Read gitonga Luka 8 Bible Online

Luka 8 - gitonga bible

Luka 8

¹Ndipo jepu kamanavi pavuli po kunguŵa kuti wadumuwanga mu msumba ndi mu muzi, wakumemeza ndi wakugozga ufumu waku Chiuta, ndi pamoza nayo chumi ndi ŵaŵi wo,

²ndi ŵanthukazi ŵanyake wo ŵanguchizgika ku mizimu yiheni ndi matenda, Mariya yo wangutamulika Magdala, mwaku mweniyo ŵademone ŵankhonde ndi ŵaŵi ŵangutuwa,

³ndi Yoana, muwoli waku Khuza, kapitau waku Herode, ndi Susana, ndi ŵanyake ŵanandi, ŵeniwo ŵamteŵetiyanga ndi chuma chawo.

⁴Ndipo uchiwungana mzinda ukuru, ndipo ŵachika kwaku iyo ŵamu muzi ndi muzi, wangukambiya mu ntharika:

⁵“Wakumija wangutuliya kwachimija mbeu yake; ndipo mu kumija kwake yinyake yinguwa mu mphepete mu nthowa; ndipo yinguphwatika, ndi tiyuni twa kuchanya tungurgha.

⁶Ndipo yinyake yinguwa pa jarawe; ndipo yati yame yingufota, chifukwa cha kuŵavi mzizi.

⁷Ndipo yinyake yinguwa mukati mu minga; ndipo minga yo yingumere pamoza nayo, ndipo yinguyifinyirizga.

⁸Ndipo yinyake yinguwa pa charu chamampha, ndipo yati yame yingupasa vipasi machumi pe chumi.” Wachikamba vyenivi wangukambura, “Wakuŵa ndi makutu kuvwa, wavwe.”

⁹Ndipo ŵasambizi ŵake ŵangumfumba yingaŵa yine ntharika yeniyi.

¹⁰Ndipo iyo wanguti, “Kwaku imwe kwapaskika muziŵa mangari gha ufumu waku Chiuta: kweni ku ŵanyake uneneka mu zintharika, alinga kuti pakulereska ŵangawona cha, ndi pakuvwa ŵangaŵamo cha.

¹¹“Kweni ntharika yo ndi iyi: Mbeu ndi mazu ghaku Chiuta.

¹²Ndipo zo zamu mphepete mu nthowa mbeniwo ŵavwa; sono watuza diabolo yo, ndi wapoka mazu ku mtima wawo alinga kuti ŵangavwana ndi kutaskika cha.

¹³Ndipo zo zapa jarawe ndi wo penipo ŵavwa ŵaronde mazu ndi chimwemwe; ndipo ŵeniwo ŵalive nkhorozo, wo kwa kanyengo ŵavwana, ndi mu nyengo ya kesedu ŵadezukako.

¹⁴Ndipo yo yakuwa mukati mu minga, mbeniwo ŵavwa, ndipo ŵachiruta ŵafinyirizgika ndi malikweŵeska ndi mausambasi ndi malikondwa gha umoyo, ndi kuti ŵafiska cha.

¹⁵Ndipo yo yamu charu cheneko mbeniwo wose pakuvwa mazu, ŵatighakoreska mu mtima uneneska ndi wamampha, ndi ŵapasa vipasi ndi chisisi.

¹⁶“Ndipo palive munthu, wachikozga nyali, wayivunikiriya ndi chiyaŵi, chingana nkhuti wayiŵika kusi ku chita, kweni wayiŵika pa chikoleru, mwakuti ŵakuseremo ŵawone ukweru wo.

¹⁷Chifukwa palive kakubisika ko karekenge kuwoneka; chingana nkhachibisibisi ko karekenge kuziŵikwa ndi kuburika ku ukweru.

¹⁸Viyo lereni mo muvwiya; chifukwa yose yo wenako kupaskikenge kwaku iyo, ndipo yose yo walive, kwaku iyo kapokekenge keniko wajipimiya kuŵa nako.”

¹⁹Ndipo kunguza kwaku iyo anyina ndi ŵabali ŵake, ndipo kuti ŵanguziŵa cha kufikako kwake chifukwa cha mzinda wo.

²⁰Ndipo kungukambika kwaku iyo, “Anyoko ndi ŵabali ŵako ŵatuma kubwaro, ŵakhumba kukuwona.”

²¹Kweni iyo wakwamuka wanguti kwaku wo, “Ama ndi ŵabali ŵangu mbenaŵa ŵakuvwa ndi ŵakuchita mazu ghaku Chiuta.”

²²Ndipo kunguŵa pa limoza la mazuŵa gho, wanguseremu mu chombo, mweneko ndi ŵasambizi ŵake; ndipo wanguŵanene, “Tambukiye ku sirgha linyake la nyanja;” ndipo ŵangusoro.

²³Ndipo ŵachenda iwo, wangura tulo. Ndipo lingusikiya pa nyanja liringa la mphepu; ndipo chombo chazazikanga ndi maji, ndipo ŵenga mu urwani.

²⁴Ndipo ŵangumyuska, ŵakuti, “Ambuya, Ambuya, tiyowa.” Ndipo wanguyuka, wanguchenya mphepu yo ndi kuwuruma kwa maji: ndipo vingureka, ndi linguŵapo bata,

²⁵ndipo wanguti kwaku wo, “Che pani chivwanu chinu?” Ndipo ŵangopa ndi kurwita, ŵakunenerana, “Njani munthu uyu walanguliya mphepu ndi maji, ndi vitumviya?”

²⁶Ndipo ŵangupaukiya ku charu cha Gerasa, cho chiratana ndi Galile.

²⁷Ndipo wachizuukiya pa mtunda, wangukumana nayo munthurumi ngana wamumuzi, yo waŵanga ndi ŵademone; ndipo kwa nyengo yitali kuti wavwaranga chivwaru cha, chingana nkhuti wajanga mu nyumba cha kweni mu masanu.

²⁸Ndipo pakuwona Yesu, wangukambura ndi wanguwa paurongo pake, ndipo ndi mazu ghakuru wanguti, “Ndendi chine ndi imwe, Yesu, Mwana waku Chiuta Wamdengwendi? Ndikuŵeyereni, mungandisuzganga.”

²⁹Chifukwa wanguulanguliya mzimu wawiyu kutuwamu mu munthu yo. Chifukwa nyengo zinandi wamkonga; ndipo wangulindika, ndipo wamangikanga ndi maunyoru ndi magweregwedi ndipo wadomonga vimangiru, ndi wagumizgikanga ndi demone ku mabozwa.

³⁰Ndipo Yesu wangumfumba kuti, “Ndine zina lako?” Ndipo iyo wanguti, “Liŵanja,” pakuti ŵademone ŵanandi ŵanguseremo mwake.

³¹Ndipo ŵampemphanga kuti wangaŵalanguliya cha kuruta ku ndimba yo.

³²Ndipo kwengako mskambu wa nguruŵi zinandi wo warghanga pa phiri; ndipo ŵampemphanga kuti waŵazomerezge kuseremu mwaku zo. Ndipo wanguŵazomerezga.

³³Ndipo ŵademone ŵangutuwa mu munthu, ndipo ŵangusere mu nguruŵi zo; ndipo mskambu ungungungunthiya kusi ku sendemu ku nyanja, ndipo ungufwa.

³⁴Kweni ŵachiwona ŵaliska cho chinguŵapo ŵanguthaŵa, ndi ŵangwachitauliya mu muzi ndi mu maulimi.

³⁵Ndipo ŵangutuliya kwachiwona chakuŵapo cho ndipo ŵanguza kwaku Yesu, ndipo ŵangumsaniya munthu mwaku mweniyo ŵademone ŵangutuwa, wakuja pasi, wakuvwara ndi wavinjeru, pa marwayo ghaku Yesu; ndipo ŵangopa.

³⁶Kweni ŵakuchiwona ŵanguŵanene mo wakukoleka ndi ŵademone wanguchizgikiya.

³⁷Ndipo urapasi wose wa charu chakuzunguliya cha ŵaGerasa ungumuŵeyere kutuwako kwawo; pakuti ŵangukoleka ndi chopu chikuru: ndipo wangusere mu chombo, ndi wanguwe.

³⁸Kweni yo munthu mwaku mweniyo ŵangutuwa ŵademone wo, wangumuŵeyere kuŵa pamoza nayo; kweni wangumtuma, wakuti,

³⁹“Were ku nyumba yako, ndi konkhoska vyenivikuru vyo Chiuta wakuchitiya.” Ndipo wanguruta, wakumemeza mu mzinda wose vyo Yesu wangumchitiya.

⁴⁰Ndipo wachiwe Yesu, chingumjekuliya chiuru cho; chifukwa wose ŵamlindizganga.

⁴¹Ndipo wonani, kunguza munthu, zina lake Yairo, mweniyo wenga mura wa sinagoge, ndipo wangujikama pasi pa marundi ghaku Yesu, wamuŵeyerenga kusere mu nyumba yake;

⁴²pakuti wenga nayo mwanamunthukazi, yumoza pe, akhumba wa virimika chumi ndi viŵi, ndipo iyo waziririkanga. Ndipo po warutanga mizinda yo yamfinyirizganga.

⁴³Ndipo munthukazi, wakuŵa ndi chisuruwa ndopa virimika chumi ndi viŵi, mweniyo wangumariyapo pa zing'anga umoyo wake wose, ndi kuti wanguziŵa kuchizgika ndi yimoza cha,

⁴⁴wanguza kuvuli ndi wangukwaska mphonji ya munjirira wake: ndipo sosonukweni chingukamuka chisuruwa cha ndopa zake.

⁴⁵Ndipo Yesu wanguti, “Njani yo wandikwaska?” Ndipo ŵachikana wose, Petro wanguti, ndi ŵapamoza nayo, “Ambuya, mizinda yitikunyekezgani ndi yitumfinyirizgani.”

⁴⁶Kweni Yesu wanguti, “Yumoza wangundikwaska chifukwa ine ndiziŵa nthazi yatuwa mwangu.”

⁴⁷Ndipo munthukazi yo, wachiwona kuti wengavi kubisika, wanguza wakutenthema, ndipo wakumlambiya wangumkonkhome paurongo pa khamu lose pa chifukwa chenicho wangumkwaskiya, ndi mo wanguchizgikiya sosonukweni.

⁴⁸Ndipo wanguti kwaku iyo, “Mwanamunthukazi, chivwanu chako chakutaska: ruta mu chimangu.”

⁴⁹Wacharongoro iyo, watuza yumoza wa kwaku yo mura wa sinagoge, wakuti, “Wafwa mwanamunthukazi wako; ungamusuzganga cha Msambizgi.”

⁵⁰Mweni wachivwa Yesu, wangumwamuka, “Ungopanga: vwanangaŵaka, wachizgikenge.”

⁵¹Ndipo wachiza ku nyumba, kuti wanguzomerezga yumoza kusere pamoza nayo cha, kweni Petro ndi Yohane, ndi Yakobe, ndi wiske wa mwana yo ndi nyina.

⁵²Ndipo wose ŵaliyanga ndi ŵamtenjerenga: kweni iyo wanguti, “Mungaliyanga cha; chifukwa kuti wafwa cha, kweni wara.”

⁵³Ndipo ŵangumseka, pakuziŵa kuti wafwa.

⁵⁴Kweni iyo, pakumko janja, wangudana, wakuti, “Msungwana, yuka.”

⁵⁵Ndipo mzimu wake unguweremo, ndipo wanguyuka sosonukweni: ndipo wangulangula kuti ŵampaske kurgha.

⁵⁶Ndipo ŵapapi ŵake ŵanguzizwa: kweni wanguŵalanguliya kunene yumoza cha cho chinguŵapo.