Read gitonga Yohane 16 Bible Online

Yohane 16 - gitonga bible

Yohane 16

¹“Ndakukambiyani vyenivi alinga kuti mureke kuguŵiskika.

²Wamkukusezgani ku masinagoge: inya, lituza ora, la kuti yose wakukubayani imwe wapimenge kuti wateŵete Chiuta.

³Ndipo vyenivi ŵachitenge chifukwa kuti ŵaziŵa Dada cha, chingana ndi ine.

⁴Kweni ndakukambiyani ivi, alinga kuti, penipo ora lawo laza, mukumbuke kuti ine ndingukuneniyani ndi vyenivyo. “Kweni kuti ndingukuneniyani ivi pa mtendeku cha, pakuti ndaŵanga namwe pamoza.

⁵Kweni sono ndiruta kwaku yo wangundituma; ndipo palivi yumoza mwaku imwe wakundifumba, ‘Muta nunkhu?’

⁶Kweni sono pakuti ndakukambiyani vyenivi, chisungu chazaza mtima winu.

⁷Nakweni naku ndikuneniyani uneneska, nkhwamampha kwaku imwe kuti ine ndirute: chifukwa asani ndiruta nkhamutumanga kwaku imwe.

⁸Ndipo watakuti waza iyo, wazampanikizgiya charu pa ulakwi, ndi pa urunji, ndi pa cheruzgu:

⁹pa ulakwi chifukwa wareka kuvwana mwaku ine;

¹⁰pa urunji, chifukwa nditiya ku Ada, ndi kuti mundiwonenge so cha,

¹¹ndipo pa cheruzgu, chifukwa mura yo wa charu chino weruzgika.

¹²“Ndeche ndi vinandi kumkambiyani, kweni kuti mungaviyirika sono cha.

¹³Kweni penipo waza iyo, Mzimu wa uneneska, wazamkukurongozgani mu uneneska wose; chifukwa kuti wazamrongoro vyapa mtima wake cha; kweni vyose vyo watuvwa, wazamkamba: ndipo wazamkukuvumbuliyani vinthu vyo vituza.

¹⁴Iyo wazamkankhuska ine: pakuti watongeko vyangu, ndipo wamkuvivumbiliya kwaku imwe.

¹⁵Vyose vyo Ada ŵe navyo vyangu: rekani ndinguti, watongeko vyangu, ndipo wazamkuvivumbuliya kwaku imwe.

¹⁶“Kanyengo kamanavi kuti mundiwonenge so cha; ndipo so pavuli pa kanyengo kamanavi ndipo mwazamkundiwona.”

¹⁷Viyo ŵasambizi ŵake ŵangunenerana, “Nchine cho watitinene, ‘Kanyengo kamanavi, kuti mundiwonenge cha; ndipo so kanyengo kamanavi, ndipo mwamkundiwona’: ndi ‘Chifukwa nditiya ku Ada?’ ”

¹⁸Viyo wanguti, “Nchine cho watiti, ‘Kanyengo kamanavi’? Kuti tiziŵa cha cho warongoro.”

¹⁹Yesu wanguteska kuti ŵakhumbanga kumfumba, wangunena nawo, “Kumbi mufumbiskana paku chenichi, pakuti ndinguti, ‘Kanyengo kamanavi, kuti mundiwonenge cha, ndipo so kanyengo kamanavi, ndipo mwamkundiwona pavuli?’

²⁰Nadidi ndikuneneskiyani, muliyenge ndi mutenjenge imwe, kweni charu chikondwenge: muchitenge chisungu imwe, kweni chisungu chinu, chisandukenge chimwemwe.

²¹Munthukazi wachipapa we ndi chisungu, pakuti laza ora lake; kweni watakuti wapapa mwana, kuti wakumbuka so cha suzgu yake, chifukwa cha chimwemwe chakuti munthu wapapikiya mu charu.

²²Namwe so viyo mwe ndi chisungu sono: kweni ndazamkukuwonani so, ndipo mitima winu wazamkondwa, chimwemwe chinu pazamuuravi yumoza wazamtuzgapo kwaku imwe.

²³Ndipo mu zuŵa liya kuti mundifumbenge kanthu cha. Nadi ndikuneneskiyani, asani mwazampempha Ada kanthu, mu zina langu wazamkukupaskani.

²⁴Kweni mpaka sono kuti mwapempha kanthu mu zina langu cha: pemphani ndipo murondenge, mwakuti chimwemwe chinu chiŵe chakuzala.

²⁵“Ndakukambiyani ivi muzinthatika; lituza ora penipo kuti ndikambiyenge namwe mu zintharika cha, kweni pakweru ndikutauliyeninge vyapa Ada.

²⁶Mu zuŵa liya murombeyenge mu zina langu; ndipo kuti ndikamba kuti ine ndifumbiyenge Ada paku imwe cha.

²⁷Chifukwa Ada iwo ŵeneko atukwanjani, atukwanjani pakuti imwe mwandanja ine, ndipo mwavwana kuti ine ndikutuwa ku Ada.

²⁸Ndikutuwa ku Ada, ndipo ndaza mu charu: ndipo so ndireka charu ichi ndiruta ku Ada.”

²⁹Ŵasambizi ŵake ŵanguti, “Awonani, sono murongoro pakweru, ndipo kuti mukamba muntharika so cha.

³⁰Sono tiziŵa kuti muziŵa vyose, ndipo kuti mukavuka cha kuti yumoza wakufumbeni: mwaku chenichi tivwana kuti mungutuliya kwaku Chiuta.”

³¹Yesu wanguŵamuka, “Kumbi sono mwavwana?

³²Awonani, ora lituza, ndipo nadi lafika, lakuti mumbininikenge imwe munthu yose ku nyumba yake, ine mundisiyenge ndija: ndikweni kuti nde ndija cha, pakuti Ada we nane pamoza.

³³Ndakukambiyani vyenivi, alinga kuti mwaku ine muŵe ndi chimangu, mu charu mwe ndi suzgu: kweni khwimani mtima; ine ndachipunda charu.”