Read gitonga Marangu 14 Bible Online

Marangu 14 - gitonga bible

Marangu 14

¹“Ndimwe ŵana ŵa Ambuya Chiuta winu, mungajitemanga, pamwenga kumeta mupara pa maso pinu chifukwa cha ŵakufwa.

²Pakuti imwe mwe ŵanthu ŵakupaturika ku Ambuya Chiuta winu, ndipo Ambuya amusankhani kuŵa ŵanthu ŵa chihara chawo, mu ŵanthu wose wo ŵemu charu.

³“Kuti mungarghanga kanthu ka munguzgu cha.

⁴Nyama zo murghenge ndi izi: ng'ombe, mberere, mbuzi,

⁵nkhonza, mphala, nyiska, chinkhoma, mbuzi yamu mapiri,[3] chirembwe, ndi mberere yamu mapiri,[4]

⁶Nyama yose yo njakupatukana chikandilu, yakupatukana kulongo njoŵi ziŵi, yakusumbiya, ndiyo murghenge.

⁷Kweni paku zo zisumbiya, pamwenga zakupatukana chikandilu zo mungarghanga cha ndi izi: gamila, kalulu, ndi mbila, chifukwa zisumbiya kweni chikandilu chawo nchakupatukana cha, ndizo za munguzgu kwaku imwe.

⁸Nkhumba, chingana chikandilu chake chipatukana kweni yisumbiya uteka cha, njamunguzgu kwaku imwe. Mungarghanga nyama yake, ndi mungakonga nanga ndi nyama yake cha.

⁹“Mu vyamu maji murghenge chose cho che ndi chiphephe ndi mamba murghenge.

¹⁰Ndipo chose cho chilivi chiphephe ndi mamba, mungarghanga cha nchamunguzgu kwaku imwe.

¹¹“Viyuni vyambura munguzgu murghenge.

¹²Kweni ivi ndivyo mureke kurgha: nombo, munkhuŵi, nkhwazi,

¹³kamtema, kabaŵi, ndi mitundu yake yose.

¹⁴Chaholi ndi mtundu wake wose,

¹⁵ostirichi, kabaŵi wa usiku, kakoŵa ndi mitundu yake yose.

¹⁶Phululu ndi manchichi, ndi sekwe.

¹⁷Ngalo, chimphanga, njoyo, kasidi, kataŵa ndi mitundu yawo yose.

¹⁸Nkhuruwara, ndi kasusa.

¹⁹Ndipo vizimu vyamapapa vyose vya munguzgu kwaku imwe, vingarghikanga cha.

²⁰Vyose vyambura munguzgu murghenge.

²¹“Mungarghanga cha kanthu kose ko kafwa kija. Mukapaske ku mlendo yo wemu mizi yinu, kuti warghe, pamwenga muguliske ku ŵalendo; pakuti imwe ndimwe ŵanthu ŵakupaturika ku Ambuya Chiuta winu. Mungabikanga mwana wa mbuzi mu mkaka wa nyina.

²²“Muperekenge chachichumi cha vipambi vya mbeu yinu vyenivyo vituwa mu munda, virimika vyose.

²³Ndipo murghe panthazi pa Ambuya Chiuta winu mu malo ghenigho ŵakasankhanga ndi kuŵikamu zina lake. Mukarghanga chachichumi cha trigu winu, cha vinyo winu, ndi cha mafuta ghinu, ndi ŵana ŵakudanga ŵa ng'ombe zinu, mberere, ndi mbuzi; kuti musambire kopa Ambuya Chiuta winu mazuŵa ghose.

²⁴Ndipo asani nthowa njitali chifukwa malo ghekutali ndi imwe ghenigho Ambuya Chiuta winu wasankha kuŵikamo zina lake, viyo kuti mutondeka kuza ndi vyachichumi vyo Ambuya Chiuta winu wamupaskani.

²⁵Iku muvisinthiske ndi ndrama ndipo muzivunge ndrama mu janja linu. Rutani nazo ku malo ghenigho Ambuya Chiuta winu wasankha,

²⁶ndipo mugule ndi ndrama zo chose cho munweka ng'ombe; pamwenga mberere, pamwenga vinyo, pamwenga chakumwa cha nthazi pamwenga chose chinyake cho mukhumba, ndipo mukavirghiyanga kwenikuwa panthazi pa Ambuya Chiuta winu. Mukondwe, imwe ndi ŵamunyumba zinu wose,

²⁷ndi muLevi yo wemu muzi winu mungamutayanga cha, pakuti walivi chigaŵa chingana nchihara pamoza namwe.

²⁸“Pa umari wa chirimika chose cha chitatu mukazanga navyo vyachichumi vyose vya mbeu yinu chirimika chenicho, ndikuviŵika umampha mukati mwa mizi yinu,

²⁹ndipo muLevi, chifukwa walivi chigaŵa pamwenga chihara pamoza namwe, ndi mlendo ndi mranda wambura wiske, ndi choko wo ŵemu mizi yinu, ŵazirghenge ndi kuguta, mwakuti Ambuya Chiuta winu wamutumbikeni mu mlimu wose wa manja ghinu wo muchita.