Read gitonga Yohane 14 Bible Online

Yohane 14 - gitonga bible

Yohane 14

¹“Ungakweŵekanga mtima winu cha: vwanani mwaku Chiuta, vwanani mwaku ine so.

²Mu nyumba ya Ada mwe malo ghanandi ghakujamo; asani kunguŵavi, mphanyi ndingukuneniyani; pakuti ndiruta kwachirongosole imwe malo.

³Ndipo asani ndaruta ndi kukurongosoleni malo, ndituza so, ndipo ndazamkukutoriyani kwaku ndamweni; alinga kuti ko nde ine, namwe so muŵe kweniko.

⁴Ndipo ko nditiya, muziŵa nthowa.”

⁵Tomase wamnene, “Kuti tiziŵa cha ko muta; tiyiziŵa uli nthowa?”

⁶Yesu wamnene, “Ine ndine nthowa, ndi uneneska wo, ndi umoyo wo; kuti yumoza wangaza ku Dada cha, kwambura kuti watuziya mwaku ine.

⁷Asani munguziŵa ine, mphanyi Ada nawo mwaŵiziŵa: kutuwa ku sono muŵaziŵa, ndipo mwaŵawona.”

⁸Filipu wamnene, “Ambuya, tirongoni Dada, ndipo tikakhorwanga.”

⁹Yesu wamnene, “Nyengo yitali yaviyo ndaŵa pamoza namwe, ndipo kumbi ulive kundiziŵa, Filipu? Yo wawona ine, wawona Ada. Ukamba uli iwe, ‘Tirongoni Dada’?

¹⁰Asi uvwana kuti ine nde mu Dada, ndi kuti Dada we mwaku ine? Mazu gho nditukukambiyani kuti ndirongoro ghakutuwa kwaku ndamweni cha; kweni Dada wakujaririya mwangu watata nchitu zake.

¹¹Vwanani ndi ine kuti nde mu Dada, ndi Dada mwaku ine; pamwenge ipu, chifukwa cha nchitu zo vwaniyani mwaku ine.

¹²“Nadidi ndikuneneskiyani, wakuvwana mwaku ine, nchitu zo ine ndichita, wachitenge iyo nayo; ndipo zikuru zakuzungura izi wakachitanga; chifukwa ine nditiya ku Dada.

¹³Ndipo chenicho chose mukapemphanga mu zina langu, chenicho nkhachitanga alinga kuti Dada wakankhuskikiye mu Mwana.

¹⁴Asani mupempha kanthu kakuti mu zina langu, nkhachitanga keniko.

¹⁵“Asani mutindanja, musungenge marangu ghangu.

¹⁶Ndipo ine ndikarombanga ku Dada, ndipo wamkukupaskani Nkhoswe yinyake, kuti yiŵe pamoza namwe muyaya.

¹⁷Mzimu yo wa uneneska; mweniyo charu kuti chiziŵa kumuronde cha, chifukwa kuti chitumuwona cha, chingana nkhumuziŵa: imwe mutumuziŵa; pakuti waja namwe, ndipo waŵenge mwaku imwe.

¹⁸“Kuti ndimusiyeninge mwija cha: ndikazanga kwaku imwe.

¹⁹Kachalipo kanyengo kamanavi, ndipo charu cho kuti chindiwonenge so cha; kweni imwe mundiwonenge; chifukwa ine ndi wamoyo namwe so muŵenge ŵamoyo.

²⁰Mu zuŵa liya muziŵenge imwe kuti ine ndemu Dada, ndi imwe mwaku ine, ndi ine mwaku imwe.

²¹Wakuŵa nagho marangu ghangu, ndi wakughasunga, mweniyo ndiyo watindanja ndipo wakwanja ine wanjiwenge ndi Ada, ndipo ine ndimwanjenge, ndi nkhajivumbuwanga kwaku iyo.”

²²Yuda (Keriote yo cha) wangumfumba, “Ambuya, kwati po mutiti mukajivumbuwanga kwaku ifwe, kweni ku charu cha?”

²³Yesu wangwamuka, wangumnene, “Asani yumoza watindanja, wasungenge mazu ghangu, ndipo Ada ŵamwanjenge, tizenge kwaku iyo, ndipo tijichitiyenge uja pamoza nayo.

²⁴Wakureka kundanja kuti wasunga mazu ghangu cha: ndipo mazu gho mutuvwa, kuti ngangu cha, kweni nga Ada wakundituma.

²⁵“Vyenivi ndakukambiyani, po ndeche pamoza namwe.

²⁶Kweni Nkhoswi yo, Mzimu Wakupaturika, mweniyo Dada watumenge mu zina langu, iyo wazamkukusambizgani vinthu vyose, ndipo wazamkukukumbuskani vyose vyo ndakuneniyani.

²⁷Chimangu ndikusiyiyani; chimangu changu nditukupaskani, ine kuti nditukupaskani uli ndimo charu chipaskiya cha. Ungakweŵekanga mtima winu cha, chingana nkhutenthema cha.

²⁸Munguvwa mo ndingukuneniyani, ‘Ndiruta, ndipo ndamukuza so kwaku imwe.’ Asani mungundanja, mphanyi mwakondwere, chifukwa ndiruta ku Dada; pakuti Dada ndi muraku kwaku ine.

²⁹Ndipo sono ndakuneniyani, chindaŵepo, alinga kuti, chichiŵapo, muvwanenge.

³⁰Kuti ndirongoronge namwe vinandi so cha, chifukwa yituza fumu ya charu chino. Ndipo kuti ye ndi nthazi paku ine cha;

³¹kweni alinga kuti charu cho chiziŵe kuti nditanja Dada, ndicho chifukwa ndichita vyose nge ndimo watindilanguliya. Yukani, tituwepo panu.