Read gitonga Marko 16 Bible Online

Marko 16 - gitonga bible

Marko 16

¹Ndipo lati laruta Sabata, Mariya waku Magdala, ndi Mariya nyina waku Yakobe, ndi Salome ŵangugula vyema alinga kuti ŵazichimtukutizga.

²Ndipo ndi mlenjilenji pa zuŵa la chimoza la lisabata ŵatuza ku muunda wo, lati latuwa dazi.

³Ndipo ŵanenerananga mwaku ŵija, “Njani watikunkhuzgiyenge mwa wo kuwutuzgako ku khomu la muunda?”

⁴Ndipo wachiyunuska maso ŵanguwona kuti mwa watuzgikako: chifukwa wenga weniukuru.

⁵Ndipo wangusere mu muunda, ŵanguwona jaha laja pasi ku marghe, lakuvwara khanju lituŵa, ndipo ŵangurwitiskika.

⁶Ndipo iyo wanguti kwaku wo, “Mungarwitiskikenga cha: mupenja Yesu waku Nazarete, mweniyo wangupayikika. Wayuka: kuti we panu cha: alereni, malo po ŵangumuŵika.

⁷Kweni kaninga, kaŵaneniyeni ŵasambizi ŵake ndi Petro, wakudanjiriyani ku Galile; kweniko mwamkumuwona, ulaka ndimo wangukuneniyani.”

⁸Ndipo ŵangutuwamo, ŵanguthaŵa ku muunda wo; chifukwa chitenthe ndi kuzizwa vinguŵako: ndipo kuti ŵanguneniyapo yumoza kanthu cha, chifukwa wopanga. [

⁹Wati wayuka ndi mlenjilenji pa zuŵa lachimoza la lisabata, wanguwoneka danga kwaku Mariya Magdala, mwaku mweniyo wangutuzga ŵademone ŵankhonde ndi ŵaŵi.

¹⁰Wanguruta iyo ndipo wangwachitauliya wo ŵenga pamoza nayo, wachitenje ndi kuliya.

¹¹Ndipo iwo, ŵachivwa kuti ngwamoyo, ndi wamuwoneke iyo, ŵengavi kuvwana.

¹²Ndipo pavuli paku vyenivyo mu kawonekedu kamwenga wanguwoneke ŵaŵi ŵaku wo, ŵachitembeya ndi kuruta ku viŵera.

¹³Ndipo ŵachiruta ŵenaŵa, ŵangutauliya ŵakujapo: kweni kuti ŵanguvwana cha chingana ndiwo.

¹⁴Ndipo pavuli penipo wanguŵawoneke chumi ndi yumoza ŵija, ŵachija pa kurgha; ndipo wanguchenya uwura-chivwanu wawo ndi unononu wa mtima, pakuti ŵengavi kuvwana ndi ŵeniwo ŵangumuwona wati wayuka.

¹⁵Ndipo wanguŵanene, “Kaninga mu charu chose; ndipo memezani evangeli ku ulengi wose.

¹⁶Yo wavwana ndi wabatizika wataskikenga; kweni yo wareka kuvwana wasuskikenge.

¹⁷Ndipo visimikizgu vyenivi vikarondonga ŵeniwo ŵavwana: mu zina langu ŵakatuzgiyanga ŵademone; ŵakarongoronga ndi malilime ghafya;

¹⁸ŵakasoskanga zinjoka, ndipo asani ŵangamwa kanthu karwani, kuti kakaŵapwetekanga cha; ŵakaŵikanga manja pa ŵarwali, ndipo ŵakachiranga.”

¹⁹Viyo ndipo Ambuya Yesu, pavuli pa kurongoro nawo, wangurondeke kuchanya, ndipo wangujariya pasi ku janja lamarghe laku Chiuta.

²⁰Kweni ŵenaŵa ŵangutuwa, ndipo ŵangumemeza kosekose, Ambuya iwo ŵakutataliya pamoza nawo, ndi ŵakukhozga mazu ndi visimikizgu vyakurondo. Ameni.]