Read gitonga Marko 8 Bible Online

Marko 8 - gitonga bible

Marko 8

¹Mu mazuŵa ghenigha, pakuŵapo so mzinda ukuru, ndi pakuŵavi iwo kanthu kakurgha, Yesu wanguŵadana ŵasambizi ŵake, wanguti kwaku wo,

²“Ndendi lisungu pa mzinda wo, pakuti sono ŵatandara nane mazuŵa ghatatu, ndipo kuti ŵargha kanthu cha:

³ndipo asani ndiŵatumenge waka kuruta kwawo ŵanja, ŵafwenge msara mu nthowa; pakuti ŵanyake ŵaku wo ŵatuwa kutari.”

⁴Ndipo ŵangumwamuka ŵasambizi ŵake, “Yumoza wangaziŵa uli kuŵagutiska ndi kurgha panu pa bozwa?”

⁵Ndipo wanguŵafumba, “Mwe navyo viŵande viringa?” Wanguti iwo, “Vinkhonde ndi viŵi.”

⁶Ndipo wangulanguliya mzinda wo kuteka pasi: wanguto viŵande vinkhonde ndi viŵi vyo, ndipo wati wawonga wangumenya, wapaskanga ku ŵasambizi ŵake, kuti ŵaŵapaske: ndipo ŵangupereka kumzinda wo.

⁷Ndipo ŵenga natu tusomba tumanavi: ndipo wati watumbika wangulangula kuŵapaska twenito natu.

⁸Ndipo ŵangurgha ndi kuguta: ndipo ŵanguyora vitete vinkhonde ndi viŵi vya marivuvu ghakujapo.

⁹Kweni wenga ŵanthu akhumba vikwi vinayi: ndipo wanguŵatuzga ŵarutenge.

¹⁰Ndipo sosonukweni wati wakwera mu ngaraŵa pamoza ndi ŵasambizi ŵake, ŵangufika mu vigaŵa vya Dalmanuta.

¹¹Ndipo ŵanguza ŵaFarisi, wangwamba kufumbana nayo, ŵakulembe kwaku iyo chisimikizgu chakutuwiya kuchanya, pakumwesa.

¹²Wakutamantha ukongwa mu mzimu wake, watiti, “Mgonezi uno upenjiyanji chisimikizgu? Nadidi ndinene imwe, kuti chipaskikenge chisimikizgu ku mgonezi uno cha.”

¹³Ndipo wanguŵaleka, wangukwera so mu ngaraŵa, wanguruta kusirgha linyake.

¹⁴Ndipo ŵanguruwa kupinga viŵande, vinandi, ŵenga ndi chiŵande chimoza pe mu ngaraŵa.

¹⁵Ndipo wanguŵalanguliya wakuti, “Cheŵani ndi mtupu wa ŵaFarisi ndi mtupu waku Jerode.”

¹⁶Ndipo ŵakambirananga, ŵakuti, “Tirive viŵande!”

¹⁷Yesu pakuziŵa watiti kwaku wo, “Mukambirananji, chifukwa mulive chiŵande? Ndasono asi muteska, chingana nkhuwamo? Kumbi mwe ndi mtima unononu viyo?

¹⁸Wakuŵa ndi maso, kweni kuti mulereska cha? Wakuŵa ndi makutu, kweni kuti mutuvwa cha? Ndipo asi mukumbuka?

¹⁹Penipo ndingumenya viŵande vinkhonde mu vikwi vinkhonde, munguyora sokora ziringa za marivuvu?” Wamunene, “Chumi ndi ziŵi.”

²⁰“Ndipo ndi viŵande vinkhonde ndi viŵi vyo mu vikwi vinayi munguyora vitete vilinga vya malivuvu?” Wamunene, “Vinkhonde ndi viŵi.”

²¹Ndipo wanguti kwaku yo, “Asi mundawemo ndasono?”

²²Wanguza ku Betesaida. Ndipo wangumtole wachiburumutiya wangumuŵeyere kuti wamukwaske.

²³Ndipo wati wamko wachiburumutiya yo pa janja, wangumrongozge kubwaro ku muzi; ndipo wati wafunyiya mata pa maso ghake, ndi kuŵikapo pake manja ghake, wangumfumba, “Kumbi uwona kanthu?”

²⁴Ndipo wati wayinuska maso, wanguti, “Ndiwona ŵanthu, ndituŵaona uli ndi miti ŵakwendayenda.”

²⁵Sono wanguŵikapo so manja pa maso ghake; ndipo wangulereska umamphavi, wanguchizgika, ndi wawonanga ukweru wose.

²⁶Ndipo wangumtuma ku nyumba yake, wakuti, “Chingana ndi mu muzi ungaseremu cha.”

²⁷Ndipo wanguruta Yesu, ndi ŵasambizi ŵake, mu mizi yaku Kaisarea Filipi: ndipo mu nthowa wanguŵafumba ŵasambizi ŵake, wakuti kwaku wo, “Wanthu ŵatiti ine ndine yani?”

²⁸Ndipo ŵangumnene, ŵanguti, “Yohane Mbatizi yo: ndi ŵanyake, Eliya; ŵanyake, yumoza wa ŵamchimi.”

²⁹Ndipo wanguŵafumba, kweni nanga imwe mutiti, “Ine ndine yani?” Petro watamuka, watiti kwaku iyo, “Imwe ndimwe Kristu.”

³⁰Ndipo wanguŵalanguliya kuti ŵangachinene yumoza cha vya paku iyo.

³¹Ndipo wangwamba kuŵasambizga, kuti kutenere Mwana wa munthu kuvwiyapo vinandi, ndi kukanika ndi ŵara, ŵazukuru ŵara ndi ŵalembi, ndi kubayika, ndipo pavuli pa mazuŵa ghatatu kuyuka.

³²Ndipo warongoronga ivi pakweru. Sono Petro wangumto ndi wangwamba kumususka.

³³Kweni iyo wangung'anamuka, ndi wakuwona ŵasambizi ŵake, wangumuchenya Petro, wanguti, “Kanga kuvuli kwangu, Satana; chifukwa kuti usuŵiriya vyaku Chiuta cha, kweni vya ŵanthu.”

³⁴Ndipo wangudana mzindawo pamoza ndi ŵasambizi ŵake, wangunena nawo, “Asani yumoza wakhumba kuza kuvuli kwangu, wajikanizge, wato mphinjika yake, ndi wandirondonge ine.

³⁵Chifukwa yose yo wangakhumba kutaska umoyo wake, wawutayenge; kweni yose yo wangataya umoyo wake pa chifukwa chaku ine ndi evangeli wo, wawutaskenge.

³⁶Chifukwa kumovyengenji munthu kwanduwa charu chose, ndi kutayapo umoyo wake?

³⁷Pamwenga munthu wangapaska chine chakugulizgana ndi umoyo wake?

³⁸Chifukwa yose wachitenge soni paku ine ndi mazu ghangu mu mgonezi uno waureŵi ndi waulakwi, Mwana wa munthu nayo wamuchita soni paku iyo, penipo wazenge mu unkhankhu wa Awiske pamoza ndi ŵangelo ŵakupaturika.”