Read gitonga Luka 15 Bible Online

Luka 15 - gitonga bible

Luka 15

¹Ndipo ŵaŵandikiyanga kwaku iyo wose ŵamthulu ndi ŵalakwi, kumuvwa.

²Ndipo ŵadinginikanga ŵaFarisi nawo ndi wo ŵalembi ŵakuti, “Uyu waronde walakwi, ndipo waturgha nawo.”

³Ndipo wangukamba nawo ntharika yeniyi,

⁴wakuti, “Munthu njani mwaku imwe, yo we nazo mberere machumi pe chumi, ndi wataya yimoza yaku zo, wareka kusiya machumi ghankhonde ndi ghanayi pachanya nkhonde ndi zinayi mubozwa ndi kuruta pavuli pa yakutayika yo, mpaka wangayibowozga?

⁵Ndipo wachiyibowozga, wayiŵika pa maphwewa ghake, wakukondwere.

⁶Ndipo wati waza kwake, waŵadaniya pamoza ŵabali ŵake ndi ŵanase, wakuŵanene, ‘Kondwereni pamoza nane, pakuti ndabowozga mberere yangu yakutayika yo.’

⁷Ndikuneniyani, kuti viyo ndimo kuŵiyenge chimwemwe kuchanya pa mlakwe yumoza waking'anamuka, kwakuruska pa ŵarunji machumi ghankhonde ndi ghanayi pachanya ŵankhonde ndi ŵanayi, ŵeniwo ŵalivi msowu wa chipe.

⁸“Pamwenga njani munthukazi wakuŵa ndi ndrama chumi, yo asani wangataya ndrama yimoza, wareka kukozga limbuni, ndi kupeya nyumba yo, ndi kupenja wenguwengu, mpaka wangayibowozga?

⁹Ndipo wati wayibowozga wadaniya pamoza ŵabali ŵake ndi ŵananse, wakuti, ‘Kondwereni pamoza nane, pakuti ndabowozga ndrama yeniyo ndingutaya.’

¹⁰Viyo ndimo, ndikuneniyani, kutuŵa chimwemwe pa maso gha ŵangelo ŵaku Chiuta pa mlakwi yumoza wakung'anamuka.”

¹¹Ndipo wanguti, “Munthu yumoza wanguŵa nawo ŵana ŵaŵi:

¹²ndipo mumanaku waku wo wanguti ku wiske, ‘Ada, ndipaskeni chigaŵa cha chuma chakundiwiya.’ Ndipo iyo wanguŵagaŵiya chuma chake.

¹³Ndipo pavuli pa mazuŵa ghanandi cha mwana yo mu manaku, wanguti waunjika vyose, wanguruta ku charu chakutari, ndipo kwenikuwa wanguparghang'a chuma chake, wakujariya kwautayisi.

¹⁴Ndipo wanguti wamara vyake vyose, kunguwa nja yikuru mu charu chiya; ndipo iyo wangwamba kukavuka.

¹⁵Ndipo wangwachijibatika ku yumoza wa ŵamzinda ŵa charu chiya; ndipo wangumtuma ku masara ghake kuliska nguruŵi.

¹⁶Ndipo wakhumbanga kugutiskika ndi maugwemba ghenigho zarghanga nguruŵi: ndipo pengavi yumoza wapaskanga kwaku iyo.

¹⁷Ndipo wanguti wajiwezga mu mtima watinge, ‘Wamphotu ŵaringa ŵa ŵada ŵafurwa ndi vyaukurgha vinandi, ndipo ine panu ndiyowa ndi nja.

¹⁸Nkhasokanga, ndikenge ku ŵada; ndipo ndinenenge nawo, Ada, ndalakwiya kuchanya ndi pa maso pinu:

¹⁹Kuti ndeche wakwenere cha kutamulika mwana winu: ndichiteni nge njumoza wa ŵamphotu ŵinu.’

²⁰Ndipo wangusoka, wanguza ku wiske. Kweni weche kutari iyo, wiske wangumwona, ndi wanguzazika ndi chitima, ndipo wakuchimbiya wanguwa pa khosi lake, ndi wangufyofyontha.

²¹Ndipo mwana yo wangumunene, ‘Ada, ndalakwiya kuchanya ndi mu maso ghinu: kuti ndeche wakwenere cha kutamulika mwana winu.’

²²Kweni wiske wanguŵanene ŵaŵanda ŵake, ‘Ruŵi tonipo munjirira wakuruska, ndi mvwalikeni; ndipo ŵikani ndandati pa janja lake, ndi viyatu pa marundi ghake;

²³ndipo toni tholi lakututuŵa, kabayeni, ndipo tirghe, tikondwenge:

²⁴pakuti uyu mwana wangu wenga wakufwa, ndipo wawere ku umoyo; wenga wakutayika, ndipo wabowozgeka.’ Ndipo ŵangwamba kukondwere.

²⁵“Kweni mwana wake mura wenga mu munda: ndipo wachiza ndi kuŵandika ku nyumba yo, wanguvwa kumba ndi kuvina.

²⁶Ndipo wangudana yumoza wa ŵaŵanda, ndipo wangumfumba vingaŵa vine vyenivyo.

²⁷Ndipo iyo wangumunene, ‘Mhurwa wako wafika; ndipo usu wabaya thole lakututuŵa pakuti wamronde wamoyo.’

²⁸Kweni wangudunda iyo ndipo kuti wakhumbanga kusere cha: ndipo wiske wangutuwa, ndipo wangumuŵeyere.

²⁹Kweni iyo wangwamuka, wangunene awiske, ‘Awonani, virimika vinandi vyo ndateŵete imwe, ndipo kuti ndajumphapo dangu linu cha: ndipo kwaku ine kuti mungupaska kamberere cha, alalinga kuti ndikondwere pamoza ndi ŵabwezi ŵangu.

³⁰Kweni penipo waza mwana winu uyu, yo warghapo chuma chinu pamoza ndi ŵayaya, mwabayiya iyo thole lakututuŵa.’

³¹Ndipo wiske wanguti kwaku yo, ‘Wamwana, iwe rutaruta we pamoza nane, ndipo vyose vyangu vyako.

³²Kweni kungwenere kukondwere ndi kumwemwete: pakuti uyu mhurwa wako wenga wakufwa, ndipo wawere mu umoyo; wenga wakutayika, ndipo wabowozgeka.’ ”