruta, ŵangukhozga muunda ŵakuuzighiriya mwa, ndipo ŵanguŵikako ŵaronda.