Read gitonga Yohane 7 Bible Online

Yohane 7 - gitonga bible

Yohane 7

¹Ndipo pavuli paku vyenivi Yesu wendayendanga mu Galile: kuti wakhumbanga kwendayenda mu Yuda cha, pakuti ŵaYuda ŵapenjanga kumbaya.

²Kweni dghera la ŵaYuda la Misasa, lenga pafupi.

³Viyo ŵabali ŵake ŵangumnene, “Tuwapo panu, ukenge mu Yuda, alinga kuti ŵasambizi ŵako nawo ŵawone nchitu zo uchita.

⁴Pakuti palive yumoza wachita kanthu ku ubende, asani wapenja kuziŵikwa pakweru. Asani uchita ivi, ujirongo ku charu.”

⁵Chifukwa chingana mbabali ŵake kuti ŵanguvwana mwaku iyo cha.

⁶Yesu waŵanene, “Nyengo yangu yindaze; kweni nyengo yinu njakurongosoleka mazuŵa ghose.

⁷Kuti charu chingatinkha imwe cha; kweni chitinkha ine, pakuti ine ndisimikizgiya paku cho, kuti ziheni nchitu zake.

⁸Rutaninge imwe ku dghera lo: ine kuti ndirutenge ku dghera ili cha, pakuti nyengo yangu yindafiskike.”

⁹Ndipo wati waŵakambiya vyenivi, wangutandara mu Galile.

¹⁰Kweni ŵanguti ŵaruta ŵabali ŵake ku dghera lo, iyo nayo wangukweriyako, pakweru cha, kweni ku ubende.

¹¹Viyo ŵaYuda ŵampenjanga mu ghera lo, ndipo ŵatinge, “We pani?”

¹²Ndipo kwenga dinginiku likuru lasuskanu paku iyo mu mizinda yo; ŵanyake ŵatinge, “Ngwamampha”; kweni ŵanyake ŵatinge “Awa, wapuruska ŵanthu.”

¹³Ndikweni pengavi yumoza warongororenga pakweru gha paku iyo, chifukwa cha kopa ŵaYuda.

¹⁴Kweni pakati pa dghera lo Yesu wangukwere mu kasopi ndipo wasambizganga.

¹⁵Viyo ŵaYuda ŵanguzizwa, ŵakuti, “Mweniyu waziŵa uli malembo, wambura kusambira?”

¹⁶Yesu wanguŵamuka, “Chisambizgu changu kuti nchangu cha, kweni ncha Wakundituma.

¹⁷Asani munthu wakhumba kuchita khumbo laku Chiuta waziŵenge chisambizgu cho ndisambizga, vinu nchakutuwa kwaku Chiuta, pamwenga ine ndirongoro vya mu mazaza gha mwaku Ndamweni.

¹⁸Wakurongorore mu mazaza ghaku yija wapenja unkhankhu wapa mtima wake; kweni wakupenja unkhankhu wa wakumtuma, ndiyo mneneska, ndipo utesi mulive mwaku iyo.

¹⁹Mosese wangukupaskani langulu? Ndipo palive yumoza mwaku imwe wasunga langulu. Chifukwa chine mulembe kundibaya?”

²⁰Mzinda wo ungwamuka, “We nayo demone: njani walembe kukubaya?”

²¹Yesu wangwamuka wanguŵanene, “Nchitu yimoza ndinguchita, ndipo mose muzizwa.

²²Pa chifwa chenichi Mosese wangukupaskani langulu la mchinju (nanga kuti likutuliya kwaku Mosese cha kweni ndakutuliya ku ŵambuyamwe); ndipo pa sabata muchinja munthu.

²³Asani munthu waronde mchinju pa sabata, mwakuti langulu laku Mosese lireke kusweka, kumbi mutundiriya ine, chifukwa ndinguchizga munthu pa sabata?

²⁴Mungeruzga kwakuyana ndi kawonekero cha, kweni mweruzge cheruzgu chirunji.”

²⁵Viyo ŵanyake ŵamu Yerusalemu ŵanguti, “Asi ndi mweniyo yo ŵalembe kubaya?

²⁶Onani, warongoro pakweru, ndipo kuti ŵakamba kanthu cha. Kumbi ŵara ŵaziŵadi kuti mwenuyu ndi Kristu?

²⁷Tiziŵa mwenuyu ko watuwa: kweni po wazenge Kristu palive yumoza waziŵenge ko watuwa.”

²⁸Viyo Yesu, wachisambizga mu kasopi wangukambura, “Ine mutindiziŵa, ndipo muziŵa ko ndatuwa; kuti ndaza mukhumbo laku ine ndamweni cha, wakundituma ngwakuneneska, mweniyo imwe kumziŵa.

²⁹Ine nditumziŵa, pakuti ndatuwa kwaku iyo, ndipo ndiyo wangundituma.”

³⁰Viyo ŵalembanga kumko: ndikweni kwengavi yumoza wanguŵikapo pake janja, pakuti ora lake lenga lindaze.

³¹Kweni ŵanandi ŵamu mzinda wo wanguvwana mwake, ndipo watinge, “Penipo wazenge Kristu yo, kumbi wazamchita visimikizgu vinandi kwakuzungura vyo wachita mwenuyu?”

³²ŴaFarisi wanguvwa mzinda uchidinginika paku iyo; ndipo ŵazukuru ŵara ndi ŵaFarisi ŵangutuma ŵamirizi mwakuti ŵamko.

³³Yesu wanguti, “Nyengo yimanavi ndeche namwe pamoza, ndipo ndiruta kwaku yo Wakundituma.

³⁴Mundilembenge, kweni kuti mundisaniyenge cha: ndipo ko nde ine imwe kuti muziŵa kuzako cha.”

³⁵Viyo ŵaYuda ŵangunenerana, “Wakhumba kuya nunkhu uyu, ko ifwe kuti timsaniyenga cha? Kumbi wakhumba kuya ku misumba ya ŵaGriki, mo ŵaYuda ŵaja ndi kusambizga ŵaGriki?

³⁶Ngane mazu gho watiti, ‘Mundilembenge, ndipo kuti mundisaniyenge cha’: ndipo, ‘Ko nde ine imwe kuti muziŵa kuzako cha’?”

³⁷Zuŵa lakumariya, la dghera, lenga zuŵa likuru, wanguma Yesu ndipo wangukambura, wakuti, “Asani munthu we ndi nyota, waze kwaku ine, ndi wamwe.

³⁸Wakuvwana mwaku ine nge ndimo lenene lembo lo, ‘Kutuwa mu moyo mwake yitaŵarenge misinji ya maji gha umoyo.’ ”

³⁹Kweni wanenanga yagha pa Mzimu, mweniyo wakuvwaniya mwake watinge warondiyenge, chifukwa mzimu wenga wandapaskike; pakuti Yesu ndiyo wenga wandayukiye ku unkhankhu.

⁴⁰Ŵamu mzinda pakuvwa mazu gho ŵatinge, “Nadidi, mwenuyu ndi mchimi yo.”

⁴¹Ŵanyake ŵatinge, “Mwenuyu ndi Kristu.” Kweni ŵanyake ŵatinge, “Awa na, kumbi Kristu watuwa ku Galile?

⁴²Asi lembo lo linguti, kutuwa ku mbeu ndiku Betelehemu ku muzi ko wenga Davidi, watuza Kristu?”

⁴³Viyo mu mzinda wo munguŵa gawukanu pachifukwa chake.

⁴⁴Ndipo ŵanyake mwaku wo ŵakhumbanga kumko, kweni kwengavi yumoza wanguŵikapo pake manja.

⁴⁵Viyo ŵamirizi wo ŵanguza ku ŵazukuru ŵara ndi ŵaFarisi ndipo ŵeniŵa ŵanguŵafumba, “Chifukwa chine mwareka kumko?”

⁴⁶Wangwamuka ŵamirizi, “Chingana ndi kali munthu kuti wangurongoro viyo cha.”

⁴⁷Viyo wanguŵamuka ŵaFarisi wo, “Kumbi imwe namwe so mwarandizgika?

⁴⁸Kumbi yumoza wamu ŵara, pamwe wamu ŵaFarisi wavwaniya mwake?

⁴⁹Kweni mzinda uwu wambura kuliziŵiska langulu, ngwakutembeka.”

⁵⁰Nikodemu yo wanguza kwake kali, wakuŵa yumoza wamwaku wo, wanguŵafumba,

⁵¹“Kumbi langulu lidu literuzga munthu kwambura kuti lavwa danga kwaku iyo, ndi laziŵa cho wachita?”

⁵²Wangwamuka, ŵangunena nayo, “Kumbi nawe so we waku Galile? Penja, ndipo ukawonanga kuti ku Galile kuti wayuka mchimi cha.” [

⁵³Ndipo munthu yose wanguruta ku nyumba yake.