Read gitonga Yohane 17 Bible Online

Yohane 17 - gitonga bible

Yohane 17

¹Yesu wanguti wamara kurongoro; wangwinuskiya maso ghake kuchanya, ndi wanguti, “Ada, ora lo laza: kankhuskani Mwana winu, alinga kuti Mwana wakankhuske imwe.

²Pakuti mwampaska mtufu wapa munthu yose, alinga kuti wapaske umoyo wamuyaya kwaku wose wo mwampaska.

³Ndipo chenichi mbumoyo wamuyaya, kuti ŵanthu ŵakuziŵeni imwe, Chiuta yija muneneska ndi so Yesu Kristu mweniyo mungutuma.

⁴Ine ndarongo unkhankhu winu panupasi; mwakuti ndafiska nchitu yo mungundipaska kwachichita.

⁵Ada! Ndipaskeni unkhankhu mu maso ghinu sono, nge mbunkhankhu wo ndaŵanga nawo kwinu, chenga chindaŵepo charu.

⁶“Zina linu ndalivumbuwa ku ŵanthu wo mwandipaska; ndipo ŵasunga mazu ghinu.

⁷Sono ŵaziŵa kuti vyose vyenivyo mwandipaska, vituwa kwinu.

⁸Pakuti mazu gho mungupaska ine, ndaŵapaska iwo; ndipo iwo ŵagharonde; ŵaziŵadi kuti mbuneneska kuti ndingutuliya kwaku imwe, ndipo ŵavwana kuti imwe mungundituma.

⁹Ine ndarombe iwo; kuti ndirombe charu cha, kweni ŵeniwo mwandipaska; pakuti mbinu,

¹⁰ndipo vyose vyangu vinu, ndi vinu vyangu; ndipo ndikankhuskikiya mwaku wo.

¹¹Ndipo sono kuti nde mu charu cha, kweni iwo ŵemu charu, ine ndituza kwaku imwe, Ada Wakupaturika, wasungiyeni mu zina linu wo imwe mwandipaska, alinga kuti ŵaŵe ŵamoza, nge ndifwe

¹²Penipo ndenge pamoza nawo, ndaŵasungiyanga ine mu zina linu wo mwandipaska; ndipo ndinguŵasungirizga, kwauravi yumoza waku wo watayika, kweni mwana wo chitayiku pe ndiyo; mwakuti lifiskike lembo lo;

¹³kweni sono ndituza kwaku imwe; ndipo vyenivi ndirongoro mu charu, kuti ŵaŵe ndi chimwemwe changu chakufiskika mwaku iwo ŵija.

¹⁴Ine ndaŵapaska mazu ghinu; ndipo charu cho chaŵatinkha, pakuti kuti mba charu cha, nge ndimo ine ndiriri wa charu cha.

¹⁵Kuti ndiromba cha kuti muŵatuzge mu charu, kweni kuti muŵasunge ku mheni yo.

¹⁶Kuti mba charu cha, uli ndimo ine kuti ndiriri wa charu cha.

¹⁷Wapatuliyeni mu uneneska wo: mazu ghinu mbuneneska.

¹⁸Mo mungutumiya ine mu charu, ine nane ndaŵatuma iwo mu charu.

¹⁹Pa chifwa chaku wo ndijipatuliya, alinga kuti nawo so ŵaŵe ŵakupatulikiya mu uneneska.

²⁰“Ndipo kuti ndirombe iwo pe cha, kweni ŵeniwo so ŵavwaniya mwangu chifukwa cha mazu ghawo;

²¹kuti wose ŵaŵe ŵamoza uli ndimo imwe, Ada, muliri mwaku ine, ndi ine mwaku imwe, kuti nawo so ŵaŵe mwaku ifwe; alinga kuti charu chivwane kuti imwe mungundituma.

²²Ndipo unkhankhu wo mwandipaska ine ndapaska iwo; alinga kuti ŵaŵe ŵamoza, uli ndimo ifwe tiriri ŵamoza;

²³ine mwaku iwo, ndi imwe mwaku ine, alinga ŵaŵe ŵakufiskikiya mu umoza; kuti charu chiziŵe kuti imwe mungundituma, ndipo kuti mwaŵanja iwo, uli ndimo mwandanjiya ine.

²⁴Ada, wo mwandipaska, ndikhumba kuti ko nde ine, iwo nawo ŵaŵe pamoza nane; mwakuti ŵawone unkhankhu wangu, weniwo mukundipaska; pakuti mungundanja, chenga chindajarikike charu.

²⁵Ada ŵarunji, charu kuti chakuziŵani imwe cha, kweni ine ndakuziŵani; ndipo ŵenaŵa ŵaziŵa kuti imwe mwandituma.

²⁶Ndaŵaziŵiska zina linu, ndipo ndikaliziŵiskanga; alinga kuti cho chanju chenicho mwandanja nacho, chiŵe mwaku iwo, ndi ine mwaku iwo.”