Read gitonga Yohane 3 Bible Online

Yohane 3 - gitonga bible

Yohane 3

¹Ndipo kwenga munthu wamu ŵaFarisi, zina lake Nikodemo, murongozgi wa ŵaYuda.

²Munthu uyu wanguza kwaku Yesu ndi usiku, wangumnene, “Rabi, tiziŵa kuti ndimwe msambizgi wakutuwa kwaku Chiuta: chifukwa palive yumoza yo waziŵa kuchita visimikizgu vyo imwe muchita, kwambura kuti Chiuta we nayo.”

³Wangwamuka Yesu wangumnene, “Nadi, nadi, ndikuneneske, munthu kuti waziŵa cha kuwona Ufumu waku Chiuta kwambura kuti wapapika so.”

⁴Wamnene Nikodemo, “Wangaziŵa uli munthu kupapika po we khongwe? Kumbi waziŵa kusere kachiŵi mu nthumbo ya anyina, ndi kupapika?”

⁵Wangwamuka Yesu, nadi, ndikuneneske, “Kwambura kuti munthu wapapika ndi maji ndi Mzimu, kuti waziŵa cha kusere mu Ufumu waku Chiuta.

⁶Cho chapapikako ku nyama ndi nyama; ndipo chochapapikako ku Mzimu ndi mzimu.

⁷Ungazizwanga cha kuti ndingukunene, ‘Utenere kupapika so.’

⁸Mphepu yiputa kweniko kose yikhumba ndipo utuvwa kuuziya kwake, kweni kuti uziŵa cha ko yituwa, ndi ko yitiya: we viyo yose wakupapika ku Mzimu.”

⁹Wangwamuka Nikodemo, “Vingaŵa uli vyenivi?”

¹⁰Yesu wangwamuka wangumnene, “Ndiwe msambizgi waku Yisraele, ndipo kuti uziŵa ivi cha?

¹¹Nadi, ndikuneneske, tirongoro cho tiziŵa, ndipo chenicho tawona tisimikizga; kweni chisimisimi chidu kuti muronde cha.

¹²Kuti muvwana ndi ine cha po nditikuneniyane ndi vinthu vya charu ichi mungavwana nani uli nanga ndichimuneni yane ndi vinthu vyakuchanya?

¹³Chifukwa palivi yumoza yo wakweriyako kuchanya, kweni mwana wa munthu pe yo wasikako ku kuchanya.

¹⁴Nge ndimo Mosese wangusoske njoka yamu bozwa, viyo kutenere Mwana wa munthu kusoskeka:

¹⁵alinga kuti yose wakuvwana mwaku iyo waŵe ndi umoyo wamuyaya.”

¹⁶Pakuti Chiuta wangwanja viyo charu, viyo kuti wangupaska Mwana wake wakuwayija, alinga kuti yose wakuvwana mwaku iyo wareke kutayika, kweni waŵe ndi umoyo wamuyaya.

¹⁷Chifukwa Chiuta wengavi kumtuma Mwana wake mu charu, kuti weruzge charu; kweni kuti charu chitaskikiye mwaku iyo.

¹⁸Wakuvwana mwaku iyo kuti wateruzgika cha, wakureka kuvwana weruzgika kali, chifukwa walive kuvwana mu zina la Mwana wakuwayija waku Chiuta.

¹⁹Ndipo ichi ncheruzgu cho, kuti Kungweruka kwaza mu charu, kweni ŵanthu ŵangwanja mdima ukongwa kwakuruska Kungweruka ko; chifukwa zenga ziheni nchitu zawo.

²⁰Pakuti yose wakuchita uheni watinkha Kungweruka ndipo kuti watuza ku Kungweruka ko cha, vinu nchitu zake zingasuskika.

²¹Kweni yo ngwakuchita uneneska watuza ku Kungweruka ko, alinga kuti nchitu zake zirongoleke, kuti zachitikiya mwaku Chiuta.

²²Pavuli paku vyenivi Yesu wanguza, ndi ŵasambizi ŵake, mu charu cha Yuda; wangutandara nawo kweniko, ndipo wabatizanga.

²³Yohane nayo wabatizanga mu Ainone pafupi ndi Salima, pakuti ghengako maji ghanandi; ndipo ŵanthu ŵazanga ndi ŵabatizikanga.

²⁴Chifukwa Yohane wenga wandapong'eke mu ulinda.

²⁵Viyo kunguŵapo kufumbana kuchiri ku ŵasambizi ŵaku Yohane ndi mu Yuda ngana pa katozgedu.

²⁶Ndipo wanguza kwaku Yohane, wangumnene, “Msambizgi, munthu yo wenga nawe sirgha liya Yordane, kwaku yo iwe wapanikizganga, awona, wabatiza, ndipo wose wamotoke kwaku iyo.”

²⁷Wangwamuka Yohane ndi wanguti, “Kuti munthu wangaronde kanthu cha, kwambura kuti kapaskika kwaku iyo kutuwa kuchanya.

²⁸Imwe mwaŵeni mutindipanikizga kuti ndingunena, ine kuti ndine Kristu cha, kuti ndine wakutumika paurongo pake.

²⁹Yo ngwakuŵa ndi mwali ndi mweni-nthengwa: kweni bwezi la mweni-nthengwa, lo litumapo ndi kumuvwa, limwemwete ukongwa chifukwa cha liu la mweninthengwa yo: chifukwa chenichi chimwemwe changu chifiskika.

³⁰Kutenere iyo kukuwa, kweni ine kusika.”

³¹Yo ngwakutuwa kuchanya we pachanya paku wose; yo ngwa panupasi ngwapanupasi, ndipo warongoro vyapanupasi; yo ngwakutuwa kuchanya we pachanya paku wose.

³²Wapanikizga chenicho wawona ndi wavwa, kweni chipanikizga chake kuti waronde yumoza cha.

³³Yo waronde chipanikizga chake, watijizighiriya kuti Chiuta ndiyo mneneska.

³⁴Chifukwa mweniyo Chiuta wamtuma, warongoro mazu ghaku Chiuta: chifukwa kuti wapaska Mzimu kwamweso cha.

³⁵Dada watumwanja Mwana, ndipo wapaska mu janja lake vinthu vyose.

³⁶Yo ngwakuvwana mu Mwana we nawo umoyo wamuyaya; kweni yo wareka kuvwana mu Mwana, kuti wamwona umoyo cha, kweni kandundu kaku Chiuta kajaririya paku iyo.