Read gitonga Marko 5 Bible Online

Marko 5 - gitonga bible

Marko 5

¹Wanguza ku nyanja kusirgha, mu charu cha ŵaGerasa.

²Ndipo wachituwa iyo mu ngaraŵa, wangukumana nayo, kutuwa ku masano, munthu wa mzimu wawiyu,

³mweniyo wenga ni uja wake mu masano: pengavi yumoza wanthazi kumumanga chigana ndi unyoro;

⁴chifukwa panandi wangumangika ndi matangaja ndi maunyoro; ndipo maunyoro ghangudumuka ndi iyo, ndi matangaja ghangupikitika: ndipo kwengavi yumoza wanthazi kumgoda.

⁵Nyengo zose, usiku ndi msana, mu masano ndi mumapiri wakamburanga, ndi kujicheka ndi mya.

⁶Kweni wachiwona Yesu kutari, wanguchimbiya ndi kumlambiya;

⁷wakukambura ndi mazu ghakuru, wanguti, “Ndatinji namwe, Yesu, mwaMwana waku Chiuta Wamdengwendi? Ndikurapiskiyani ndi Chiuta, mungandisuzganga cha.”

⁸Chifukwa wangunena nayo, “Tuwamo mu munthu yo, mzimu we, wawiyu.”

⁹Ndipo Yesu wangumfumba, “Ndine zina lako?” Wangwamuka, “Zina langu ndine Liŵanja, pakuti te ŵanandi.”

¹⁰Ndipo wangumuŵeyere ukongwa kuti wangayidikamo mu charu cha.

¹¹Kweni mskambu ukuru wa nguruŵi warghanga pa mtunthu po;

¹²ndipo yingumuŵeyere, kuti, “Titumizgeni mu nguruŵi zo, kuti tisere mwaku zo.”

¹³Ndipo wanguyizomerezga. Sono mizimu yo yawiyu yichituwa yingusere mu nguruŵi zo: ndipo mskambu wo ungungungunthiya ku sendemu ndi ungubira mu nyanja, akhumba vikwi viŵi; ndipo zose zingufwiya mwenimo.

¹⁴Ŵakuziliska ŵanguthaŵa, ŵanguchitauliya mu muzi ndi mu minda. Ndipo ŵanthu ŵanguza kwaziwona chakuŵapo cho.

¹⁵Ndipo ŵanguza kwaku Yesu, ŵangumuwona wademone yo wakuja ndeku pasi, wakuvwara ndi wakuŵa ndi zeru, mweniyo wenga liŵanja: ndipo wangopa.

¹⁶Ndipo wo ŵengapo ŵanguŵakonkhome mo kungumuŵiya wademone yo, ndi vyapa nguruŵi zo.

¹⁷Ndipo ŵangwamba kumuŵeyere Yesu Kuti watuwemo mu mphaka zawo.

¹⁸Ndipo wachisere mu ngaraŵa, yo wanguŵa ndi wademone wangumuŵeyere, kuti waŵe pamoza nayo.

¹⁹Kweni kuti Yesu wangumzomerezga cha, kweni wangumnene, “Kanga ku nyumba yako ku ŵabali ŵako, uŵatauliye vikuru vyo Ambuya akuchitiya ndimo akufwiya lisungu.”

²⁰Ndipo wanguruta, wangwamba kumemeza mu Dekapoli ndi vikuru vyo Yesu wangumuchitiya ndipo wose ŵanguzizwa.

²¹Wati wambukiya Yesu kusirgha so mu ngaraŵa, mzinda ukuru unguwunjikana kwaku iyo; ndipo wenga mu mphepete mu nyanja.

²²Kunguza yumoza wa ŵara ŵa sinagoge, zina lake Yairo ndipo wachimuwona wanguwa pasi pa marundi ghake;

²³wangumuŵeyere ukongwa, wakuti, “Kana kasungwana kangu kaziririka ke pafupi kufwa, zani, muzichiŵika pakemanja ghinu, alinga wachizgike waŵe ndi umoyo.”

²⁴Ndipo Yesu wanguruta pamoza nayo. Ndipo mzinda ukuru wamrondonga; ndi wamfinyirizganga.

²⁵Ndipo mweni-muwa mwenga munthukazi msuruwa ndopa yo wangutama kwa virimika chumi ndi viŵiyo wangukunthiyapo vinandiku ng'anga zinandi, ndi wangumara vyake vyose,

²⁶ndipo kuti wangovyeka kanthu cha kweni ukongwa watamanga uheniku,

²⁷wati wavwa vyapaku Yesu, wanguza kuvuli mu mzinda wo, ndipo wangukwaska munjirira wake.

²⁸Chifukwa watinge, “Asani ndingakwaska chingana ndi minjirira yake pe nkhachiranga.”

²⁹Ndipo sosonukweni chingukamuka chisima cha ndopa zake; ndipo wanguziŵa mu liŵavu lake kuti wachizgika.

³⁰Yesu pakuziŵa mwaku yija kuti nthazi ya mwake yatuwa, wangung'anamuka mu mzinda wo, wanguti, “Njani wakwaska minjirira yangu?”

³¹Ndipo ŵasambizi ŵake ŵangunena nayo, “Muwona mzinda utukufinyikizgani, ndipo mutiti, ‘Njani wandikwaska?’ ”

³²Ndipo walereskanga kwakuzunguliya kuwona yo wanguchita chenichi.

³³Ndipo munthukazi yo, wakopa ndi wakunjenjeme, wakuziŵa so chenicho chingumuŵiya, wanguza ndi wanguwa paurongo pake, ndipo wangumnene uneneska wose.

³⁴Yesu wanguti kwaku iyo, “Mwana munthukazi we, chivwanu chako chakutaska; kanga mu chimangu, uchizgike ku nthenda yako.”

³⁵Wenga wechekurongoro iyo, wanguza, kutuwa ku nyumba yaku Yiro, wakuti, “Mwana wako wafwa: utimusuzgiranji so Msambizgi?”

³⁶Kweni Yesu wakuphwereko cha ku mazu ghakurongoroleka, watiti ku mura wa sinagoge, “Ungopanga cha, vwananga waka.”

³⁷Ndipo kuti wanguzomerezga yumoza kurongozgana nayo cha, kweni Petro, Yakobe, ndi Yohane mhurwa waku Yakobe.

³⁸Ndipo watuza ku nyumba ya mura wa sinagoge yo; wangusaniya chiwawa, ndi ŵanandi ŵakuliya ndi ŵakutenje ukongwa.

³⁹Ndipo wachisere watiti kwaku wo, “Muwawatiyanji ndi kuliya? Kuti kana kafwa cha, kweni kara.”

⁴⁰Ndipo ŵangumseka, kweni iyo wati waŵatuzga wose, wanguto wiske wa kana, nyina ndi wapamoza nayo, wangusere mwenimo kana kenga.

⁴¹Ndipo wakukole janja la kana, wanena nako, “Talita kumi”; ndiku kuti, “Msungwana we, ndikunene, yuka.”

⁴²Sosonukweni wanguyuka msungwana, ndipo wendayendanga; pakuti wenga wa virimika chumi ndi viŵi. Ndipo ŵanthu ŵangurwita ndi chirwitu chikuru.

⁴³Ndipo wanguŵalanguliya ukongwa, kuti wangachiziŵa chenichi yumoza cha: ndipo wangukamba kuti kupaskike kurgha kwaku iyo.