Read gitonga Machitidu gha Ŵakutumika 1 Bible Online

Machitidu gha Ŵakutumika 1 - gitonga bible

Machitidu gha Ŵakutumika 1

¹Mu mazu ghakudanga gho, a Teofilo, ndingukonkhoska vyose vyenivyo Yesu wangwanda kuchita ndi so kusambizga,

²mpaka ku zuŵa lo wangurondeke kuchanya, wati waŵalanguliya mu Mzimu Wakupaturika ŵakutumika[1] ŵeniwo wangusankha.

³Kwaku wo wangujirongo so wamoyo pavuli pa kukomwa kwake, mu visimikizgu vinandi, wakuŵawoneke mu mazuŵa machumi ghanayi, ndi wakukamba vyapa ufumu waku Chiuta.

⁴Ndipo, pakuwungana pamoza nawo, wanguŵalanguliya kuti ŵareke kutuwako ku Yerusalemu, kweni kuti ŵalindizge phanganu lo la Dada, lenilo, wanguti, “Munguvwa kwaku ine,

⁵pakuti Yohane iyo wangubatiza ndi maji, kweni imwe mubatizikenge ndi Mzimu Wakupaturika, ghandakepo mazuŵa ghanandi.”

⁶Viyo iwo pakuwungana pamoza ŵamfumbanga, ŵakuti, “Ambuya kumbi pa nyengo yeniyi mukawerezgiyanga ufumu wo kwaku Yisraele?”

⁷Kweni wanguŵanene, “Kuti nkhwaku imwe cha kuziŵa zinyengo pamwenga virimika vyo Dada wateme mu mtufu waku yija.

⁸Kweni mwamronde nthazi wati waziya paku imwe Mzimu Wakupaturika, ndipo mundiŵiyenge ŵakaboni mosemose mu Yerusalemu, ndi mu Yuda yose ndi Samaria, ndi ku vigoti vya panupasi.”

⁹Ndipo wanguti wakamba mazu yagha, ŵachilereska iwo, wangutoreke kuchanya; ndipo mtambo ungumronde ku maso kwawo.

¹⁰Ndipo po ŵalereskanga dodoli kuchanya, wachiruta iyo, onani, ŵanthurumi ŵaŵi, mu kavwaridu katuŵa, ŵamiyanga pafupi pawo,

¹¹wo nawo ŵanguti, “Mwaŵanthu ŵaGalile, mwamiyanji ŵakulereska kuchanya? Mwenuyu Yesu, yo warondekako kwinu kuruta kuchanya wamkuza viyo mo mwamwone wachiruta kuchanya.”

¹²Sono ŵanguwere ku Yerusalemu kutuwa ku phiri lo lizumbulika Olivete, lo le kufupi ku Yerusalemu, rwendo lapa sabata.

¹³Ndipo ŵati ŵaseremo, ŵangukwera ku chipinda cho chamuchanya, mwenimo ŵajanga; Petro iyo ndi Yohane ndi Yakobe ndi Andreya, Filipu ndi Tomase, Bartolomeyu ndi Mateyu, Yakobe mwana waku Alifeyu, ndi Simone mZelote, ndi Yuda mwana waku Yakobe.

¹⁴Yaŵa wose ŵajaririyanga kwa mtima umoza mu kuromba, pamoza ndi ŵanthukazi, ndi Mariya ŵanyina ŵaku Yesu, ndi pamoza ndi ŵahurwa ŵake.

¹⁵Ndipo mu mazuŵa ghenagha wangusoka Petro mukati mu ŵabali wo, ndipo wanguti (unandi nawo wa ŵanthu pamoza wenga akhumba machumi pe chumi ndi machumi ghaŵi),

¹⁶“Mwaŵanthu mwa ŵabali, lingwenere kufiskika lembo lo, lenilo Mzimu Wakupaturika wangukambiya limu mu mlomo waku Davidi la paku Yuda, yo wenga chirongozgi kwaku wo ŵangumko Yesu.

¹⁷Pakuti wangupendeke pamoza nafwe, ndipo wanguronde chigaŵa chake cha uteŵeti uwu.

¹⁸(Ndipo mweniyo wangujiguliya kacharu ndi mphotu ya uwuraurunji wake; ndipo pakuwa pasi kasindira mutu, wanguphumuka mukati, ndi matumbo ghake ghose ghangupunguka.

¹⁹Ndipo kunguziŵikwa kwaku wose ŵakuja mu Yerusalemu, viyo kuti kacharu ka kanguzumbulika mu karongoroledu kawu Akeldama, ndiku kuti, Kacharu ka ndopa.)

²⁰Chifukwa kwalembeka mu buku la Sumu, ‘Chakujamo chake chiŵe mapopa, ndi mwake mungaŵa wakujamo cha’: ndipo ‘Mlimu wake urondeke ndi munyake.’

²¹“Viyo mu ŵanthurumi wo ŵenda nafwe pamoza nyengo yose mwenimo Ambuya Yesu waserenga ndi watuwanga mukati mwidu,

²²kwanda ku chibatizo chaku Yohane mpaka ku zuŵa lenilo wangurondeke kwaku ifwe, kutenere kuti waŵepo pamoza nafwe yumoza waku wo nge ndi kaboni wa chiyuka chake.”

²³Ndipo ŵangumika ŵaŵi Yosefe wakuzumbulika Barsaba, yo wangutamulika so Yusto, ndi Matiya.

²⁴Ndipo ŵanguromba, ŵakuti, “Imwe, Ambuya, mwaŵakuziŵa mitima yaku wose,

²⁵rongoni mwaku wo ŵaŵi yo mwamsankhiya kuronde chigaŵa cha uteŵete uwu ndi utumi kwaku weniwo wangudezukako Yuda, kwachiruta ku malo ghapa mtima wake.”

²⁶Ndipo ŵanguŵapenduzgiya; ndipo mphenduzga yinguwiya paku Matiya; ndipo wangupendeke pamoza ndi ŵakutumika chumi ndi yumoza wo.