Read gitonga Yohane 13 Bible Online

Yohane 13 - gitonga bible

Yohane 13

¹Lenga lindaze dghera la Phaska, wanguziŵa Yesu kuti laza ora lake lakutuwa mu charu chino, kuruta ku Dada; po wanguti waŵanja ŵapa mtima wake ŵamu charu, wanguŵanjiya limu mpaka ku umari.

²Ndipo wachoneska diabolo yo wati waŵikamo kali mu mtima waku Yuda mKeriote, mwana waku Simoni, kuti wampachiye.

³Yesu, wanguziŵa kuti Dada wapaska vyose mu manja mwake. Wanguziŵa kuti watuwa kwaku Chiuta, ndi kwaku Chiuta warutenge.

⁴Wangusoka pa gome ndi wangukhumuwa minjirira yake; ndipo wanguti wato chakuleske, wangujichinyiya.

⁵Pavuli wangupunguliya maji mu mbale, sono wangwamba kusambiska marundi gha ŵasambizi, ndi kughaleska ndi chileskeru cho wangujichinyiya nacho.

⁶Watuza kwaku Simoni Petro, wamnene, “Ambuya, kumbi imwe musambiska marundi ghangu?”

⁷Yesu wangwamuka ndi wamnene, “Cho ndichita, kuti ungaziŵa iwe sono cha; kweni ukaziŵanga pavuli.”

⁸Petro wamnene, “Kuti mukasambiskanga marundi ghangu cha muyaya.” Wangumwamuka Yesu, “Asani ndireka kukusambiska, kuti we ndi chigaŵa pamoza nane cha.”

⁹Wamnene Simoni Petro, “Ambuya, marundi ghangu pe cha, kweni manja nagho ndi mutu.”

¹⁰Wamnene Yesu, “Wakusamba kuti wakavuka kubira liŵavu lose cha, kweni kusamba marundi pe mbwenu ngwakuphotoka kosekose: imwe mwe ŵakuphotoka, kweni mose cha.”

¹¹Chifukwa wamziŵanga yo wampachiyenge; chifukwa chenicho wanguti, “Kuti mwe ŵakuphotoka mose cha.”

¹²Viyo penipo wangusambiska marundi ghawo, wati wavwara minjirira yake, ndi kuja so pasi, wanguŵafumba, “Kumbi muzuŵa cho ndakuchitiyani?

¹³Imwe mutinditamula, Msambizgi, ndi Ambuya: ndipo muneneska; chifukwa nde waviyo.

¹⁴Viyo asani ine, Ambuya ndi Msambizgi, ndasambiska marundi ghinu, namwe mutenere kusambiskana marundi.

¹⁵Chifukwa ndakupaskani chandiru, alinga kuti nge ndimo ine ndachitiya imwe, namwe so muchitenge.

¹⁶Nadidi ndikuneneskiyani, Muŵanda kuti ndi mraku ku Mbuyake cha; chingana ndi nthumi kuti njiraku ku wakuyituma cha.

¹⁷Asani muziŵa vyenivi, mwe ŵamwaŵi asani mutivichita.

¹⁸Kuti ndinena imwe mose cha; ine ndiziŵa wo ndatondo: kweni kuti lifiskike lembo lo, ‘Wakurgha chiŵande pamoza nane wasoske paku ine chitende chake.’

¹⁹Ndikukambiyani ichi sono chenga chindaŵepo, alinga kuti, penipo chikaŵangapo, muvwane kuti ine ndine iyo.

²⁰Nadidi ndikuneneskiyani, wakuronde mweniyo yose nditumenge, waronde ine; ndipo wakuronde ine, waronde Wakundituma.”

²¹Wati wakamba vyenivi Yesu, wangwenjezgeka mu mzimu, ndipo wangusimikizga, wanguti, “Nadidi, ndikuneneskiyani, kuti yumoza wamwaku imwe wandipachiyenge.”

²²Ŵasambizi ŵangulereskana, pakukangang'a wakambanga yani.

²³Yumoza wa ŵasambizi wakiyegeme pa chifuŵa chaku Yesu, yo Yesu wangwanja.

²⁴Simoni Petro wangukonozga kwaku iyo, wamnene, “Utinene yo wakamba.”

²⁵Viyo mweniyo wachiyegeme pa chifuŵa chaku Yesu, wangumnene, “Ambuya ndi yani?”

²⁶Yesu wangwamuka, “Ndi mweniyo ine ndimubwengiyenge chinkhombe, ndi kumpaska.” Ndipo wati wachibwenga chinkhombe, wanguchipaska kwaku Yuda, mwana waku Simoni mKeriote.

²⁷Ndipo pavuli pa chinkhombe cho Satana wangusere mwaku iyo. Yesu wamnene, “Cho uchita chitanga ruŵi.”

²⁸Kweni pengavi yumoza wakuyegeme pa gome wanguziŵa chifukwa chakumnene ichi.

²⁹Chifukwa ŵanyake ŵarungurukanga kuti, po Yuda wenga wakusunga chikwama, Yesu wamuneniyanga kuti, “Gulanga vyo tikavukiya ku dghera”; pamwenga, kuti wapaskeko kanthu ku ŵakavu.

³⁰Viyo Yuda wati waronde chinkhombe, ruŵi wangutuliya kubwaro; ndipo kunguŵa usiku.

³¹Wati watuwa Yuda, Yesu wanguti, “Sono wakankhuskika Mwana wa munthu, ndipo Chiuta wakankhuskika mwaku iyo;

³²ndipo asani Chiuta wakankhuskika mwaku iyo wamkankhuskiyenge mwaku iyo yija.

³³Mwatwana mwe, kanyengo kamanavi ndeche namwe pamoza. Mundilembenge; ndipo nge ndimo ndiguŵanene ŵaYuda, viyo sono nako ndinene imwe, ‘Kweniko ine nditiya kuti muziŵa kuzako imwe cha’

³⁴dangu lifya ndikupaskani, kuti mwanjane; nge ndimo ine ndakwanjiyani, imwe so mwanjane.

³⁵Mwaku ichi ŵanthu wose ŵaziŵenge kuti mwe ŵasambizi ŵangu, asani mwe ndi chanju yumoza ku munyake.”

³⁶Simoni Petro wamnene, “Ambuya mutanunkhu?” Yesu wangwamuka, “Ko ndita, kuti uziŵa kundirondo sono cha; kweni wamkundirondo pavuli.”

³⁷Petro wamnene, “Ambuya, chifukwa chine ndingatondeka kukurondoni sono? Ndiŵikiyenge pasi umoyo wangu chifukwa chinu.”

³⁸Watamuka Yesu, “Kumbi uŵikiyenge pasi umoyo wako pa chifwa chaku ine? Nadidi ndikuneneske, kuti wakokoŵerekenge cha tambala, mpaka iwe wandikana katatu.