Read gitonga Yohane 9 Bible Online

Yohane 9 - gitonga bible

Yohane 9

¹Ndipo wachiruta, wanguwona munthu wachiburumutiya kutuwa ku kawi.

²Ndipo ŵasambizi ŵake ŵangumfumba, ŵakuti, “Msambizgi, wangulakwa njani, mwenuyu pamwe ŵapapi ŵake, kuti wanguwa wachiburumutiya?”

³Wangwamuka Yesu, “Chingana ndi mwenuyu kuti wangulakwa cha, chingana mbapapi ŵake; kweni alinga kuti zirongoleke mwake nchitu zaku Chiuta.

⁴Titenere kuzitata nchitu za Wakundituma, kweche msana: kutuza usiku, penipo palive yumoza waziŵa kutata nchitu.

⁵Ndeche mu charu, ndine Kungweruka kwa charu.”

⁶Wanguti wakamba viyo, wangufunyiya matapasi, wangukantha dongu ndi mata gho, ndipo wangung'eteka dongu lo pa maso ghake,

⁷kwaku iyo wanguti, “Kanga, kasambe mu chiziŵa chaku Siloama” (lo ling'anamuka, wakutumika). Viyo wanguruta, wangwachisamba, ndipo wanguwe wakulereska.

⁸Viyo ŵanase, ndi wo ŵamwonanga kali kuti wenga mpempha, ŵanguti, “Asi uyu ndi mweniyo wajanga pasi wakupempha?”

⁹Wanyake ŵanguti, “Ndiyo”: ŵanyake, “Awa, kweni wakozgana nayo.” Iyo wanguti, “Ndine na!”

¹⁰Viyo ŵangumfumba, “Ghangubanuka uli maso ghako?”

¹¹Iyo wangwamuka, “Munthu yo wadanika Yesu wangukantha dongu, wangung'eteka maso ghangu, wangundinene, ‘Kanga ku Siloama, kasambe’: viyo ndinguruta ndingwachisamba, ndipo ndilereska.”

¹²Wangumnene, “We pani iyo?” Wanguti, “Kuti ndiziŵa cha.”

¹³Ŵangumtole ku ŵaFarisi yo kali wenga wachiburumutiya.

¹⁴Lenga zuŵa la sabata po Yesu wangukantha dongu, ndi kubamuwa maso ghake.

¹⁵Viyo ŵaFarisi nawo ŵafumbanga so mo wangulereske. Iyo wanguŵanene, “Wanguŵika dongu mu maso ghangu, ndipo ndingwachisamba ndipo sono ndilereska.”

¹⁶Viyo ŵanyake ŵamu ŵaFarisi wo ŵanenanga, “Munthu mweniyo kuti ngwakwaku Chiuta cha, pakuti wareka kusunga sabata.” Kweni ŵanyake ŵanguti, “Waziŵa uli munthu mulakwi kuchita visimikizgu vyaviyo?” Ndipo kwenga gaukanu mwaku wo.

¹⁷Viyo ŵangumfumba wachiburumutiya, “Iwe utitinji ndi iyo, po wabanuwa maso ghako?” Iyo wanguti, “Ndi mchimi.”

¹⁸Viyo ŵaYuda wo ŵengavi kuvwana ndi iyo, kuti wanguŵa wachiburumutiya, ndi wangulereska so, mpaka ŵangudana ŵapapi ŵake ŵaku yo wangulereska so, ndi kuŵafumba, kuti,

¹⁹“Kumbi uyu ndi mwana winu, yo imwe mutiti wangupapika wachiburumutiya? Na sono walereska uli?”

²⁰Ŵangwamuka ŵapapi, ŵake, wanguti, “Tiziŵa kuti uyu ndi mwana widu, ndipo kuti wangupapika wachiburumutiya.

²¹Kweni po walereske sono, kuti tiziŵa cha; chingana ndi yo wangubanuwa maso ghake, ifwe tirive kuziŵa: mufumbeni, ndi mura iyo; wajikambiyenge mweneko.”

²²Wapapi ŵake ŵakambanga ivi pakuti wopanga ŵaYuda: chifukwa ŵangupangana kali ŵaYuda, kuti asani yumoza wangamzomerezga kuŵa Kristu, wasezgekenge mu sinagoge.

²³Chifukwa cho ŵapapi ŵake ŵanguti, “Ndi mura; mufumbeni iyo.”

²⁴Viyo ŵangumdana kachiŵi munthu yo wenga wachiburumutiya, ndipo ŵangunena nayo, “Paska unkhankhu kwaku Chiuta: ifwe tiziŵa kuti munthu yo ndi mlakwi.”

²⁵Iyo wangwamuka, “Chakuti ndi mlakwi, kuti ndiziŵa cha; chinthu chimoza ndiziŵa, kuti ndenga wachiburumutiya, ndipo sono ndilereska.”

²⁶Ŵangumufumba, “Wangukuchitiya chine? Wangubanuwa uli maso ghako?”

²⁷Wanguŵamuka, “Ndakuneniyani kali, kumbi kuti mwavwa cha: mukhumba kuvwanji so? Kumbi imwe mukhumba kuŵa ŵasambizi ŵake namwe?”

²⁸Viyo ŵangumtuka, ŵakuti, “Iwe ndiwe msambizi waku yo; ifwe te ŵasambizi ŵaku Mosese.

²⁹Tiziŵa ifwe kuti Chiuta wangurongoro kwaku Mosese, kweni ghapa munthu uyu, kuti tiziŵa cha ko watuwa.”

³⁰Wangwamuka munthu yo wanguŵanene, “Nadi chinthu ichi nchakuziziswa mbweni, kuti imwe mureka kuziŵa ko watuwa, kweni awonani wabanuwa maso ghangu.

³¹Tiziŵa kuti Chiuta wareka kuvwa ŵalakwi; kweni asani yumoza ndi muwopa Chiuta, ndi wachita khumbo lake, watumuvwa mweniyo.

³²Kutuwa ku mtendeku mu charu kuti kwavwika cha kuti yumoza wangubanuwa maso gha wakupapika wachiburumutiya.

³³Asani munthu uyu wengavi kutuwa kwaku Chiuta, mphanyi wengavi nthazi kuchita kanthu.”

³⁴Wangumwamuka, “Iwe ungupapika mu vilakwa kosekose, ndipo kumbi usambizga ifwe?” Ndipo ŵangumdikiya kubwaro.

³⁵Yesu wanguvwa kuti ŵamudikiya kubwaro; ndipo wati wambowozga wanguti, “Kumbi uvwana iwe mu Mwana waku Chiuta?”

³⁶Iyo wangwamuka wanguti, “Ndipo ndi yani, Ambuya, alinga kuti ndivwane mwaku iyo?”

³⁷Yesu wangumnene, “Wamwona, ndipo ndimweniyo so warongoro nawe.”

³⁸Ndipo iyo wanguti, “Ambuya ndivwana.” Ndipo wangumlambiya.

³⁹Yesu wanguti, “Ine ndikuziya cheruzgu mu charu chino, mwakuti wambura kuwona wawone; ndi wakulereska waŵe wachiburumutiya.”

⁴⁰Wamu ŵaFarisi wo ŵanguŵanayo pamoza ŵati ŵavwa yagha ŵangumufumba, “Kumbi ifwe nafwe te ŵachiburumutiya?”

⁴¹Yesu wanguŵanene, “Ne mwenga wachiburumutiya, mphanyi mwengavi ulakwi, kweni sono pakuti mutiti, ‘Tiwona:’ ipu ulakwi winu ujaririya.