Read gitonga Luka 12 Bible Online

Luka 12 - gitonga bible

Luka 12

¹Mwaku vyenivyo, vichongerana vikwivikwi vya mzinda wo, viyo kuti ŵakandirizgananga, wangwanda kuŵanene ŵasambizi ŵake danga, “Jichenjeriyeni ndi mtupu wa ŵaFarisi wo, ŵeniwo ndi fuvyu.

²Kweni palive kanthu kakubenekereka ko karekenge kuvunulika: ndi kakubisika keniko karekenge kuziŵikwa.

³Chifukwa chenicho vyose vyo mwarongorore mu mdima, mu ukweru vivwikenge; ndipo chenicho mungurongorole mu gutu mu vipinda vitaulikiyenge pa mabagha pachanya.

⁴“Ndipo ndikuneniyani mwa ŵabali ŵangu, mungopanga cha ŵakubaya liŵavu, ndipo pavuli pake mbakuŵavi kanyake kakuruska kwachichita.

⁵Kweni ndazamrongo imwe yo mopenge: mopeni yo ngwakuŵa ndi mtufu, wati wabaya, kupong'amu mu Gehena; nadi, ndikuneniyani, mopeni mweniyo.

⁶Asi ŵaphwitu ŵankhonde ŵasaskika tumatambala tuŵi? Ndipo kuti waruwika yumoza waku wo cha pa maso ghaku Chiuta.

⁷Kweni masisi nagho gha mutu winu ghapendeka ghose. Mungopa cha; muruska ŵaphwitu ŵanandi.

⁸“Ndipo ndikuneniyani, yose yo wangazomera ine paurongo pa ŵanthu, Mwana wa munthu nayo wamzomerenge iyo paurongo pa ŵangelo ŵaku Chiuta;

⁹kweni yo ngwakukana ine pa maso gha ŵanthu, wakanikiyenge mu maso gha ŵangelo ŵaku Chiuta.

¹⁰Ndipo yose yo wakambiyenge mazu pa Mwana wa munthu, kurekekiyenge iyo; kweni ku wakutuka, pa mzimu Wakupaturika kuti kumurekekiyenge cha.

¹¹Ndipo penipo ŵakutoliyeninge ku masinagoge gho, ndi ku ŵara, ndi ku mitufu, mungakweŵeka cha chenicho muŵamukenge, chingana nchenicho mukambenge:

¹²chifukwa Mzimu Wakupaturika warunguchizgenge imwe mu ora leniliya vyo mutenere kukamba.”

¹³Ndipo yumoza wamu mzinda wangumunene, “Muwomba, munene mbali wangu kugaŵana nane chihara cho.”

¹⁴Kweni iyo wanguti kwaku iyo, “Wamunthu, njani wangumika ine mweruzgi ndi mgaŵi paku imwe?”

¹⁵Ndipo wanguti kwaku wo, “Mucheŵe ndi muchwe ku mbunu yose: pakuti umoyo wa munthu kuti uŵiya mu ufurwi waku vyo we navyo cha.”

¹⁶Ndipo wanguŵanene ntharika, wakuti, “Charu cho cha mromba ngana chingupasa umampha:

¹⁷ndipo wajipimiyanga mwaku yija, wakuti, ‘Ndichitenge chine, pakuti ndirive po nkharonganga vipasi vyangu?’

¹⁸Ndipo wanguti, ‘Chenichi ndichitenge; nkhapanyuwanga nkhokwe zangu, ndipo nkhazenganga zikuruku; ndipo mwenimo nkharonganga mbutu yangu yose ndi vyuma vyangu.

¹⁹Ndipo ndineniyenge mzimu wangu, Wamzimu, we navyo vyuma vinandi vyakuŵikikiya ku virimika vinandi; pumuwapo; irgha, imwa, kondwa.’

²⁰Kweni Chiuta wanguti kwaku iyo, ‘Wakupusa we, usiku uno ŵawufumbiyenge mzimu wako; ndipo vyenivyo warongoso, viŵenge vyaku yani?’

²¹Viyo ndimo waliri wakujiŵikiya mbiku, ndi kuti ndi mromba cha kuchiri kwaku Chiuta.”

²²Ndipo wanguti ku ŵasambizi ŵake, “Chifukwa chenichi ndikuneniyani, mungakweŵeke umoyo winu, chenicho mungargha; chingana nkhu liŵavu cho mungavwara.

²³Chifukwa umoyo ngwakuzungura chakurgha, ndi liŵavu ndakuzungura chivwaru.

²⁴Pimiyanipo ŵachahore wo, pakuti kuti ŵaseŵa cha chingana nkhuvuna, wo ŵalive chipinda chingana ndi nkhokwe; ndipo Chiuta watuŵalera: uli ukongwaku muzungura imwe viyuni vyo!

²⁵Ndipo njani wamwaku imwe pakukweŵeka ngwanthazi kukuskiyako ku msinkhu wake mkonu umoza?

²⁶Viyo asani mulive nthazi kuchita chingana nchimana viŵi, mukweŵekiyanji vyakujapo?

²⁷Pimiyanipo ŵabwatinda wo, mo ŵamere: kuti ŵatakataka cha, chingana kusona saru; kweni ndikuneniyani, chingana ndi Solomoni mu unkhankhu wake wose kuti wavwaliranga cha nge njumoza waku wo.

²⁸Kweni asani Chiuta wavwalika viyo uteka, wakuŵa mu dondu le ndi mawa wakupong'eka mu ng'anjo; uli ukongwaku wavwalikenge imwe, mwaŵachivwanu chimana?

²⁹Ndipo mungapenjanga cha chenicho mungargha ndi chenicho mungamwa, ndipo mungakangang'anga cha.

³⁰Chifukwa vyose vyenivyo mitundu ya charu yilembe: Auskemwe ŵaziŵa kuti mukavuka vyenivyo.

³¹Kweni penjani ufumu wake, ndipo vikuskikiyengeko ivi kwaku imwe.

³²“Ungopanga, wakamskambu kamana; pakuti Auskemwe ŵakondwa kumpaskani ufumu wo.

³³Saskani vyo mwe navyo, ndi paskani chawezi. Jichitiyeni vikwama vyambura kuguga, mbiku yambura kupere mu machanya, kweniko munkhungu kuti wandere kufupi cha, chingana ndi chipupuruzu kuti chitananga cha.

³⁴Chifukwa ko kwe mbiku yinu, kweniko kuŵenge mtima winu nawo.

³⁵“Viunu vinu viŵe vyakuchinyirika, ndi nyali zinu zakukole;

³⁶ndipo muŵe imwe ŵakukozgana ndi ŵanthu ŵakulereze mbuyau waku ŵija, penipo wawenge ku chakurgha cha nthengwa; alinga kuti, wati waza ndi wagong'oska, ŵangamjuriyako sosonukweni.

³⁷Mbamwaŵi ŵaŵanda yaŵa ŵeniwo mbuya yo, wakuti waza, waŵasaniyenge mbakukhazga; nadidi ndikuneniyani, kuti wajichinyiyenge ndi waŵajarikenge pa kurgha, ndi wazamkuŵamiriya.

³⁸Ndipo asani wazenge mu lindu lachiŵi, ndi asani mu lachitatu, ndipo wasaniyenge viyo, mbamwaŵi iwo.

³⁹Kweni ziŵani chenichi, kuti asani wanguziŵa mweninyumba ora lakuti munkhungu yo waziyenge, mphanyi wangukhazga, ndi mphanyi kuti wangureka nyumba yake kubukutulika cha.

⁴⁰Namwe so muŵe ŵakurongosoleka; pakuti mu ora lo mulive kughanaghana ndimo Mwana wa munthu wakaziyanga.”

⁴¹Ndipo Petro wanguti, “Ambuya, kumbi mukambiya ifwe ntharika iyi, pamwenga so wose?”

⁴²Ndipo Mbuya wanguti, “Njani na mlinda yo wamagomekezgeka ndi wazeru, mweniyo mbuyake wamikenge pa mbumba yake kwachipaska kamba mu nyengo yakwene?

⁴³Ngwamwaŵi muŵanda yuwa mweniyo mbuyake, wachiza, wamsaniyenge wakuchita viyo.

⁴⁴Ndikuneneskiyani, kuti wamumikenge paku vyose vyo we navyo.

⁴⁵Kweni asani muŵanda yo wanenenge mu mtima wake, ‘Waswera kuza mbuyangu;’ ndipo wambenge kupuma ŵahurwa ndi ŵasungwana, ndi so kurgha ndi kumwa, ndi kuloŵe:

⁴⁶wazenge mbuyake wa muŵanda yuwa mu zuŵa lenilo walive kulereze, ndi mu ora lenilo walive kuziŵa, ndipo wamdumuwenge, ndi waŵikenge chigaŵa chake pamoza ndi ŵambura magomekezgeka.

⁴⁷Kweni muŵanda wakuziŵa khumbo la mbuyake, ndi wambura kurongoso pamwengakuchita uli ndi khumbo lake, wakwechulikenge zinandi.

⁴⁸Kweni wambura kuziŵa yo, ndi wakuchita vyakwenere zimbumu, wakwechulikenge zimanavi. Ndipo kwaku mweniyo yose chipaskika chinandi, chinandi chilembezekenge kwaku iyo: ndipo kwaku mweniyo wapazgiya chinandi wafumbenge kwaku iyo chakuruska.

⁴⁹“Ndinguza kwachipong'a moto pa charu; ndipo ndikhumba kuti mphanyi ukukole kali!

⁵⁰Kweni chibatizo nde nacho kwachibatizikiyamo, ndipo uli ndifinyirizgika mpaka penipo chingafiskika;

⁵¹kumbi mupima kuti ndikuziya kwachipaska chimangu mu charu? Ndikuneniyani, Awa na; kweni ukongwa gaukano.

⁵²Chifukwa kwanda ku sono mu nyumba yimoza ŵaŵenge ŵankhonde ŵakugaŵikana, ŵatatu pa ŵaŵi, ndi ŵaŵi pa ŵatatu.

⁵³Agaukanenge, wiske pa mwana, ndi mwana pa wiske; nyina pa mwana munthukazi, ndi mwana munthukazi pa nyina; mpongozi pa mkumwana wake, ndi mkumwana pa mpongozi.”

⁵⁴Ndipo waneniyanga mizinda nayo, “Muchiwona mtambo wakusoke ku zambwe, sosonu mutiti, ‘Vuwa yituza;’ ndipo kutuŵa viyo.

⁵⁵Ndipo muchiona mwera uputa, mutiti, ‘Chiŵengepo chifundizi,’ ndipo kutuŵiya.

⁵⁶Mwaŵakufuvya, chisku cha charu ndi cha kuchanya muziŵa kurozga; kweni mureka uli kuziŵa kurozga nyengo yeniyi?

⁵⁷“Ndipo chifukwa chine kwaku mwaŵeni mureka kweruzga cho nchakurunjika?

⁵⁸Chifukwa penipo urongozgana ndi mphindikwa yako, muruta ku bwaro la mweruzgi, mu nthowa yo pamphuka kutatauka kwaku iyo, vinu kokuli yingakuguguziya pauronga pa mweruzgi yo, ndi mweruzgi yo wangakupereka ku msilikali yo, ndi msilikali yo wangakupong'a mu ulinda.

⁵⁹Ndikukuneniyani kuti ungatuwa mwenimo cha, mpaka walipa katambala kakumariya.”