Read gitonga Marangu 10 Bible Online

Marangu 10 - gitonga bible

Marangu 10

¹“Pa nyengo yiya Ambuya anguti kwaku ine, ‘Sema mya yiŵi ya vipapate, nge vyakudanga, ndipo ukwere kwaku ine mu phiri ndi upange bokosi la muti.

²Ndipo ndirembenge pa mya ya vipapate mazu gho ghenga pa mya yakudanga yo unguswa, ndipo uyoŵikenge mu bokosi?’

³Viyo ndingupanga bokosi la muti wa mtangatanga, ndipo ndingusema mya yiŵi ya vipapate vyakuyana ndi vyakudanga, ndipo ndingukwera mu phiri ndi mya yiŵi mu janja langu.

⁴Ambuya angulemba pa mya, marembu ghakuyana ndi ghakudanga, marangu chumi ghenigho Ambuya angulangula kwaku imwe mu phiri kutuwiya mukati mu moto, mu zuŵa la ungano, Ambuya angundipaska ghenigho.

⁵Ndipo ndingung'anamuka ndi kusika mu phiri ndi kuŵika mya ya vipapate yo ndingupanga mu bokosi, ndipo ye mwenimo kwakuyana nge ndimo Ambuya angundilanguliya.”

⁶(ŴaYisraele ŵangwenda ulendo wawo kutuliya pa Beroto Benejakana kufika pa Mosera. Penipo Aroni wangufwa ndi wanguŵikika penipa, ndipo mwana wake Eleazara wanguchita mlimu wa uzukuru mu malo ghake.

⁷Kutuliya penipo ŵangwenda ulendo kufika ku Godegoda, ndi ŵangutuma pa Gudegoda ŵangufika pa Yotobata charu cha misinji ya maji.

⁸Pa nyengo yiya Ambuya angupatuwa fuku laku Levi kupinga bokosi la phanganu la Ambuya kuma pa nthazi pa Ambuya kumuteŵete, ndi kutumbika zina lake mpaka zuŵa lino.

⁹Chifukwa ichi MuLevi walivi chigaŵa chingana nchihara pamoza ndi ŵabali ŵake. Ambuya ndiwo chihara chake, kwakulingana ndimo Ambuya Chiuta winu wangumunene.)

¹⁰“Ndinguja mu phiri kwakulingana ndi nyengo yakudanga, mazuŵa machumi ghanayi (40) ndi mausiku machumi ghanayi (40) ndipo Ambuya angundivwa pa nyengo yiya napo viyo. Ambuya kuti akhumbanga kumupasuwani cha.

¹¹Ndipo Ambuya anguti kwaku ine, ‘Soka rutanga pa lwendo laku paurongo pa ŵanthu kuti ukasere mu charu cho ndingurapiya auskemwe kuŵapaska.’

¹²“Ndipo sono ŵaYisraele mwe, cho Ambuya Chiuta winu wakhumba kwaku imwe nkhopa Ambuya Chiuta winu kwenda mu nthowa zake zose, kumwanja, kuteŵete Ambuya Chiuta winu ndi mtima winu wose, ndi umoyo winu wose,

¹³ndi kusunga marangu ndi visambizgu vya Ambuya, vyo ndimulanguliyani zuŵa lino, kuti kumuŵiyeni umampha.

¹⁴Nadi machanya gha kuchanya, charu chapasi ndi vyose vyo vye mwenimo ndi vyo vya Ambuya Chiuta winu.

¹⁵Ndipuuli, Ambuya angukondwa ndi kuŵanja auskemwe ndipo Ambuya angusankha mphapu yawo ya pavuli pawo, imwe muruska ŵanthu ŵanyake wose, mpaka zuŵa lino.

¹⁶Viyo dumuwani khungu laku mitima yinu, ndipo so mureke kuŵa so ŵanonono mu mitima.

¹⁷Pakuti Ambuya Chiuta winu ndi Chiuta wakuruska ndi Ambuya mweneko waku vyose, mukuru, wanthazi, ndi Chiuta wakofya. Kuti walereska chisku cha munthu cha pamwenga kuronda vinda.

¹⁸Wafiska umampha cheruzgu cha wambura wiske ndi choko. Watanja mlendo wamupaska kurgha ndi vyakuvwala.

¹⁹Viyo mwanje mlendo, pakuti imwe namwe mwenga ŵalendo mu Egipiti

²⁰Mopenge Ambuya Chiuta winu, mukamuteŵetiyanga ndi kumusiya cha, ndi kurapa pa zina lake.

²¹Ndiyo unkhankhu winu, ndiyo Chiuta winu, mweniyo wamuchitiyani vinthu vikuru ndi vyakofya, vyo maso ghinu ghawona.

²²Auskemwe auguzikiya ku Egipiti, ŵanthu machumi ghankhonde ndi ghaŵi (70), ndipo sono Ambuya chiuta winu wakwandaniskani nge ndi nyenyezi za kuchanya.