Read gitonga Yohane 5 Bible Online

Yohane 5 - gitonga bible

Yohane 5

¹Pavuli paku ichi kwenga dghera la ŵaYuda; ndipo Yesu wanguruta ku Yerusalemu.

²Kweni mu Yerusalemu pa likomo la mberere, mwe chiziŵe chakuzumbulika mu chiHebere, Betesda, chakuŵa ndi makhumbi ghankhonde.

³Mwaku ghenigho mwaranga urapasi wa ŵarwali ŵachiburumutiya, ŵakupunduka, ŵakuphapa. [Wo ŵalindizganga kuvunduka kwa maji;

⁴pakuti mungelo wazanga kaŵikaŵi kwazivunduwa maji. Ndipo maji ghati ghavunduka yo yose wangudanga kubiramo wanguchizigika ku nthenda yose yo wenga nayo.]

⁵Ndipo wengako munthu yumoza, wakuŵa ndi urwali wake virimika machumi ghatatu pachanya vinkhonde ndi vitatu (38).

⁶Yesu wati wamuwona, ndiwati waziŵa kuti wenga ndi urwali kwanyengo yitari, wangumfumba, “Unkhumba kuchizgika kumbi?”

⁷Murwali yo wangumwamuka, “Ambuya, munthu ndirive, wakuti ghachivunduka maji, wanditayemu mu chiziŵe cho: kweni ndeche kuza ine, mbwenu munyake wasika paurongo pangu.”

⁸Wamnene Yesu, “Yuka, nyamuwa mphasa zako, wendenge.”

⁹Ndipo ruŵi munthu yo wanguŵa wanthazi, wangunyamuwa mphasa zake, ndi wendanga. Kweni lenga la Sabata zuŵa lenilo.

¹⁰Viyo ŵaYuda ŵamneniyanga wakuchizgika yo, “Ndi Sabata; ndipo kuti nkhwakwenere iwe cha kunyamuwa mphasa zako.”

¹¹Kweni wanguŵamuka, “Munthu yo wangundichizga, ndiyo wangundinene, ‘Nyamuwa mphasa zako, wendenge.’ ”

¹²Wangumfumba, “Njani munthu yo wangukunene, ‘Nyamuwa mphasa zako, ndi wendenge’?”

¹³Kweni wakuchizgika wengavi kuziŵa kuti wenga yani munthu yo, chifukwa Yesu wangunyeremuka, pakuŵapo mzinda penipo.

¹⁴Pavuli Yesu wangumsaniya mu kasopi, ndipo wangumnene, “Awona, wachizgika: ungalakwanga so cha, vinu chinthu chiheni ku chingakuwiya.”

¹⁵Munthu yo wanguruta, ndipo wanguŵatauliya ŵaYuda kuti ndi Yesu yo wangumchizga.

¹⁶Chifukwa ichi ŵaYuda ŵangumuŵemba Yesu, chifukwa wanguchita ichi pa Sabata.

¹⁷Kweni Yesu wanguŵamuka, “Mpaka sono Ada ŵachita nchitu, ndipo ine nani ndichita.”

¹⁸Viyo chifukwa chenicho ŵaYuda ŵapenjanga ukongwa kumbaya, chifukwa kuti Sabata pe cha, kweni so chifukwa wakambanga kuti Chiuta ndi Wiske wapamtima wake, wakujiyaniska ndi Chiuta.

¹⁹Yesu wanguŵamuka wanguŵanene, “Nadidi, ndikuneneskiyani, Mwana walive nthazi kuchita kanthu pa khumbo lakuyija, kweni keniko wawona Dada wachita: chifukwa vyenivyo wachita Dada, vyenivyo ndivyo Mwana wachita kwakulingana.

²⁰Chifukwa Dada watumwanja mwana, ndipo watumrongo vyo vyose yija wachita: ndipo wamrongonge nchitu zikuru kwaku zenizi, alinga kuti muzizwe imwe.

²¹Chifukwa uli ndimo Dada wayuskiya ŵakufwa ndi kuŵasanduska ŵamoyo, viyo Mwana nayo waŵasanduskenge ŵamoyo ŵeniwo wakhumba.

²²Chifukwa Dada kuti wateruzga yumoza cha, kweni wapaska cheruzgu chose ku Mwana,

²³alinga kuti wose ŵamtumbike Mwana, uli ndimo watumbikiya Dada. Yo wareka kutumbika Mwana, kuti watumbika Dada wakumtuma cha.

²⁴Nadidi, ndikuneneskiyani, yo ngwakuvwa mazu ghangu, ndi ngwakuvwana mwaku yo wangundituma, we nawo umoyo wamuyaya, ndipo kuti watuza ku cheruzgu cha, kweni wajumpha kutuwa ku nyifwa kuya ku umoyo.

²⁵“Nadidi ndikuneneskiyani kuti lituza ora, ndipo sono liripo penipo ŵakufwa ŵavwenge liu la Mwana waku Chiuta; ndipo wo ŵamkuvwa ŵaŵenge ŵamoyo.

²⁶Chifukwa uli ndimo Dada waliri ndi umoyo mwaku yija, viyo so wampaska Mwana kuŵa ndi umoyo mwaku yija,

²⁷ndipo wampaska mtufu kuchita cheruzgu, pakuti ndi Mwana wa munthu.

²⁸Mungarwitanga paku chenichi cha pakuti lituza ora lenilo wose ŵamu miunda ŵakavwanga liu lake.

²⁹Ndipo ŵakatuwangamu; wo mbakuchita umampha ku chiyuka cha umoyo; kweni wo mbakuchita viheni kuchiyuka cha chisusa.

³⁰“Ine ndirive nthazi kuchita kanthu mwaku ndija: mo ndivwiya, nditeruzga; ndipo cheruzgu changu nchirunji; pakuti ndipenja khumbo langu cha, kweni khumbo laku yo wangundituma.

³¹Asani ndijisimikizgiya mwaku ndija, chisimisimi changu kuti nchakuneneska cha.

³²Kwe munyake yo ngwakusimikizgiya paku ine; ndipo ndiziŵa kuti chisimisimi cho watindisimikizgiya nchakuneneska.

³³Mungutuma kwaku Yohane, ndipo wakusimikizga uneneska.

³⁴Kweni kuti nchifukwa chakuti nditenere chisimisimi chakutuwa ku munthu cha: kweni ndikamba ivi, alinga kuti imwe mutaskike.

³⁵Yuwa wenga lumbuni lakukole ndi lakuŵala; ndipo imwe mungukhumba kusangaruskika kwa kanyengo mu ukweru wake.

³⁶Kweni ine nde nawo ukaboni mwakundamweni ukuruku kwakuruska wo waku Yohane; chifukwa nchitu zo Dada wandipaska kuti ndifiske, nchitu zo ine ndichita, zenizo zisimikizgiya ine, kuti Dada wandituma.

³⁷Ndipo Dada yo wandituma, ndiyo warongorore mwaku ine. Inwe kuti mukuvwapo mazu ghake cha, kuti mukuwonapo chisku chake cha;

³⁸viyo mazu ghake kuti ghajaririya mwinu cha, chifukwa kuti muvwana mwaku yo iyo wangumutuma cha.

³⁹Mupenja mu malembo, pakuti mutiti mwaku ghenigho mwe nawo umoyo wamuyaya: ndipo ghenagha ndigho ghasimikizgiya ine;

⁴⁰kweni kuti mukhumba kuza kwaku ine cha, mwakuti muŵe umoyo.

⁴¹Unkhankhu kuti ndironde ku ŵanthu cha.

⁴²Kweni ndiziŵa kuti mulive chanju chaku Chiuta mwaku mwaŵeni.

⁴³Ine ndaziya mu zina la Ada, ndipo kuti mutindironde cha; asani munyake wangaziya mu zina laku yija, mumrondiyenge mweniyo.

⁴⁴Mungavwana uli imwe, mwaŵakuronderana unkhankhu, ndipo unkhankhu waku tuwa kwaku Chiuta yija kuti mutiwulemba cha?

⁴⁵Mungarunguruka cha kuti ine ndikusumuweninge ku Ada: wakukusumuwani walipo, ndi Mosese, mwakumweniyo mwagomekezga.

⁴⁶Chifukwa asani mwavwananga ndi Mosese mphanyi mwavwana ndi ine; chifukwa wangulemba iyo vya paku ine.

⁴⁷Kweni asani mu malembo ghake mulive kuvwaniya, muvwaniyenge uli mu maneno ghangu?”