Read gitonga Mateyu 7 Bible Online

Mateyu 7 - gitonga bible

Mateyu 7

¹“Mungeruzganga cha, alinga kuti mureke kweruzgika.

²Chifukwa ndi cheruzgu cho muteruzgiya, mweruzgikiyenge chenicho, ndipo ndi mweso wo mutese, kwesekiyenge imwe ndi weniwo.

³Ndipo ulereskiyanji kachipandi kamu jiso la mbali wako, kweni munthambi wamu jiso lako kuti utiwupima cha?

⁴Pamwenga ungamunene uli mbali wako, Aka, ndituzgemo kachipandi ko mu jiso lako; penipo munthambi we mu jiso lako?

⁵Wakufuvya iwe, tuzgamo danga munthambi wo we mu jiso lako, sono ndipo uwonenge umampha kutuzgamo kachipandi mu jiso la mbali wako.

⁶“Mungapaska cho nchikovu ku ŵagaru cha, chingana ndi ngare zinu mungaponga paurongo pa nguruŵi zo cha, vinu zingaphwatapo ndi marundi ghawo, ndipo, pakuweko, zingakuzwa-nduwani.

⁷“Pemphani, ndipo kupaskikenge kwaku imwe; lembeni, ndipo musaniyenge, gong'askani, ndipo kujurikiyenge imwe.

⁸Chifukwa yose wakupempha waronde; wakulembe wasaniya; ndipo ku wakugong'oska kujurikiyenge iyo.

⁹Pamwenga njani munthu mwaku imwe, yo asani mwana wake wamupemphenge chiŵande wangampaska mwa?

¹⁰Pamwenga asani wampemphenge somba, wangampaska njoka?

¹¹Viyo asani imwe chingana mwe ŵaheni, muziŵa kupaska mipasku yamampha ku ŵana ŵinu, na uli ukongwa Auskemwe ŵakuchanya ŵapaskenge vyamampha ku ŵakuŵapempha?

¹²Viyo vyose vyo mungakhumba kuti ŵanthu ŵachitiye imwe, namwe so muchitiye iwo kwakulingana: chifukwa chenichi nchilangulu cho ndi ŵamchimiwo.

¹³“Sereni mu likomo lalifyakafyaka: chifukwa ndikuru likomo, ndipo njisani nthowa, yakurongozge ku wanangiku, ndipo mbanandi ŵakusere mwaku lo.

¹⁴Chifukwa ndalifyakafyaka likomo, ndipo njifinyi nthowa, yakurongozge ku umoyo, ndipo mbamanavi ŵakulibowozga.

¹⁵“Cheŵani ndi ŵamchimi ŵatesi, ŵeniwo ŵatuza kwaku imwe mu kavwaridu kamberere, kweni mukati ndi mphumphi zakufyonkhonyo.

¹⁶Pa vipasi vyawo muŵaziŵenge. Kumbi ku minga ŵanthu ŵapontho mphereska, pamwenga nkhuyu ku ŵakankhandi?

¹⁷Viyo chimuti chose chamampha chipasa vipasi vyeneko; kweni chimuti chakuwo chipasi vipasi viheni.

¹⁸Kuti chiziŵa cha chimuti chamampha kupasa vipasi viheni chingana nchimuti chakuwo kupasa vipasi vyeneko.

¹⁹Chimuti chose chakuwura kupasa chipasi cheneko chitemeka, ndipo mu moto chipong'eka.

²⁰Viyo pa vipasi vyawo muŵaziŵenge.

²¹“Kuti waserenge mu ufumu wakuchanya cha yose wakunditamula, ‘Ambuya, Ambuya’; kweni yo ngwakulichita khumbu la Ada ŵakuchanya.

²²Ŵanandi ŵanenenge nane mu zuŵa liya, ‘Ambuya, Ambuya, asi tingutauliya mu zina linu, ndi mu zina linu tingutuzgiya ŵademone, ndi mu zina linu tinguchitiya vyanthazi vinandi?’

²³Ndipo penipo nkhakananga kwaku, wo, ‘Ndengavi kukuziŵani kose: tuwaniko kwangu, mwaŵakuchita uchikana marangu.’

²⁴“Viyo yose yo watuvwa mazu ghangu ghenagha, ndi waghachita, walinganizgikenge ku munthu wazeru, mweniyo wanguzenga nyumba yake pa jarawe:

²⁵ndipo yingung'a vuwa ŵazandi ŵanguza, zinguputa mphepu, ndipo zinguyigundizga nyumba yo; kweni kuti yinguwa cha: chifukwa yinguzengeka pa jarawe.

²⁶Ndipo yose wakuvwa mazu ghangu ghenagha, ndi ngwakuwura kughachita, walinganizgikenge ku munthu wakupusa, mweniyo wanguzenga nyumba yake pa mchenga:

²⁷ndipo yingung'a vuwa, ŵazandi ŵanguza, zinguputa mphepu, ndi zingubumiya pa nyumba yo; mpaka yinguwa: ndipo kwenga kukuru kupasuka kwake!”

²⁸Ndipo kunguŵa kuti Yesu wati wamara kurongoro vinthu ivi; mizinda ya ŵanthu yazizwanga pa chisambizgu chake:

²⁹chifukwa waŵasambizganga nge ngwakuŵa ndi mtufu, ndi nge mbalembi ŵawo cha.