Read gitonga Mateyu 4 Bible Online

Mateyu 4 - gitonga bible

Mateyu 4

¹Sono Yesu wangukwezgeke ku bozwa ndi Mzimu, kwacheseka ndi diabolo.

²Ndipo wati wafunga mazuŵa machumi ghanayi ndi mausiku machumi ghanayi, pavuli wanguvwa nja.

³Ndipo wakwesa yo wanguza wangunena nayo, “Asani we Mwana waku Chiuta, nene mya iyi kuti yiŵe viŵande.”

⁴Kweni iyo wakwamuka wanguti, “Kwalembeka, ‘Munthu kuti wakajanga ndi umoyo ndi chiŵande pe cha, kweni ndi nenedu lose likutuwa mu mlomo waku Chiuta.’ ”

⁵Sono diabolo yo wangumtole ku msumba wakupaturika; ndipo wangumumika pachisongu cha kasopi,[2]

⁶ndipo wangunena nayo, “Asani we Mwana waku Chiuta, ujipong'e pasi: chifukwa kwalembeka, ‘Waŵalanguliyenge ŵangelo ŵake vyapaku iwe,’ ndipo ‘Pa manja ghawo ŵakunyamu wenge, vinu kokuli ungagunyuwa pa mwa phazi lako.’ ”

⁷Yesu wanguti kwaku iyo, “Panyake so kwalembeka, ‘Ungesanga cha Ambuya Chiuta wako.’ ”

⁸Pavuli diabolo yo wangumtole ku phiri litali ukongwa, ndipo wangumrongo maufumu ghose gha pasi, ndi unkhankhu wawo,

⁹ndipo wangunena nayo, “Vyose ivi ndikupaskenge, asani uwenge pasi ndi kundilambiya.”

¹⁰Sono Yesu watiti kwaku iyo, “Tuwapo, Satana: chifukwa kwalembeka, ‘Mbuya Chiuta wako umlambiyenge, ndipo iyo pe umtataliyenge.’ ”

¹¹Sono diabolo yo wangumreka; ndipo, onani, ŵangelo ŵanguza ndi ŵamteŵetiyanga.

¹²Kweni Yesu wanguti wavwa kuti Yohane wamangika, wanguruta ku Galile:

¹³ndipo pakusiya Nazarete, wanguza ndi kuja mu Kapernaumu wapa nyanja, mu mphaka zaku Zebuluni ndi Naftali;

¹⁴alinga kuti lifiskike nenedu laku Yesaya mchimi yo, wakuti,

¹⁵“Charu chaku Zebuluni ndi charu chaku Naftali, nthowa ya nyanja, sirgha liya la Yordane, Galile wa ŵamitundu yo.

¹⁶Khamu lakuja mu mdima lawona kungweruka kukuru, ndi kuŵakuja mu charu ndi mduzi wa nyifwa, ukweru waŵaŵaliya.”

¹⁷Kutuwa pa nyengo yeniyiya Yesu wangwamba kutaula ndi kukamba, “Ng'anamukani; chifukwa waŵandika ufumu wa kuchanya.”

¹⁸Ndipo wachenda mumphepete mu nyanja ya Galile, wanguwona ŵabali ŵaŵi, Simoni wakuzumbulika Petro, ndi Andreya mhurwa wake, ŵakupong'a mikwau mu nyanja; pakuti ŵenga ŵarovi.

¹⁹Wanguti kwaku wo, “Rondoni ine, ndipo nkhakuchitaninga ŵarovi ŵa ŵanthu.”

²⁰Ndipo iwo ŵakusiya mikwau, sosonukweni ŵangumurondo.

²¹Ndipo wakwendapo wanguwona ŵabali ŵanyake ŵaŵi, Yakobe mwana waku Zebediya, ndi Yohane mhurwa wake, mu ngaraŵa pamoza ndi Zebediya uskeu ŵatandanga mikwau yawo; ndipo wanguŵadana.

²²Ndipo iwo sosonukweni ŵangusiya ngaraŵa yo ndi auskeu, ŵangumrondo.

²³Ndipo Yesu wazunguliyanga Galile yose, wakusambizga mu masinagoge ghawo, ndi wakumemeza evangeli wa ufumu wo, wakuchizga nthenda yose ndi unthomboru wose mukati mu ŵanthu.

²⁴Ndipo thenthe lake linguwanda mu Siriya yose, ndipo ŵangumtole wose ŵakutama ŵakukoreka ndi nthenda zamitundumitundu ndi maurwirwi, ŵademone ndi ŵakufuntha ndi ŵavinjenje; ndipo wose wanguŵachizga.

²⁵Ndipo yingumrondo mizinda yikuru kutuwa ku Galile ndi Dekapoli, Yerusalemu ndi Yuda ndi sirgha liyala Yordane.