Read gitonga Marko 12 Bible Online

Marko 12 - gitonga bible

Marko 12

¹Wangwamba kurongoro nawo muzintharika, “Munthu wangupanda munda wa mphereska, wanguŵigha lisitu, wangukumba pakuponde mphereska, wanguzenga chigongwe, ndipo wanguwupazgiya ku ŵalimi, ndipo wanguyamtambula ku charu chinyake.

²Ndipo pa nyengo ya vipasi wantuma muŵanda ku ŵalimi wo, kuti warondeko ku ŵalimi vipasi vya munda wa mphereska.

³Ndipo ŵangumto ndi kumpuma, ndipo ŵangumdika ŵaka.

⁴Wanguŵatumiya so muŵanda munyake; ndipo mweniyo ŵangumutema ku mutu, ndi ŵangumdika kwasoni.

⁵Wangutuma munyake; ndipo uyu ŵangubaya: ndi ŵanandi ŵanyake; kuŵapuma ŵa; kubaya ŵanyake.

⁶Sono wakuŵa ndi mwana yumoza, nkhwanjiwa, wanguŵatumiya mwenuyu pakumariya, wakuti, ‘Ŵamuphwerenge mwana wangu.’

⁷Kweni ŵalimi yaŵa ŵangunenerana, ‘Uyu ndi muhara; tiyeni, tibaye, ndipo chihara cho chiŵenge chidu.’

⁸Ndipo ŵangumto, ŵangumbaya ndipo ŵangumpong'a kubwaro ku munda wo wa mphereska.

⁹Viyo waŵachitiyengenji mweni-munda wamphereska yo? Wazenge, ndi wanangenge ŵalimi wo, ndipo wapaskenge munda wo ku ŵanyake.

¹⁰Asi mwaŵerenga na lembo ili: ‘Mwa wo ŵakuzenga ŵanguwupata, weniwo waŵa mutu wa nyondu:

¹¹ichi ndi nchitu ya Ambuya, ndipo nchakuziziswa mu maso ghidu’?”

¹²Ndipo ŵapenjanga kumko; kweni ŵangopa mzinda wo; chifukwa ŵanguteska kuti wakambiyanga paku iwo ntharika yo; ndipo ŵangumeleka, ŵanguruta.

¹³Ndipo ŵangutumiya ŵanyake ŵa ŵaFarisi ndi ŵa ŵaHerode alinga kuti ŵamko mu kurongoro.

¹⁴Ndipo ŵanguti ŵaza ŵanguti, “Msambizigi, tiziŵa kuti ndimwe muneneska, ndi kuti muphwere yumoza cha: chifukwa kuti mulereska chisku cha ŵanthu cha, kweni kwakuneneksa musambizga nthowa yaku Chiuta: kumbi kuyamu kupaska msonkhu kwa Kaisare, pamwenge awa?

¹⁵Tipaskenge, pamwenga tirekenge kupaska?” Kweni iyo, pakuziŵa kufuvya kwawo, wanguŵanene, “Mutindesiyanji? Nditoleni tambala ndimuwone.”

¹⁶Ndipo iwo ŵangumtole. Sono watiti kwaku wo, “Vyaku yani chikozgu ichi ndi lembo ili?” Wangumnene, “Vyaku Kaisare.”

¹⁷Yesu wanguŵanene, “Vyaku Kaisare paskani kwaku Kaisare, ndi vyaku Chiuta kwaku Chiuta.” Ndipo ŵanguzizwa ukongwa paku iyo.

¹⁸Ndipo ŵanguza ŵaSaduki, ŵeniwo ŵakamba kuti chiyuka kulive; ŵangumfumba, ŵakuti,

¹⁹“Msambizgi, Mosese wangutilembe kuti, Asani mkuwake wa munthu wangafwa, ndi wangasiya muwoli, wambura mwana cha, mhurwa wake wamto munthukazi yo, mwakuti wayuskiye mkuwake mbeu.

²⁰Wanguŵapo ŵabali ŵankhonde ndi ŵaŵi: wachimoza wanguto munthukazi, ndipo wachifwa kuti wangusiyapo mbeu cha;

²¹ndi wachiŵi yo wangumto, ndipo wangufwa wakusiyapo mbeu cha; ndi wachitatu kwakulingana,

²²ndipo ŵankhonde ndi ŵaŵi wo ŵengavi kusiyapo mbeu. Pakumariya paku wose munthukazi nayo wangufwa.

²³Mu chi yuka cho waŵenga muwoli waku nunju waku wo, pakuti ŵankhonde ndi ŵaŵi ŵenga nayo nge ndi muwoli?”

²⁴Yesu wanguŵanene, “Asi mwaku chenichi muranda, pakuti mulive kuziŵa malembo gho, chingana ndi nthazi yaku Chiuta?

²⁵Chifukwa penipo ŵayukenge ku ŵakufwa, kuti ŵakatonga cha, chingana nkhuti ŵaŵirwenge cha; kweni ŵamuja nge mbangelo kuchanya.

²⁶Kweni nge nkhu ŵakufwa, kuti ŵayuskika, asi mwaŵerenga mu buku laku Mosese, pa chivwati cho, mo Chiuta wangumnene, kuti, ‘Ndine Chiuta waku Abrahamu, ndi Chiuta waku Yisaki, ndi Chiuta waku Yakobe’?

²⁷Kuti ndi Chiuta wa ŵakufwa cha, kweni wa ŵamoyo: muranda ukongwa.”

²⁸Ndipo wanguzako yumoza wa ŵalembi, wachiŵavwa ŵakufumbana pamoza ndi pakuziŵa kuti waŵamuka umampha, wangumfumba, “Nindi dangu likuru kwaku ghose?”

²⁹Wangwamuka Yesu, “Lakudanga ndenili: ‘Uvwepo, Yisraele; Ambuya Chiuta widu, Mbuya njumoza:

³⁰ndipo wanjenge Mbuya Chiuta wako ndi mtima wako wose, ndi ndi mzimu wako wose, ndi ndi vinjeru vyako vyose, ndi ndi nthazi yako yose.’

³¹Lachiŵi ndenili, ‘Wanjenge mwanase wako nge ndiwe wamweni.’ Dangu linyake likuru ndi ghenagha palive.”

³²Ndipo mlembi yo wangunena nayo, “Umampha, Ambuya, mwaneneska kuti njumoza; ndipo palive munyake kweni iyo pe;

³³ndipo kumwanja iyo ndi mtima wose, ndi ndi uteska wose, ndi ndi nthazi yose, ndi kumwanja mwanase wako nge ndiwe wamweni, nkhwakuruska vyakocha vizirima ndi visopu.”

³⁴Ndipo wachiwona Yesu kuti wamuka kwazeru, wangumnene, “Kuti we kutari ku ufumu waku Chiuta cha.” Ndipo kutuwa penipa kuti yumoza wanguŵa ndi chinganga kumfumbapo so fumbo cha.

³⁵Ndipo Yesu wachisambizga chisambizga mu kasopi, wanguti, “Akamba uli ŵalembi kuti Kristu ndi mwana waku Davidi?

³⁶Davidi iyo wangunena pakututuzgika ndi Mzimu Wakupaturika, ‘Ambuya ŵangunene Ambuyangu, uje ku marghe ghangu, mpaka po ndaŵika ŵarwani ŵanu pasi pa marundi ghinu.’

³⁷Davidi iyo watimzumbuwa Ambuya; na ndi mwana wake uli?” Ndipo mzinda ukuru wo wamuvwanga kwakusangaruka.

³⁸Mu chisambizgu chake wanguti, “Cheŵani ndi ŵalembi wo ŵakhumba kwendaenda mu makhanju, ndi ŵakukhumba matauzgu mu zimphara za maronda,

³⁹ndi vitengu vyachimoza mu masinagoge, ndi malo ghachimoza mu madghera;

⁴⁰wo so ŵaturgha nyumba za vyoko, ndipo mu kujiwoneska ŵaromba kwakutaruliya. Yaŵa ŵarondenge chisusa chakuruska.”

⁴¹Ndipo wachija pasi pakuthyana ndi chambiku, wawonanga mo mzindawo watayiyangamo ndrama mu chambiku mo. Wanandi ŵasambasi ŵatayangamo vinandi.

⁴²Ndipo chinguza choko chimoza chikavu, chingutayamo tumakopara tuŵi, to tutufwa tambala yumoza.

⁴³Ndipo pakujidaniya ŵasambizi ŵake wanguŵanene, “Ndineneske imwe, kuti choko ichi chikavu chatayamo kwakuruska wose ŵakutayamo mu chambiku cho:

⁴⁴chifukwa wose ŵangutayamo vyo vyakuŵafurwiya; kweni icho ku usauchi wake chatayamo vyose vyo chenga navyo, umoyo wake wose.”