Read gitonga Marangu 5 Bible Online

Marangu 5 - gitonga bible

Marangu 5

¹Mosese wangudana ŵaYisraele wose, wanguti kwaku iwo, “Vwani, Yisraele, visambizgu ndi vyeruzgu vyo ndikamba kwaku imwe zuŵa lino, mukavisambiranga ndi muŵe ŵakuphwere pakuvichita.

²Ambuyafwe Chiuta widu wanguchita phanganu ndi ifwe mu Horebe.

³Ambuya kuti anguchita phanganu ili ndi auskefwe cha, kweni ndi ifwe taŵenifwe tose te pano zuŵa ili.

⁴Ambuya angukamba namwe pa maso mu phiri, mukati mu moto,

⁵penipo ine ndinguma pakati paku Chiuta ndi imwe nyengo yiya, kukukambiyani mazu gha Ambuya, chifukwa mwenga wakutenthema chifukwa cha moto, ndipo kuti mungukwere mu phiri cha, iyo wanguti:

⁶“ ‘Ndine Ambuya Chiuta wako, yo wakutuzga mu charu cha Egipiti, mu nyumba ya uŵanda.

⁷“ ‘Ungajanga ndi ŵachiuta ŵanyake pa maso pangu.

⁸“ ‘Ungazichitiya ngoza wakusemeka, chingana, nchikozgo cha kanthu kose kamu machanya, chingana nkhamu charu pasi, chingana nkhamu maji pasi pa charu.

⁹Ungavilambiyanga chingana nkhuvitataliya, chifukwa ine, Ambuya Chiuta wako, nde Chiuta wa sanji, wakusiskiya uheni wa auskeu pa ŵana mpaka mgonezi wa chitatu ndi wachinayi wakuŵeniwo ŵatinditinkha,

¹⁰nde wakuchitiya lisungu ku vikwi vyaku ŵeniwo ŵatindanja ndi wo ŵasunga marangu ghangu.

¹¹“ ‘Ungazumbuwanga waka zina la Ambuya Chiuta wako, chifukwa Chiuta wampimenge wambura kalema cha, yo wazumbuwa waka zina lake.

¹²“ ‘Kumbuka zuŵa la Sabata ndi kulipatuwa, mo Ambuya Chiuta wako wakulanguliya.

¹³Mazuŵa ghankhonde ndi limoza utatenge ndi uchitenge nchitu yako yose,

¹⁴kweni zuŵa la chinkhonde ndi chiŵi ndi Sabata kwa Ambuya Chiuta wako. Ungachitiyangamo kose ka mlimu cha; chingana ndiwe, chingana ndi mwana wako munthurumi, chingana ndi mwana wako munthukazi chingana ngwanchitu wako munthurumi, chingana ngwanchitu wako munthukazi chingana ndi ng'ombe yako, chingana ndi mbunda yako, chingana ndi viŵetu vyako vyose, chingana ndi mlendo wakuja nawe, kuti wanchitu wako munthurumi, ndi wanchitu wako munthukazi ŵapumuwe pamoza nawe.

¹⁵Ukumbuke kuti wenga muŵanda mu charu cha Egipiti, ndipo Ambuya Chiuta wako wangukutuzgamo ndi janja la nthazi ndi mkono wakutambaluka; chifukwa ichi Ambuya wako akukulanguliya kusanga zuŵa la Sabata.

¹⁶“ ‘Tumbika ausu ndi anyoko, nge ndimo Ambuya Chiuta wako wakukulanguliya, kuti mazuŵa ghako ghaŵenge ghanandi, kuti kukuŵiye umampha mu charu chenicho Ambuya Chiuta wako watikupaska.

¹⁷“ ‘Ungabaya.

¹⁸“ ‘Ungareŵa.

¹⁹“ ‘Ungabanga.

²⁰“ ‘Ungatiya chisimisimi cha utesi pa munyako.

²¹“ ‘Ungaŵiniwa muwoli wamunyako, ungaŵiniwa nyumba ya munyako, munda wake, chingana ngwanchitu wake munthurumi, chingana ngwachitu wake munthukazi, ng'ombe yake, chingana ndi mbunda yake, chingana nkhanthu kose kamunyako.’

²²“Mazu yagha Chiuta wangukambiya ku ungano winu wose pa phiri, mukati mu moto, mu bingu, ndimu mdima ukuru, ndi mazu ghakuru, ndipo wengavi kusazgako ghanyake. Wangugharemba pa vipapati viŵi vya mya, wangupereka kwaku ine.

²³Ndipo penipo munguvwa mazu kutuwa makati mu mdima, penipo phiri lafyanga ndi moto, munguza kufupi ndi ine, ndi wose walongozgi ŵa mafuku ghinu, ndi ŵaraŵara ŵinu.

²⁴Munguti, ‘Wona, Ambuya Chiuta widu watirongo unkhankhu wake ndi ukuru wake ndipo tavwa mazu ghake ghakutuwa mukati mu moto, tawona Chiuta msana uno wakukamba ndi munthu, ndipo munthu weche wamoyo.

²⁵Kumbi sono tifwiyengenji? Chifukwa moto ukuru uwu utimarenge asani tikavwanga so mazu gha Ambuya Chiuta widu, tikafwanga.

²⁶Pakuti ndiyani wa ŵamoyo wose yo wavwa mazu ghaku Chiuta wamoyo wakukamba mukati mu moto nge ndifwe, ndipo weche wamoyo?

²⁷Ruta kufupi, uvwe vyose vyo Ambuya Chiuta widu wakakambnga ndipo utinene vyose vyenivyo Ambuya Chiuta widu wakambanga kwaku iwe, ndipo tikavwanga ndi kuvichita.’

²⁸“Ndipo Ambuya anguvwa mazu ghinu, po mwakambanga kwaku ine, ndipo Ambuya anguti kwaku ine, ‘Ndavwa mazu gha ŵanthu yaŵa gho ŵakamba kwaku iwe, ŵakamba umampha vyose vyo wakamba.

²⁹Mtima wa viyo wenga mwaku iyo mazuŵa ghose kundopa ndi kusunga marangu ghangu ghose, mwakuti kuŵaŵiye kwamampha iwo ndi ŵana ŵawo muyaya!

³⁰Ruta! Uŵanene, “Wereni ku mahema ghinu.”

³¹Kweni iwe, ume panu ndi ine, ndipo ndikuneniyenge marangu ghose, ndi vipangizgo ndi meruzgidu ghenigho ukaŵasambizganga kuti ŵaghachite mu charu cho ndiŵapska kuŵa chawo.’

³²Viyo muŵe ŵakuphwere kuchita nge ndimo Ambuya Chiuta winu wakulanguliyani, mungang'anamukiyanga ku marghe pamwenga ku maze cha.

³³Mwendenge mu nthowa zose zenizo Ambuya Chiuta winu wamulanguliyani, kuti muŵe ndi umoyo, ndi kuti kuŵenge kwamampha kwaku imwe, ndi kuti muje nyengo yitali mu charu cho mwamuronda.