Read gitonga Yohane 4 Bible Online

Yohane 4 - gitonga bible

Yohane 4

¹Viyo penipo Mbuya wanguziŵa kuti ŵaFarisi ŵavwa kuti Yesu waronde ndi wabatiza ŵasambizi ŵanandi kwakuruska Yohane,

²(ndikweni Yesu mwenecho kuti wabatizanga cha, kweni ŵasambizi ŵake ndiwo),

³wangutuwako ku Yuda, ndipo wanguwere so mu Galile.

⁴Ndipo kungukhumbikwiya iyo kusorota mu Samaria.

⁵Viyo wanguza ku msumba wa Samaria, wakudanika Sukara, pafupi ndi kacharu ko Yakobe wangupaska mwana wake Yosefe;

⁶ndipo chengapo penipa chisima chaku Yakobe. Viyo Yesu, wati wazotopa ndi rwendo, wanguja pasi pa chisima cho. Ora lenga akhumba lachinkhonde ndi chimoza.

⁷Wanguza munthukazi muSamaria kuzachinegha maji. Yesu wamnene, “Ndipaskeko ndimwe.”

⁸Chifukwa ŵasambizi ŵake ŵangurutiriya mu msumba wo, kwachigula vyaukurgha.

⁹Viyo munthukazi muSamaria yo wamnene, “Uli imwe, mwaŵakuŵa muYuda, mupempha maji kwaku ine, ndamunthukazi muSamaria?” Chifukwa ŵaYuda kuti ŵatenderana ndi ŵaSamaria cha.

¹⁰Wangwamuka Yesu wangumnene, “Asani unguziŵa mpasku waku Chiuta, ndi mweniyo watukunene, ‘Ndipaskeko ndimwe,’ mphanyi iwe ungupempha iyo, ndi mphanyi wangukupaska maji ghamoyo.”

¹¹Wamnene munthukazi, “Ambuya, chakuneghe mulive, ndipo chisima nchakuti nyo: na mwe nagho nunkhu maji gho ghamoyo?

¹²Kumbi mwe ŵaraku ku auskefwe Yakobe, mweniyo wangutipaska chisima ichi, ndipo wangumwapo iyo mweneko ndi ŵana ŵake, ndi viŵetu vyake?”

¹³Wangwamuka Yesu, “Yose wakumwapo maji yagha nyota yikamkonga so:

¹⁴kweni mweniyo yose wangwamwapo maji gho ndimpaskenge ine, kuti nyota yikamkonga so cha muyaya: maji gho Ine ndimpaskenge ghaŵenge mwake chisima cha maji ghakubwibwitukiya ku umoyo wamuyaya.”

¹⁵Munthukazi wanguti, “Ambuya, ndipaskeni maji gho, alinga kuti nyota yireke kundiko so, ndi kuti ndireke kuza so kuno kuzachinegha maji.”

¹⁶Yesu wangumnene, “Kamdane mrumi wako, ndi uwere kuno.”

¹⁷Wangwamuka munthukazi, “Ndirive munthurumi.” Wamnene Yesu, “Wakamba umampha, ‘Ndirive munthurumi,’

¹⁸chifukwa waŵa nawo ŵanthurumi ŵankhonde, ndipo yo we nayo sono, kuti ndi mrumi wako cha: ichi nchakuneneska cho wakamba.”

¹⁹Wamnene munthukazi, “Ambuya ndiwona kuti mwe mchimi imwe.

²⁰Auskefwe ŵangusopa mu phiri ili; kweni mutiti mu Yerusalemu mwe malo mwenimo kutenere kusopa.”

²¹Wamnene Yesu, “Wamunthukazi, vwananga mwaku ine kuti lituza ora, penipo chingana ndi mu phiri ili, chingana ndi mu Yerusalemu, kuti musopenge Dada cha.

²²Imwe musopa cho mulive kuziŵa: ifwe tisopa cho tiziŵa: pakuti utaski ngwakutuwa ku ŵaYuda.

²³Kweni ora lituza, ndipo sono liripo penipo ŵasopi ŵenecho ŵamsopenge Dada mu mzimu ndi mu uneneska: pakuti nadi Dada wapenja ŵakumsopa ŵaviyo.

²⁴Chiuta ndi Mzimu: ndipo ŵakusopa iyo ŵatenere kumsopa mu mzimu ndi mu uneneska.”

²⁵Wamnene munthukazi, “Ndiziŵa kuti watuza Mesiya (wakutamulika Kristu) penipo waza iyo, wazamkutitauliya pakweru vinthu vyose.”

²⁶Wamnene Yesu, “Ndine ndawakurongoro nawe.”

²⁷Ndipo panyengo yeniyiya ŵanguza ŵasambizi ŵake; ndipo ŵanguzizwa kuti warongoronga ndi munthukazi; kwenidi kwengavi yumoza wanguti, “Mupenjanji?” pamwenga, “Murongoronji nayo?”

²⁸Viyo munthukazi yo wangulekako chiŵiya chake, wanguruta ku msumba, ndipo wanguŵadana ŵanthu,

²⁹“Zaninga muwone munthu yo wandinene vyose vyo ndachita, Asi mwenuyu ndi Kristu?”

³⁰Ŵangutuwa mu msumba, ndipo ŵanguza kwaku iyo.

³¹Penipo ndipo ŵasambizi ŵake ŵamuŵeyerenga, ŵakuti, “Msambizgi rghani.”

³²Kweni iyo wanguŵanene, “Ine ndi nacho chakurgha, cho mulive imwe kuchiziŵa.”

³³Viyo ŵanenerananga ŵasambizi, “Kumbi yumoza wamtole kurgha?”

³⁴Yesu wanguŵanene, “Chakurgha changu nchakuti ndichitenge khumbo la wakundituma yo, ndi kuti ndifiske mlimu wake.

³⁵Asi mutiti imwe, ‘Kweche myezi yinayi, ndipo chituza chivuna’? Alereni, ndikuneniyani, yinuskani maso ghinu, ndipo thoŵani minda yo, pakuti yacha kali ku chivuna.

³⁶Wakuvuna waronde mphotu, ndipo waronga mbutu ku umoyo wamuyaya; alinga kuti wakumija ndi wakuvuna ŵakondwere pamoza.

³⁷Chifukwa chenichi mazu ngakuneneska, ‘Yumoza ngwakumija, ndi munyake ngwakuvuna.’

³⁸Ine ndingumtumani kuvuna cho imwe mwengavi kutakatakiyapo: ŵanyake ŵangutakataka, ndipo imwe mwasere mu chitakataka chawo.”

³⁹Ndipo mu msumba uwa ŵanandi ŵa ŵaSamaria ŵanguvwaniya mwake pa chifwa cha ukaboni wa mazu gha munthukazi yo, “Wangundinene vyose vyo ndinguchita.”

⁴⁰Ndiviyo po ŵaSamaria wo ŵanguza kwaku iyo, ŵangumuŵeyere kuja nawo: ndipo wanguja kweniko mazuŵa ghaŵi.

⁴¹Wanguvwana ŵanandi pa chifwa cha mazu ghake.

⁴²Ndipo ku munthukazi yo ŵatinge, “Sono tivwana pa chifukwa cha makani ghako pe cha: kweni pakuti taŵeni tijavwiya, ndipo taziŵa kuti kwakuneneska mwenuyu ndi Mtaski wa charu.”

⁴³Pavuli pa mazuŵa ghaŵi wangutuako kweniko, wangurata ku Galile.

⁴⁴Chifukwa Yesu Mwenecho wangusimikizga, kuti mchimi mu charu chake walive ulemu.

⁴⁵Viyo po wanguza mu Galile, ŵaGalile ŵangumronde, ŵati ŵawona vyo vyose wanguchita mu Yerusalemu pa dghera lo: chifukwa iwo nawo so ŵanguruta ku dghera.

⁴⁶Viyo wanguza so ku Kana wa Galile, kweniko wangusanduska maji kuŵa vinyo. Ndipo kwenga nduna yumoza yo mwana wake watamanga mu Kapernaumu.

⁴⁷Wati wavwa kuti Yesu watuwa ku Yuda ndi waza ku Galile, wanguruta kwaku iyo, ndi kumuŵeyere kuti wasike, ndi kuchizga mwana wake: chifukwa wenga pafupi kufwa.

⁴⁸Viyo Yesu wanguti kwaku iyo, “Kwambura kuti mungawona visimisimi ndi minthondwi kuti muvwanenga cha.”

⁴⁹Nduna yo yinguti kwaku iyo, “Ambuya, sikani kenga kandafwe kana kangu.”

⁵⁰Yesu wamnene, “Kanga; mwana wako ngwamoyo.” Munthu yo wanguvwana pa mazu gho Yesu wangumnene, ndipo wanguruta.

⁵¹Sono weche kusika iyo ŵaŵanda ŵake ŵangukumana nayo, ŵakuti mwana wako ngwamoyo.

⁵²Viyo wanguŵafumba ora mo wangwambiya kuchira. Ndipo ŵangumnene, “Zana pa ora lachinkhonde ndi chiŵi muliŵavu mungumtaya.”

⁵³Viyo awiske ŵanguziŵa kuti lenga ora lenilo Yesu wangumnene, “Mwana wako ngwamoyo”: ndipo mwenecho wanguvwana, ndi nyumba yake yose.

⁵⁴Ichi nchisimisimi chachiŵi cho Yesu wanguchita, wati watuwa ku Yuda kuza mu Galile.