Read gitonga Luka 14 Bible Online

Luka 14 - gitonga bible

Luka 14

¹Ndipo kunguŵa wachisere iyo mu nyumba ya yumoza wa ŵara ŵa ŵaFarisi pa Sabata kwachirgha chiŵande, iwo ŵamkhazganga.

²Ndipo wonani, munthu yumoza wamburu wengapo paurongo pake.

³Ndipo Yesu wakwamuka wangunena ku ŵamarangu ndi ŵaFarisi, wakuti, “Kuyamu, ati, kuchizga pa Sabata, pamwenga awa?” Kweni ŵanguchetama iwo.

⁴Ndipo wangumto, ndi wangumchizga, ndipo wangumtuzga.

⁵Ndipo wanguŵanene, “Njani waku imwe waŵenge ndi mbunda pamwenga ng'ombe yakuwa mu chisima, ndipo wareka ruŵiruŵi kuyizuuwa pa zuŵa la Sabata?”

⁶Ndipo kuti ŵanguŵa ŵanthazi cha kwamuka vyenivi.

⁷Ndipo wakambiyanga ŵakundanika wo ntharika, wachithoŵa mo ŵajisankhiyanga vitengu vyakudanga; wakuŵanene.

⁸“Penipo udanika ndi yumoza ku chakurgha cha nthengwa, ungaja pasi cha pa chitengu chakudanga cho; vinu wambiriku kwaku iwe wangaŵa wakudanika ndi iyo;

⁹ndipo wachiza yo wangudana iwe ndi iyo wanenenge nawe, ‘Mundere uyu malo;’ ndipo viyo wambenge ndi soni kuto malo ghakumariya.

¹⁰Kweni penipo ungadanika, ruta, ja pasi mu malo gha kumariya; alinga kuti, penipo wangaza yo wakudana, wanganena nawe, ‘Bwezi, ukwere kuno kunenaku;’ penipo ukuŵiyenge unkhankhu pa maso ghaku wose wo mbakuja pasi pamoza nawe.

¹¹Pakuti yose wakujikuzga wayuyulikenge; ndipo yo ngwakujiuyuwa wakuzgikenge.”

¹²Ndipo wanenanga so ndi yo wangumdana, “Penipo ubika mrauku pamwenga njonesku, ungadananga cha mabwezi ghako, pamwenga ŵabali ŵako, pamwenga vinini vyako, pamwenga ŵanasi ŵaromba: vinu iwo nawo ŵangadana iwe so, ndipo kungakuŵiya mbwerezga.

¹³Kweni penipo ubika dghera, dana ŵakavu, ŵakupunduka, ŵakuganthiya, ŵachiburumutiya.

¹⁴Ndipo uŵenge wakutumbikika; pakuti ŵalive chakuwerezgiyapo kwako: chifukwa kuwerezgekiyenge kwaku iwe mu chiyuka cha ŵarunji.”

¹⁵Ndipo wanguti wavwa vyenivi yumoza wa ŵakujariya pamoza nayo, wangunena nayo, “Ngwamwaŵi yose yo wamkurgha chiŵande mu ufumu waku Chiuta.”

¹⁶Kweni iyo wanguti kwake, “Munthu yumoza wanguchita njonesku yikuru; ndipo wangudana ŵanandi:

¹⁷ndipo wangutumizga muŵanda wake pa ora la dghera kwachinene wakudanika wo, ‘Zani; pakuti vinthu vyarongosoleka kali.’

¹⁸Ndipo ŵangwamba wose ndi mtima umoza kujipandiriya. Wakudanga wangumunene, ‘Ndagula munda, ndipo ndikhumba kuruta kwachiuwona; ndikupempha, uŵe nane wakupandiriskika.’

¹⁹Ndipo munyake wanguti, ‘Ndagula vipingu vinkhonde vya ng'ombe, ndipo ndiruta kwachivyesa: ndikupempha, uŵe nane wakupandiriskika.’

²⁰Ndipo munyake wanguti, ‘Ndato munthukazi, ndipo chifukwa chenichi kuti ndiziŵa kuza cha.’

²¹Ndipo muŵanda yo wanguza, ndipo wangutauliya mbuyake vinthu vyenivi. Sono mweninyumba, wakutundiya, wangumunene muŵanda wake, ‘Tuliya ruŵi ku miseu ndi nthowa zamu muzi, ndipo katore muno ŵakavu ndi ŵakupunduka ndi ŵachiburumutiya ndi ŵakuganthiya.’

²²Ndipo muŵanda yo wanguti, ‘Mbuya, chachitika cho mungulangula, kweni ghachalipo malo.’

²³Ndipo mbuya yo wangumunene muŵanda, ‘Tuliya ruŵi ku miseu ndi zinthowa, ndi ŵachichizgeni kusere, alinga kuti yizazike nyumba yangu.

²⁴Chifukwa ndikuneniyani, kuti palive yumoza wa ŵanthurumi ŵakudanika ŵa wesengepo dghera langu.’ ”

²⁵Ndipo yarutanga nayo mizinda yikuru: ndipo wangung'anamuka ndi wanguti kwaku yo,

²⁶“Asani yumoza watuza kwaku ine, ndi kuti watinkha cha wiske waku yija, ndi nyina, ndi muwoli, ndi ŵana, ndi ŵabali, ndi ŵazichi, ndi so umoyo waku yija nawo, kuti wangaziŵa cha kuŵa msambizi wangu.

²⁷Yose yo wareka kunyamuwa mphinjika yake, ndi kuza kuvuli kwangu, kuti waziŵa cha kuŵa msambizi wangu.

²⁸Chifukwa njani waku imwe, wakukhumba kuzenga sonjo wareka danga kuja pasi ndi kupima mtengu, asani we nazo zakumufiskiya?

²⁹Vinu akhumba, wati waŵika chiŵanja chake, ndi walive nthazi kwachifiska, wose ŵakulereska ŵangamba kumtoza,

³⁰ŵakuti, ‘Uyu munthu wangwamba kuzenga nyumba, ndi wengavi nthazi zakufiskiya.’

³¹Pamwenga karonga njani, wakuruta kwachipong'ana ndi karonga munyake mu homwa, wareka danga kuja pasi ndi kukhoma upu asani ngwanthazi ndi vikwi chumi kwachikumana ndi yo watuza kwake ndi vikwi machumi ghaŵi?

³²Pamwenga napo po weche kutari iyo, watuma nthumi, kwachifumba chisopana cha chimangu?

³³Viyo ndimo yose mwaku imwe yo wareka kujipatiya vyose vyo wenavyo, kuti wangaziŵa cha kuŵa msambizi wangu.

³⁴“Mche ngwamampha: kweni asani mche ungataya mruvu, usamukenge ndi chine?

³⁵Chingana nkhu charu chingana nkhu chiza kuti ngwakwenere cha; ŵawutaya kubwaro. Yo we ndi makutu kuvwa, wavwe.”