Read gitonga Marangu 30 Bible Online

Marangu 30 - gitonga bible

Marangu 30

¹“Ndipo penipo vinthu ivi vyose vituza paku imwe, thumbiko ndi thembo vyo ndiviŵika paurongo pinu, mukavikumbukanga mukati mu mitundu yose mwenimo Ambuya amudikiskiyani.

²Penipo mukawerenga ku Ambuya Chiuta winu, imwe ndi ŵana ŵinu, ndi kusunga mazu ghake mwaku chose cho nditumulanguliyani msana wale, ndi mtima winu wose ndi mzimu winu wose;

³penipo Ambuya Chiuta winu wakamuwezgiyaninga mwaŵi winu, wakamufwiyaninga lisungu, ndipo wakamuwunjikaninga so pamoza kutuwa ku ŵanthu wose kweniko Ambuya Chiuta winu wakuparghang'iyani.

⁴Nanga ŵakutayika ŵinu ŵemu malo ghatali ukongwa ghakuchanya, Ambuya Chiuta winu wakamuwunjikaninga kutuwa kwenikuwa, ndipo wakamuwezgiyaninga kwenikuwa.

⁵Ndipo Ambuya Chiuta winu wakamutoliyaninga mu charu cho auskemwe ŵajangamo kuŵa chawo, alinga kuti mujengemo imwe kuŵa chinu, ndipo wakamusakatiskaninga ukongwa ndi kumwandaniskani kwakuruska auskemwe.

⁶Ndipo Ambuya Chiuta winu wakachinjanga mtima winu ndi mtima wa mphapu yinu, alinga kuti mukanjanga Ambuya Chiuta winu ndi mtima winu wose, ndi mzimu winu wose, kuti muŵenge ŵamoyo.

⁷Ndipo Ambuya Chiuta winu wakaŵikanga matembo yagha pa ŵakumutinkhani ndi ŵakupindikana ŵinu wo ŵamusuzganinga.

⁸Ndipo muwerezgengepo kusunga mazu gha Ambuya, ndi kusunga marangu ghake gho nditumulanguliyani msana wale.

⁹Ambuya Chiuta winu wakamusakatiskaninga kwakuzara mu nchitu yose ya janja linu, mu chipasi cha liŵavu linu, ndi chipasi cha ng'ombe zinu, ndi mu chipasi cha minda yinu. Pakuti Ambuya akaŵikangapo so mtima pakumusakatiskani uli ndimo anguchitiya ndi auskemwe,

¹⁰asani mukavwiyanga mazu gha Ambuya Chiuta winu, kusunga malangulu ghake ndi visambizgu vyo vikurembeka mu buku ili la marangu, asani muwere ku Ambuya Chiuta winu ndi mtima winu wose ndi mzimu winu wose.

¹¹“Pakuti dangu ili lo nditumulanguliyani msana wale kuti ndinonono cha kwaku imwe, chingana nkhuti le kutali nako cha.

¹²Kuti le kuchanya cha, kuti mungakamba, ‘Njani wakatirutiyanga kuchanya, kwachititole lo kwaku ifwe, alinga kuti tilivwe ndi kulichita?’

¹³Chingana nkhuti le kusirgha la nyanja, lo munganena kuti, ‘Njani watambukiyenge kusirgha la nyanja kwachititole lo alinga kuti tilivwe ndi kulichita?’

¹⁴Kweni mazu ghe pafupi ukongwa ndi imwe, ghe mu mlomo winu ndi mu mtima winu, viyo kuti muziŵa kughachita.

¹⁵“Awonani, ndaŵika paurongo pinu msana wale umoyo ndi umampha, ndi nyifwa ndi uheni.

¹⁶Asani mukavwiyanga marangu gha Ambuya Chiuta winu, gho nditumulanguliyani msana wale pakwanja Ambuya Chiuta winu, pakwenda mu nthowa zake ndi pakusunga marangu ghake ndi visambizgu vyake, ndi vyeruzgu vyake, po ndipo mukajanga ŵamoyo, ndi mwandanenge. Ndipo Ambuya Chiuta winu wakamutumbikaninga mu charu chomukaserengamo kwachichironda kuŵa chinu.

¹⁷Kweni asani mtima winu upatukako, ndi kuti mukavwanga cha, kweni mukarandizgikanga kwachisopa ŵachiuta ŵanyake ndi kuŵateŵete,

¹⁸nditumuziŵiskani msana wale kuti mukamaranga. Kuti mukajangamo nyengo yitali cha mu charu cho mwamusere ndi kuchironda kuŵa chinu mutakuti mwambuka Yordane.

¹⁹Ndidanirizga kuchanya ndi charu chapasi kuchita ukaboni paku imwe msana wale, kuti ine ndiŵika paurongo pinu umoyo ndi nyifwa, thumbiko ndi thembo. Chifukwa cho sankhanipo umoyo alinga kuti imwe ndi mphapu zinu mujenge ŵamoyo,

²⁰pa kwanja Ambuya Chiuta winu, pa kuvwiya mazu ghake, ndi kumeremete kwaku iyo. Pakuti kachitidu kaviyo, kang'anamuwa umoyo kwaku imwe ndi unandi wa mazuŵa alinga kuti mujenge mu charu cho Ambuya angurapiya auskemwe, kwaku Abrahamu, Yisaki, ndi Yakobe kuŵapaska.”