Read gitonga Marangu 25 Bible Online

Marangu 25 - gitonga bible

Marangu 25

¹“Asani pe suskanu pakati pa ŵanthurumi, ndipo ŵatuza ku bwaro la mirandu, ŵeruzgi ŵateruzga pakati pawo, kufwatuwa wambura kalema ndi kususka wakulakwa.

²Sono asani munthu wakulakwa watenere kupumika, mweruzgi walangulenge kuti wale pasi, pa maso pake ndi kupumika ndi mbumu zinandi kwakuyana ndi kulakwa kwake.

³Ŵamupumi mbumu machumi ghanayi (40) kweni kurutiya po cha. Asani ŵangarutiriya kumupuma mbumu zinyake izi, mubali wako wakayuyulikanga mumaso ghako.

⁴“Mungasunamiskanga ng'ombe yichiphwata pa mbeu.

⁵“Asani ŵabali ŵinu ŵaja pamoza ndipo yumoza wakuwo wafwapo walivi mwana munthurumi, muwoli wa wakufwa yo kuti wakaŵirwanga cha ku mlendo. Mwana munyake wa murumi wake wakamuharanga, ndi kumuto kuŵa muwoli wake, kuti wapapemo mwana.

⁶Ndipo mwana munthurumi wa kudanga mweniyo wapapenge wakaharanga zina la mwana munyake mweniyo wakufwa, alinga kuti zina lake lingazimwika cha mu Yisraele.

⁷Ndipo asani munthurumi yo kuti wakhumba kuto cha choko cha mwana munyake, sono choko cho chikayanga ku likomo ku ŵara, ndi kunena kuti, ‘Mbali wa murumi wangu wakana kurutizga zina la mbali wake mu Yisraele, wakana kuchita mlimu wa mbali wake murumi wangu.’

⁸Sono ŵara ŵa msumba wake ŵakamudananga, ndi kukamba nayo, ndipo asani wakana mbwenu, kuti, ‘Kuti ndikhumba kumuto cha,’

⁹sono choko cha mbali wake chiyenge kwaku iyo ndi kuzuwa viyato vyake ndi kumufunyiya mata pa chisku chake. Wamukenge ndi kuti, ‘Viyo ndimo kukachitikiyanga ku munthurumi mweniyo wareka kuzenga myumba ya mwanamunyake.’

¹⁰Ndipo ŵaYisraele ŵakadananga nyumba yake kuti, Nyumba yaku yo viyatu vyake vinguzuwika.

¹¹“Asani ŵanthurumi ŵabayana, ndipo muwoli wa yumoza wandere kutaska mrumi wake ku janja laku yo watumupuma, watambaruwa janja lake ndi kumuko kumoyo;

¹²sono mukadumuwanga janja la munthukazi yo. Mungachitanga lisungu cha.

¹³“Mungaŵikanga mu thumba linu myeso yakupambana uzitu, umoza ukuru ndi unyake umana.

¹⁴Mungaŵanga ndi mitundu yiŵi ya myeso mu nyumba yinu cha, umoza ukuru ndi unyake umana.

¹⁵Mweso wakufikapo ndi wakwene ndiwo muŵenge nawo, alinga kuti mazuŵa ghinu gharutiriyenge mu charu chenicho Ambuya Chiuta winu wakupaskani.

¹⁶Pakuti Ambuya Chiuta winu watinkha wose ŵakuchita vinthu vya viyo, wose ŵakuchita kwakupusika.

¹⁷“Kumbukani chenicho Amaleke wangumchitiyani pa nthowa muchituwamu Egipiti.

¹⁸Wangumuyukiyani pa nthowa, penipo mungulakatuka ndi kuvuka; ndi wangudumuwako wo ŵasweranga kuvuli kwinu, ndipo wengavi kopa Chiuta.

¹⁹Mwaku cho, penipo Ambuya Chiuta winu warekeska nkhondo ya ŵarwani wose ŵakumuzunguriyani; mu charu cho charu cho Ambuya Chiuta winu watukupaskani kuŵa chihara chinu, mukamarizge zina la Amaleke pa charu chapasi, mungaruwanga cha.