Read gitonga Yohane 12 Bible Online

Yohane 12 - gitonga bible

Yohane 12

¹Mazuŵa ghankhonde ndi limoza lenga lindaze Phaska lo Yesu wanguza mu Betaniya, ko wenga Lazaro, mweniyo wangumuyuska ku ŵakufwa.

²Wangumunozge kurgha kwa mazuru kwenukuwa; ndipo Marta ndiyo wanguŵateŵete; kweni Lazaro wenga yumoza waku wo ŵatekanga pamoza nayo pa kurgha.

³Viyo Mariya, wanguti wato mwesu wa chema cha nardo leneko lakuzirwa, wangughapunguliya mu marundi ghaku Yesu, wangughaleska marundi gho ndi sisi lake: ndipo nyumba yo yinguzizika ndi kununkha kwa chema.

⁴Ndipo Yuda mKeriote yumoza wa ŵasambizi ŵake (yo wakhumbanga kumpachiya), wanguti,

⁵“Chifukwa chine chema ichi chengavi kusaskika ndrama machumi pe chumi ghatatu, ndi kupaskika ku ŵakavu?”

⁶Wangukamba ichi pa chifukwa chakuphwere ŵakavu cha; kweni chifukwa wenga munkhungu, ndipo pakuŵa wakusunga chikwama, wajitoliyanga vyo vya ŵikikangamo.

⁷Viyo wanguti Yesu, “Mureke; mwakuti cho wenacho wachisungiye ku zuŵa langu lakundiŵikiya.

⁸Chifukwa mwe nawo ŵakavu pamoza namwe nyengo zose; kweni kuti mwe ndi ine nyengo zose cha.”

⁹Viyo urapasi wa ŵaYuda po ŵanguvwa kuti wenga kweniko: ŵanguza, pa chifwa chaku Yesu pe cha, kweni so kuti ŵakamuwone Lazaro, yo wanguyuska ku ŵakufwa.

¹⁰Ŵazukuru ŵara ŵangupangirana kuti Lazaro nayo Wabaye;

¹¹pakuti ŵanandi ŵa ŵaYuda pa chifwa chake ŵarutanga ndi Wavwananga mwaku Yesu.

¹²Ndi mlenji mzinda ukuru, wo unguziya dghera, ŵachivwa kuti Yesu watuza ku Yerusalemu

¹³ŵanguto mphanda za ŵakanchindu, ŵangutuwa kwachikumana nayo, ndipo Wakamburanga, “Hosana! Ngwakutumbikika yo watuza mu zina la Mbuya, Karonga waku Yisraele!”

¹⁴Ndipo Yesu, wanguti wasaniya kambunda, wangujapo; mo kwalembeke,

¹⁵“Mungopanga cha, mwa ŵanthu ŵaku Zioni: awona, Karonga wako watuza, wakugara pa mwana wa mbunda.”

¹⁶Ŵasambizi ŵake ŵengavi kuwamo ichi pa mtendeku; kweni penipo Yesu wangukankhuskika sono Wangukumbuka kuti ivi vingulembeke iyo, ndi kuti ŵangumchitiya iyo vyenivi.

¹⁷Viyo wasimikizganga mzinda wo wenga pamoza nayo, wachidana Lazaro ku muunda, ndi kumyuska ku ŵakufwa.

¹⁸Chifukwa chenichi mzinda wo ungwachikumana nayo, pakuti wanguvwa kuti wanguchita chisimikizgu ichi.

¹⁹Viyo ŵaFarisi ŵangunenerana mwaku ŵija, “Kuti kutitanduliya kanthu cha; awonani, charu chose chiruta pavuli pake.”

²⁰Ndipo ŵanguŵapo ŵaGriki ŵanyake mwaku wo ŵangukwere ku Yerusalemu kwachisopa pa dghera.

²¹Yaŵaŵanguza kwaku Filipu, waku Betesaida waku Galile, ndipo ŵamuŵeyerenga, ŵakuti, “Bwana, tikhumba kuwona Yesu.”

²²Filipu wanguza wangunene Andreya: Andreya ndi Filipu, ŵanguza ŵangumnene Yesu.

²³Ndipo Yesu wanguŵamuka, “Ora lo laza, lakuti wakankhuskike Mwana wa munthu.

²⁴Nadidi ndikuneneskiyani, kwambura kuti nje ya trigu yawa mu charu ndi kufwa, yijaririya yija pe, kweni asani yingafwa, yipasa vipasi vinandi.

²⁵Wakwanja umoyo wake wautaya; ndipo wakutinkha umoyo wake mu charu wakausungiyanga ku umoyo wamuyaya:

²⁶asani yumoza watinditeŵete, wandirondonge; ndipo ko nde ine, kweniko waŵenge mteŵete wangu nayo: asani yumoza watinditeŵete, Ada amrumbenge.

²⁷“Sono usuzgika mzimu wangu; ndipo ndikambengenji? ‘Ada, nditaskeni ku ora lenili?’ Awa pakuti pa chifwa chenichi ndikuziya ku ora lenili.

²⁸‘Ada, kankhuskani zina linu.’ ” Viyo kunguza liu lakutuwa kuchanya, lakuti “Ndalikankhuska, ndipo ndilikankhuskenge so.”

²⁹Viyo mzinda wo ungumapo unguvwa, ndipo kunguti, “Kwagunda.” Wamwenga ŵanguti, “Mungelo warongoro nayo.”

³⁰Wangwamuka Yesu, wanguti, “Liu lo kuti laziya pa chifwa chaku ine cha, kweni chifukwa chinu.

³¹Sono kwe cheruzgu cha charu chino: sono wakapong'ekanga kubwaro muusi wa charu ichi.

³²Ndipo ine, asani ndasoskeka panupasi, ndiguziyenge ŵanthu wose kwaku ndamweni.”

³³Kweni wangukamba ichi, pakusimikizgiya nyifwa yo wangwenere kufwa.

³⁴Mzinda wo ungumwamuka, “Ifwe tavwa ku langulu lo, kuti Kristu wakajaririyanga muyaya. Ukamba uli iwe, mwana wa munthu watenere kusoskeka? Njani uyu Mwana wa munthu?”

³⁵Wanguŵanene Yesu, “Nyengo yimanavi Kungweruka kweche mukati mwinu. Mwendenge mweche nako kungweruka, winu mdima ungamsaniyani; pakuti wakwenda mu mdima kuti waziŵa ko watiya cha.

³⁶Mweche nako kungweruka, vwanani mu Kungweruka ko, alinga kuti muŵe ŵana ŵa Kungweruka.” Wanguti warongoro yagha Yesu, wanguruta ndi wangubisama kutuwako kwaku wo.

³⁷Kweni chingana wanguchita visimikizgu vyenivinandi viyo paurongo paku wo, kuti wanguvwana mwake cha;

³⁸mwakuti ghafiskike mazu ghaku Yesaya, mchimi, ghakuti, “Ambuya, njani wavwana mu chitaula chidu? Ndipo janja la Ambuya lavumbulikiya kwaku yani?”

³⁹Chifukwa chenichi kuti wanguziwa kuvwana cha, pakuti wangukamba so Yesaya,

⁴⁰“Waburumutuzga maso ghawo, ndipo wanonopeska mtima wawo; vinu ŵangalereska ndi maso ghawo, ndi ŵangawamo ndi mtima wawo, ŵangang'anamukiya kwaku ine ndipo ine ndingaŵachizga.”

⁴¹Vyenivi wangukamba Yesaya, pakuti wanguwona unkhankhu wake; ndipo wangurongoro vyapaku iyo.

⁴²Ndikweni chingana ndimu ŵara ŵanandi ŵanguvwana mwaku iyo; kweni chifukwa chakopa ŵaFarisi wo reka ŵatondekanga kumzomera pakweru vinu wangasezgeka ku sinagoge:

⁴³chifukwa ŵangwanja kurumbika ndi ŵanthu kwakuruska kurumbika ndi Chiuta.

⁴⁴Viyo Yesu wangukambura, wanguti, “Wakuvwana mwaku ine, kuti wavwana mwaku ine cha, kweni mu Wakundituma.

⁴⁵Ndipo yo wawona ine wawona Wakundituma.

⁴⁶Ndaza Kungweruka mu charu, alinga kuti yose wakuvwana mwaku ine wangajaririyanga mu mdima cha.

⁴⁷Ndipo asani yumoza wangavwa mazu ghangu, ndi wareka kughasunga, ine kuti nditumweruzga cha; chifukwa kuti ndinguziya kuti nderuzge charu cha, kweni kuti ndichitaske charu.

⁴⁸Wakupata ine ndi wakureka kuronde makambidu ghangu, we nayo wakumweruzga: mazu gho ndarongoro, ghenagha ghakumweruzga mu zuŵa lakumariya.

⁴⁹Chifukwa ine kuti ndajirongorore gha paku ndija cha; kweni Dada wakundituma, ndiyo wandilanguliya cho ndikambenge, ndi cho ndirongoronge.

⁵⁰Ndipo ndiziŵa kuti langulu lake mbumoyo wamuyaya. Viyo cho ndirongoro ndicho Dada wandikambiya, kuti ndirongoro.”