Read gitonga Yohane 15 Bible Online

Yohane 15 - gitonga bible

Yohane 15

¹“Ine ndine mphereska yeneko, Ada mbalimi.

²Mphanda yose mwaku ine yambura kupasa, atiyipantha: ndipo yose yakupasa atiyitenguliya, mwakuti yipase vinandi.

³Imwe mwe ŵakutengulika kali chifukwa cha mazu gho ndarongoro namwe.

⁴Jani mwaku ine, ndi ine mwaku imwe. Mo mphanda yirive nthazi kujipasiya yija, kwambura kuti yijaririya mu mphereska yo, viyo so chingana ndimwe, kwambura kuti mujaririya mwaku ine.

⁵Ine ndine mphereska yo, imwe mwe mphanda zo; wakujaririya mwaku ine, ndi ine mwaku iyo, mweniyo ndiyo wapasa vinandi: chifukwa kwambura ine kuti muziŵa kuchita kanthu cha.

⁶Asani munthu wareka kujaririya mwaku ine, wapong'eka kubwaro nge ndi mphanda, wamira; ndipo ŵaunjika mphanda zo, watizipong'a mu moto, ndipo zitocheka.

⁷Asani mujaririya mwaku ine, ndi mazu ghangu ghajaririya mwaku imwe, chose cho mungakhumba pemphani, ndipo chikuŵiyeninge,

⁸Mwaku chenichi akankhuskika Ada, pakuti mupasa vinandi; ndipo viyo muŵenge ŵasambizi ŵangu.

⁹Nge ndimo wandanjiya Dada, nane so ndakwanjani: jaririyani mu chanju changu.

¹⁰Asani musunga marangu ghangu, mujariryenge mu chanju changu; ngendimo ine ndasungiya marangu gha Ada, ndipo ndijaririya mu chanju chawo.

¹¹Vyenivi ndakukambiyani, alinga kuti chimwemwe changu chiŵe mwinu, ndi kuti chimwemwe chinu chifiskike.

¹²“Lenili ndi languli langu, lakuti, mwanjane, nge ndimo ine ndakwanjiyani.

¹³Chanju chikuru kwakuruska cho munthu wangaziŵa kuŵa nacho pa ŵabwezi ŵake, nkhupereka umoyo wake ku chifwa chaku wo.

¹⁴Imwe mwe ŵabwezi ŵangu, asani muchita vyenivyo ine ndikulanguliyani.

¹⁵Kuti ndikuzumbuwani ŵaŵanda so cha; chifukwa muŵanda walive kuziŵa cho wachita mbuyake: kweni ndakutamulani ŵabwezi; pakuti ndakuziŵiskani vyose vyo ndavwa ku Ada.

¹⁶Kuti ndimwe mungusankha ine cha, kweni ndine ndingusankha imwe, ndipo ndingukumikani, kuti mukapase vipasi, ndi kuti vipasi vinu vijaririye; alinga kuti chose cho mungapempha Dada mu zina langu, wakupaskeninge.

¹⁷Ichi ndicho nditukulanguliyani, kuti mwanjane.

¹⁸“Asani charu chitukutinkhani ziŵani kuti chadanga chitinkha ine, chenga chindatinkhe imwe.

¹⁹Asani mwenga ŵa charu ichi, mphanyi charu chamwanjani nge mbanthu ŵapa mtima wake: kweni chifukwa kuti mwe ŵa charu cha, ine ndakusankhani mu charu, chifukwa chenichi chikutinkhani charu cho.

²⁰Kumbukani, mazu gho ndingukuneniyani, ‘Muŵanda kuti ndi muraku ku mbuyake cha.’ Asani ŵanguŵemba ine, imwe namwe ŵamkukuŵembani, asani ŵangusunga mazu ghangu, ghinu nagho ŵamsunga.

²¹Kweni vyose ivi ŵakakuchitiyaninga pa chifwa cha zina langu, pakuti ŵalive kumuziŵa yo wangundituma.

²²Asani ndengavi kuza ndi kurongoro nawo, mphanyi ŵengavi ulakwi; kweni sono ŵalive mphandira wapa ulakwi wawo.

²³Wakutinkha ine, watinkha Ada so nawo.

²⁴Asani ndengavi kuchita mwawo nchitu zo munyake wengavi kuchita, mphanyi ŵanguuravi chilakwa: kweni sono kosekose ŵawona ndi ŵatinkha ine ndi Ada so nawo.

²⁵Kweni nchakuti ghafiskike mazu gho ghalembeka mu langulu lawo, ‘Wangunditinkha waka.’

²⁶Kweni penipo Nkhoswi yo yitakuti yaza, yeniyo ine nkhatumanga kwaku imwe kutuwa ku Dada, Mzimu yo wa uneneska, yo watuwa ku Dada, iyo wamsimikizga vyapaku ine;

²⁷ndipo imwe namwe mwe ŵakoboni, pakuti mwavwa nane pamoza ku mtendeku.