Read gitonga Yohane 18 Bible Online

Yohane 18 - gitonga bible

Yohane 18

¹Wanguti wakamba vyenivi, Yesu wangutuwa pamoza ndi ŵasambizi ŵake kuya ku sirgha liya la kamsinju Kedroni, kweniko kwenga ndimba, mwenimo ŵangusere, iyo ndi ŵasambizi ŵake.

²Ndipo Yuda nayo, yo wangumpachiya, wangughaziŵa malo: pakuti panandi Yesu wangukumana ndi ŵasambizi ŵake kwenikuwa.

³Viyo Yuda, wakuŵa ndi liŵanja ndi ŵamirizi ŵakutuwa ku ŵazukuru ŵara ndi ŵaFarisi, ŵanguza kwenikuwa ndi ŵenge ndi malimbuni ndi vidya.

⁴Viyo Yesu, pakuziŵa vyose vyo vikamziyanga, wangutuwa ndi kuŵanene, “Mulembe yani?”

⁵Ŵangumwamuka, “Yesu waku Nazarete.” Yesu wanguŵanene, “Ndine.” Ndipo Yuda nayo, mphachi yo, wamanga pamoza nawo.

⁶Viyo penipo wanguŵanene, “Ndine,” ŵanguwere vuli, ndipo ŵanguwa pasi.

⁷Wanguŵafumba so, “Mulembe yani?” Iwo ŵanguti, “Yesu waku Nazarete.”

⁸Yesu wangwamuka, “Ndakuneniyani kuti ndine: viyo asani mulembe ine, ŵarekeni yaŵa ŵarutenge”;

⁹alinga kuti ghafiskike mazu gho wanguti, “Weniwo mwandipaska, kuti ndatayapo yumoza waku wo cha.”

¹⁰Viyo Simoni Petro, wakuŵa ndilipanga wanguliwewepuwa, ndipo wangukose muŵanda wa mzukuru mura, wangudumuwako gutu lake lamarghe. Zina la muŵanda yo lenga Malko.

¹¹Viyo Yesu wanguti kwaku Petro, “Weska lipanga lo mu chibazi chake; kumbi ndireke kumwa nkhombo[3] yo ŵandipaska Ada?”

¹²Viyo liŵanja lo ndi nduna ndi ŵamirizi ŵa ŵaYuda ŵangumko Yesu, ŵangumumanga,

¹³ndipo ŵanguruta nayo danga kwaku Anase; chifukwa wenga msibweni waku Kayafa, mweniyo wenga mzukuru mura chirimika chenichiya.

¹⁴Ndipo ndi Kayafa mweniyo wangupangizga ŵaYuda, kuti kwenga kwamandulika kuti munthu yumoza walifwiye khamu.

¹⁵Kweni Simoni Petro wangumrondo Yesu, ndi msambizi munyake so. Ndipo pakuti msambizi uyu wenga wakuziŵikwa ku Mzukuru mura, wangusere pamoza ndi Yesu mu luluwa la Mzukuru yo;

¹⁶Petro wanguma pakhomu kubwaro. Viyo msambizi munyake yo, yo wanguziŵikwa ku mzukuru mura, wangutuwa, wangukamba ndi munthukazi wapakhomu, ndipo wangumserezga Petro.

¹⁷Viyo msungwana yo wapa khomu wanguti kwaku Petro, “Asi ndiwe wamu ŵasambizi wa munthu uyu?” Watiti iyo, “Ine cha.”

¹⁸Ndipo ŵaŵanda ndi ŵamirizi ŵakuma pa, ŵangusonkha moto wa maka; ŵawothanga, pakuti kwenga chipwepwe; ndipo Petro nayo wenga pamoza nawo, wakotha moto.

¹⁹Viyo mzukuru mura wangufumba Yesu vyapa ŵasambizi ŵake, ndi vya pa chisambizgu chake.

²⁰Yesu wangumwamuka, “Ine ndakambiya pakwero ku charu; nyengo zose ndasambizga mu masinagoge, ndi mu kasopi, mwenimo ŵatongana ŵaYuda wose, ndipo kuti ndakamba kanthu mu ubende cha.

²¹Chifukwa chine ufumba ine? Fumbanga wo ŵavwa cho ndinguŵakambiya: ŵaziŵa iwo vyo ndingukamba.”

²²Ndipo wachikamba ichi, yumoza wa ŵamirizi ŵakumapo wangumjenyeska Yesu khofi, wakuti, “Kumbi utumwamuka mzukuru mura viyo?”

²³Yesu wangumwamuka, “Asani ndakamba uheni, simikizga pa uheni wo; kweni asani ndakamba umampha, undipumiyanji?”

²⁴Viyo Anase wangumtuma wakumangika kwaku Kayafa, mzukuru mura.

²⁵Simoni Petro wangumapo kotha moto. Viyo wangunena nayo, “Asi nawe so we wamu ŵasambizi ŵake?” Wangukana iyo, wanguti, “Ine cha.”

²⁶Watiti yumoza wamu ŵaŵanda ŵa mzukuru mura, mbali waku yo Petro wangumdumuwa gutu, “Asi ndingukuwona iwe mu dimba po pamoza nayo?”

²⁷Kweni Petro wangukana mbwenu: ndipo sosonukweni tambala wangukokoŵereka.

²⁸Kutuwa kwaku Kayafa wangumgumizgiya Yesu ku mphara ya nduna. Kwenga mlenjilenji, ndipo iwo ŵija ŵengavi kuseremo mu mphara cha, mwakuti ŵareke kukazuzgika kweni kuti ŵakarghe phaska.

²⁹Viyo Pilato wangutuliya kubwaro kwaku wo, wanguŵafumba. “Mumtole munthu mwenuyu chisumuwa nichi?”

³⁰Wangwamuka ndi ŵangunena nayo, “Kwambura kuti uyu wenga muchita uheni, mphanyi kuti tamupereka kwaku iwe cha.”

³¹Pilato wanguŵanene, “Mtoni imwe, ndipo kwakulingana ndi langulu lino mweruzgani.” ŴaYuda ŵangunena nayo, “Kuti kuyiyamu ifwe cha kubaya munthu.”

³²Ichi chenga chakuti ghafiskike mazu ghaku Yesu, gho wangukamba pakusimikizga ndi nyifwa yakutinkha yo wakafwanga.

³³Pilato wangusere so mu mphara, ndipo wangudana Yesu, wangunena nayo, “Kumbi ndiwe Karonga wa ŵaYuda?”

³⁴Yesu wangwamuka “Kumbi utijikambiya wija ichi, pamwenga ŵanyake ndiwo ŵangukukambiya vyapaku ine?”

³⁵Wangamuka Pilato, “Kumbi nde muYuda ine? Mtundu wako ndi ŵazukuru ŵara ndiwo ŵakupereka kwaku ine: na iwe wachitanji?”

³⁶Yesu wangwamuka, “Ufumu wangu kuti ngwacharu chino cha; asani ufumu wangu wenga wa charu chinu mphanyi ŵamirizi ŵangu ŵarwa, mwakuti ndireke kuperekeka ku ŵaYuda kweni ufumu wangu kuti ngwakuturiya ku charu cha.”

³⁷Viyo Pilato wangunena nayo, “Kumbi ndiwe karonga na?” Yesu wangwamuka, “Iwe utiti ndine karonga. Ine ndapapika ndipo ndaza mu charu pachifukwa chenichi pe, alinga kuti ndisimikizge uneneska. Yose yo ngwa uneneska watuvwa liu langu.”

³⁸Wangumfumba Pilato, “Ngune uneneska?” Ndipo wachikamba chenichi Pilato wangutuliya so ku ŵaYuda, wanguŵanene, “Ine ndirive kusaniya kufakwa kose mwaku iyo.

³⁹Kweni kwinu karusu kalipo, kakuti ndikufwatuliyeni yumoza pa Phaska. Viyo mukhumba kumbi kuti ndikufwatuliyeni karonga wa ŵaYuda?”

⁴⁰Viyo wangukambura so, wakuti, “Mwenuyu cha, kweni Baraba ndiyo.” Kweni Baraba yo wenga munkhungu.