Read gitonga Mateyu 8 Bible Online

Mateyu 8 - gitonga bible

Mateyu 8

¹Kweni wati wasika iyo ku phiri lo, mizinda yikuru yingumrondo.

²Ndipo, awonani, wamakhati wanguza kwake ndi wangumuŵeyere, wakuti, “Ambuya, asani mukhumba, mwe ŵanthazi kunditozga.”

³Ndipo wati watambaruwa janja lake, wangumkwaska, wakuti, “Ndikhumba; utozgeke.” Ndipo sosonukweni makhati ghake ghangutozgeka.

⁴Ndipo Yesu wangunena nayo, “Awona, ungamunene yumoza cha; kweni kanga, kajirongo ku mzukuru, ndi upereke mpasku wo Mosese wangulanguliya, uli nchisimikizgu kwaku wo.”

⁵Ndipo wati wasere Yesu mu Kapernaumu, yinguza kwaku iyo nduna, yakumuŵeyere,

⁶yakuti, “Ambuya munyamata wangu wara mu nyumba wakunjenjeme, wakusuzgika kwakofya.”

⁷Ndipo wangunena nayo, “Ndizenge kwazimuchizga.”

⁸Ndipo nduna yo, yakwamuka, yinguti, “Ambuya, kuti kutenere cha kuti imwe musere pasi pa bagha langu: kweni kambani ŵaka mazu, ndipo wachizgikenge munyamata wangu.

⁹Chifukwa ine nane nde munthu pasi pa mtufu, wakuŵa ndi ŵankhondo pasi pangu: ndipo ndinena kwaku uyu, ‘Rutanga,’ ndipo waruta, ndi ku munyake, ‘Zanga,’ ndipo watuza; ndi ku muŵanda wangu, ‘Chitanga chakuti,’ ndipo wachita.”

¹⁰Ndipo pa kumuvwa, Yesu wanguzizwa, ndipo wanguti ku ŵakumrondo, “Inyadi ndikuneniyani chingana ndi mu Yisraele kuti ndasaniya cha, chivwanu chikuru chaviyo.

¹¹Ndipo ndinena namwe, kuti ŵanandi kutuwa ku vuma ndi ku zambwe ŵazenge, ndipo ŵajenge pasi pamoza ndi Abrahamu ndi Yisaki ndi Yakobe mu ufumu wakuchanya,

¹²kweni ŵana ŵa ufumu ŵapong'ekenge ku mdima wakubwaro: kweniko kuŵenge chitenje ndi mkukutu wa minyu.”

¹³Ndipo Yesu wanguti ku nduna yo, “Kanga; mo wavwaniya, ndimo kuchitikiye iwe.” Ndipo wanguchizgika munyamata yo mu ora leniliya.

¹⁴Ndipo wati wasere Yesu mu nyumba yaku Petro, wanguwona mpongozi wake wakura, wangutama ndi muliŵavu.

¹⁵Ndipo wangukwaska janja lake, ndi muliŵavu mungumutaya; ndipo wanguyuka ndi wangumteŵete.

¹⁶Kweni kwati kwaŵa mazuro, ŵangumtole ŵanandi ŵakukoreka ndi ŵademone: ndipo wangutuzga mizimu yo ndi mazu, ndi wose ŵakutama wanguŵachizga.

¹⁷Alinga kuti ghafiskike mazu ghaku Yesaya mchimi yo wanguti, “Wanguto iyo maurwirwi ghidu, ndipo wangupinga matenda ghidu.”

¹⁸Kweni Yesu wachiwona mizinda yikuru kumzunguliya, wangulangula kwambukiya kusirgha.

¹⁹Ndipo mlembi yumoza wanguza, wangumnene, “Msambizgi, nkharondonga imwe ko kose mungaruta.”

²⁰Yesu wangunena nayo, “Akambwi ŵe ndi zimphanji, tuyuni twamude twe ndi vivimbu vyawo; kweni Mwana wa munthu walive pakurarika mutu wake.”

²¹Ndipo munyake wa ŵasambizi wangumunene, “Ambuya ndizomerezgeni kuruta danga kwachiŵika ada.”

²²Kweni Yesu wangunena nayo, “Rondo ine, uŵaleke ŵakufwa kuŵika ŵakufwa ŵaku ŵija.”

²³Ndipo wati wasere mu ngaraŵa ŵasambizi ŵake ŵangumrondo.

²⁴Ndipo wonani, linguŵapo pa nyanja lirondo likuru, viyo kuti ngaraŵa yawundikanga ndi mayigha; kweni mweneko waranga tulo.

²⁵Ndipo ŵanguza ndi ŵangumyuska ŵakuti, “Ambuya taskani, tiyowa!”

²⁶Ndipo wanguŵanene, “Mutopanji, mwaŵachivwanu chimana?” Sono wachiyuka wanguchenya mphepu ndi nyanja: ndipo kunguŵapo bata likuru.

²⁷Ndipo ŵanguzizwa ŵanthu wo, ŵakuti, “Ngwakutinji munthu uyu? Chifukwa chingana ndi mphepu ndi nyanja zitumvwiya.”

²⁸Ndipo wachiza iyo kusirgha, mu charu cha ŵaGadara, ŵangukumana nayo ŵaŵi, ŵademone, ŵakutuwa mu masano, ŵakari ukongwa, viyo kuti pengavi yumoza wakuŵa ndi nthazi kujumpha mu nthowa yiya.

²⁹Ndipo awonani, ŵangubongo, “Tatinjinamwe, mwa Mwana waku Chiuta? Mwaziya kuno kuzachitisuzga, yeche yindafike nyengo?”

³⁰Kweni kutariko ndi iwo kwarghanga mskambu wa nguruŵi zinandi.

³¹Ndipo ŵademone wo ŵangumuŵeyere, ŵakuti, “Asani mutidikenge titumizgeni ku mskambu wa nguruŵi zo.”

³²Ndipo wanguŵanene, “Kaninga!” Ndipo ŵakutuwamo ŵangusere mu nguruŵi zo: ndipo wonani, ungurazuka mskambu wo wose kusi ku mtunthu mpaka mu nyanja, ndipo ungumara mu maji.

³³Ndipo ŵanguthaŵa ŵaliska, ŵanguza mu muzi ŵangukonkhoska vyose, ndivyo vinguŵaŵiya ŵademone ŵa.

³⁴Viyo msumba wo wose ungutuwa kwachikumana ndi Yesu: ndipo, ŵachimuwona, ŵangumuŵeyere kuti watuweko ku mphaka zawo.