Read gitonga Marangu 24 Bible Online

Marangu 24 - gitonga bible

Marangu 24

¹“Penipo munthurumi wato munthukazi kuŵa muwoli wake, ndipo kuti watimuphwere cha, chifukwa chakureka kusaniyamo kamampha mwake, iku wamurembe kalata wachipata ndi kupereka mu janja lake, ndi wamudikiskemo mu nyumba yake.

²Ndipo asani munthukazi yo waruta ndi watachiŵa muwoli wa munthurumi munyake,

³ndipo munthurumi yuwa wa pavuli watimutinkha ndi watimurembe kalata wachipata ndi kupereka kalata yo mu janja lake ndi watimudikiskamo mu nyumba yake, pamwenga asani munthurumi wa pavuli wafwa, mweniyo wangumuto kuŵa muwoli wake,

⁴sono murumi wake wakudanga, mweniyo wangumudikiska, wangamutonga so cha kuŵa muwoli wake, pavuli penipo wafipiskika. Pakati Ambuya Chiuta winu watinkha cha viyo, ndipo kuti mukatoliyanga kususkika pa charu chenicho Ambuya Chiuta winu wakupaskani kuŵa chihara cha.

⁵“Penipo munthurumi wato sono, kuti wakarutanga pamoza ndi liŵanja la nkhondo cha, pamwenga kudanika kuŵa ndi nthangwanika yinyake, wakaŵanga mwanangwa pa muzi wake chirimika chimoza, kukondwa ndi muwoli wake mweniyo wato.

⁶“Paulevi munthu yumoza yo wakatonga mphe pamwenga chakupele kuchita chikoli, pakuti wakatuzgangamo umoyo mu chikoli.

⁷“Asani munthu wasanirika wachiba yumoza wa ŵabali ŵake, ŵanthu ŵaku Yisraele, ndipo asani watumuko kuŵa muŵanda pamwenga watimuguliska, sono yuwa munkhungu watenere kufwa. Viyo mukapeyangamo uheni mukati mwinu.

⁸“Asani munthu watama ndi makhate, phwereni kuchita kwakuyana ndi vyose vyenivyo ŵazukuru ŵaLevi ŵakamurongoninga. Muchitenge ndi kuphwere.

⁹Kumbukani chenicho Ambuya Chiuta winu wanguchitiya Miriamu pa mwatuwanga mu Egipiti.

¹⁰“Muchikongoleska muzengezgani winu ke kose, kuti muserenge mu nyumba yake cha kwachitomo chikoli.

¹¹Mumenge kubwaro, ndipo yo munthu mukongoleska watuzgenge chikoli kuza nacho kwaku imwe.

¹²Ndipo asani ngwakusauka, kuti musungiyenge limu chikoli chake cha,

¹³lichisere dazi, mukamuwezgiganga chikoli cho alinga kuti wagone mu chivwinkhu chake ndi kumutumbikani, viyo mukakongolekanga paurongo pa Ambuya Chiuta winu.

¹⁴“Mungayuzganga mteŵeti wakurembereka mweniyo ndi mukavu ndi musauchi, manyi njumoza wa ŵabali ŵinu pamwenga yumoza wa ŵalendo ŵeniwo ŵemu charu chinu mukati mu mizi yinu.

¹⁵Mukamupaskanga mphoto yake pa zuŵa lenilo wamaliya kuteŵeta, dazi lenga lindasere (pakuti ngwakusauka, ndipo wakhumba malipiro), vinu wangakuliriyani ku Ambuya, ndipo mungachita uheni.

¹⁶“Ŵangabayikanga cha auskeu chifukwa cha uheni wa ŵana, chingana nkhuti ŵana ŵabayikenge chifukwa cha uheni wa auskeu; munthu we yose wabaikenge chifukwa cha uheni wa mweneko yija.

¹⁷“Mungatimbanizganga cheruzgu chakurunjikiya mlendo pamwenga wamasiya, pamwenga kuto chivwalo cha choko kuŵa chikoli,

¹⁸kweni mukakumbukanga kuti imwe mwenga ŵaŵanda mu Egipiti, ndipo Ambuya Chiuta winu wangukuwomboni kutuwamo muwa, mwaku cho nditumulanguliyani kuchita ichi.

¹⁹“Muchivuna mbeu zinu mu minda yinu, ndipo mwaruwamo nchinda mu munda, mungawerengako cha kwachiyito, nchinda yo yikaŵanga ya mlendo, wamasiya, ndi choko, alinga kuti Ambuya Chiuta winu wakutumbikeni mu nchitu yose yinu.

²⁰Muchipuma miti yinu ya mafuta gha olivi, mungakonkhonga so cha mu mphanda zake, zikaŵanga za mlendo, wamasiya, ndi choko.

²¹Muchiwunjika vipasi vya munda winu wa mphereska, mungawerengamo pavuli kwachifufuntha, vipasi vyakujamo vikaŵanga vya mlendo, wamasiya, ndi choko.

²²Mukumbukenge kuti mwenga ŵaŵanda mu charu cha Egipiti, mwaku cho nditukulanguliyani kuchita ichi.