Read gitonga Machitidu gha Ŵakutumika 10 Bible Online

Machitidu gha Ŵakutumika 10 - gitonga bible

Machitidu gha Ŵakutumika 10

¹Ndipo kwenga mu Kaisarea munthurumi yumoza, zina lake Kornelio, Kenturione wa liŵanja, lakudanika la Italia,

²msopa, ndi wakopa Chiuta pamoza ndi nyumba yake yose, yo wachitiyanga khamu lo vyalisungu vinandi, ndi waninizikiyanga Chiuta rutaruta.

³Nge mpha ora lichinkhonde ndi chinayi la msana wanguwona pakweru mu chiwona mungelo waku Chiuta kusere kwaku iyo, ndi kunena nayo, “Kornelio!”

⁴Ndipo iyo, pakumlereska dodoli, ndi pakuŵa wachitenthe, wanguti, “Nchine, Ambuya?” Ndipo wangumunene, “Maniniziku ghako ndi vyalisungu vyako vyakwera uli nchikumbusku paurongo paku Chiuta.

⁵Ndipo sono tuma ŵanthu ku Yopa, ndi mdaneko Simoni, yo wadanika so Petro:

⁶yo watandara ndi yumoza, Simoni mfufuta, nyumba yaku yo ye ku mphepete kunyanja.”

⁷Ndipo wachiruta mungelo yo wangurongoro nayo, wangudana ŵaŵi ŵa ŵamunyumba yake, ndi wankhondo msopa, waku wo ŵamlindanga rutaruta;

⁸ndipo wati waŵapatauliya vyo vyose, wanguŵatuma ku Yopa.

⁹Kweni ndi mlenji, ŵachiruta ŵeniŵa mu nthowa ndi kuŵandika ku msumba wo, Petro wangukwere pa nyumba pachanya kwachiromba, akhumba pa ora lachinkhonde ndi chomoza.

¹⁰Ndipo wanguŵa wa nja, ndipo wakhumbanga kurgha; po kwarongosorekanga kurgha, lingumuŵiya lotu;

¹¹ndipo wanguwona kuchanya kwajurika, ndipo chiyaŵi chakuti chisika, nge nchisaru chikuru, chakudoromoke pasi cha nyondu zinayi.

¹²Mwenimo mwenga vyose vya marundi ghanayi ndi vyakukwaŵa vyapasi ndi viyuni vyamude.

¹³Ndipo ghangumziya mazu, “Yuka, Petro; baya ndi urghe!”

¹⁴Kweni Petro wanguti, “Awa na, Ambuya: pakuti kali kose ndirive kurgha kanthu kaŵaka ndi kamwikhu.”

¹⁵Ndipo mazu ghangumziya so kachiŵi, “Vyo Chiuta watozga, ungavinguzga iwe cha.”

¹⁶Ndipo chenichi chinguŵapo katatu: ndipo ruŵiruŵi chingurondeka kuchanya chiyaŵi cho.

¹⁷Ndipo Petro wachisuzgika mu mtima mwaku yija, chingaŵanji chiwoniwoni cho chenicho wawona, wonani, ŵanthurumi wo ŵangutumika ndi Kornelio, ŵati ŵafumbiriya ndi nyumba yaku Simoni, ŵanguma pa likomo,

¹⁸ndipo pakudana ŵafumbanga vinu Simoni, wakudanika so Petro, watandaranga kweniko.

¹⁹Ndipo wachirunguruka Petro ndi chiwona cho, “Mzimu wangumunene, awona, ŵanthurumi ŵatatu ŵatukulembe.

²⁰Kweni yuka, sika, ndi urutenge pamoza nawo, kudonda kanthu cha: pakuti ndaŵatuma ine.”

²¹Ndipo Petro wangusikiya ku ŵanthu wo, ndipo wanguti, “Awonani, ndine yo mfumbiriya: nchine chifukwa cho mwaziya?”

²²Ndipo ŵanguti iwo, “Kenturione Kornelio, munthu murunji ndi wakopa Chiuta, wakusimikizgika so ndi mtundu wose wa ŵaYuda, wangupangizgika ndi mungelo wakupaturika kwachidaniya iwe ku nyumba yake, ndi kuvwa kwako makani.”

²³Viyo wanguŵadaniya, ndi wanguŵatandariska. Ndipo ndi mlenji wangusoka ndi wanguruta pamoza nawo, ndipo ŵanyake ŵa ŵabali ŵaku Yopa ŵangurongozgana nayo.

²⁴Ndipo ndi mlenji wangusere mu Kaisarea. Ndipo Kornelio yo waŵalindizganga wati wadaniya pamoza ŵabali ŵake ndi ŵabwezi ŵapafupi.

²⁵Ndipo kunguŵa kuti, wachisere Petro, Kornelio wangukumana nayo, ndipo pakuwa pa marundi ghake wangumlambiya.

²⁶Kweni Petro wangumyuska, wakuti, “Soka ni; nane ndamweni nde munthu.”

²⁷Sono wachirongoro nayo, wangusere, ndipo wangusaniya ŵanandi ŵaungana pamoza.

²⁸Ndipo wangunena nawo, “Imwe muziŵa kuti nkhwamwikhu ku munthu mu Yuda kwenderana nayo wa mtundu unyake pamwenga kuza kwake; ndikweni Chiuta wandirongo kuti ndingamzumbuwa cha munthu waŵaka pamwenga wawiyu.

²⁹Chifukwa chenicho, ndati ndadanika, ndaza kwambura kukana, viyo ndifumba mwandidaniya chine.”

³⁰Ndipo Kornelio wanguti, “Ghandakepo mazuŵa ghanayi, po ora lenilino, ndarombanga mu nyumba yangu maniniziku ghamazulo; ndipo, wonani, munthu mu kavwaridu kakuŵala wanguma paurongo pangu,

³¹ndipo wali, ‘Kornelio, niniziku lako lavwika, ndipo vyakumbukika paurongo paku Chiuta vyalisungu vyako.

³²Viyo tumanga ku Yopa, ndi ujidaniye Simoni, yo wazumbulika so Petro; watandara iyo mu nyumba yaku Simoni, mfufuta, ku mphepete ku nyanja.’

³³Sosonukweni viyo ndingutuma kwako; ndipo wachita umampha kutifika. Viyo sono tose tiripo paurongo paku Chiuta kuvwa vyose vyo walangulikiya ndi Chiuta.”

³⁴Ndipo Petro wangujura mlomo, ndipo wanguti, “Kwakuneneska nditeska kuti Chiuta ndi mrumbachisku cha;

³⁵kweni mu mtundu wose yo watumopa ndi watataliya urunji ngwamarondeka kwaku iyo.

³⁶Uziŵa mazu gho wangutumiya ŵana ŵaku Yisraele ghakugozge chimangu mwaku Yesu Kristu (ndiyo Mbuya waku wose),

³⁷makani ghenigho muziŵa imwe, mo ghawandiya mu Yuda yose, kwandako ku Galile, pavulipa chibatizo cho wangumemeza Yohane;

³⁸mo Chiuta wangupatuliya Yesu waku Nazarete ndi Mzimu Wakupaturika ndipo ndi nthazi: mweniyo wangwendayenda wakutata vyamampha, ndi wakuchizga wose ŵakuyuzgika ndi diabolo; pakuti Chiuta wenga nayo.

³⁹Ndipo te ŵakaboni ifwe ŵaku vyose vyo wanguchita mu charu cha ŵaYuda, ndi so mu Yerusalemu; mweniyo nayo ŵangubaya, pakumpayika pa muti.

⁴⁰Mweniyo Yesu, Chiuta wanguyuska pa zuŵa lachitatu, ndipo wangumpaska kurongoleka,

⁴¹ku khamu lo lose cha, kweni ku ŵakaboni ŵakusankhikiya limu ndi Chiuta, nadi kwaku ifwe taŵenifwe tingurgha ndi tingumwa pamoza nayo, wanguti wayuka iyo ku ŵakufwa.

⁴²Ndipo wangutilanguliya kutauliya khamu lo, ndi kusimikizga kuti ndiyo watemeke ndi Chiuta kuŵa Cheruzga wa ŵamoyo ndi ŵakufwa.

⁴³Kwaku mweniyo ŵamchimi wose ŵasimikizgiya, kuti yose wakuvwana mwaku iyo warondenge mu zina lake chireke cha vilakwa.”

⁴⁴Weche kurongoro Petro makani yagha, Mzimu Wakupaturika wanguza paku wose wo ŵavwanga gho mazu.

⁴⁵Ndipo ŵakuvwana ŵamu ŵakuchinjika wo wose ŵanguza pamoza ndi Petro, ŵanguzizwa kuti pa ŵaMitundu nawo ungupungulikiya mpasku wo wa Mzimu Wakupaturika.

⁴⁶Chifukwa ŵaŵavwanga kurongoro ndi malilime, ndi kumkuzga Chiuta.

⁴⁷Sono wangwamuka Petro, “Kumbi waziŵa yumoza kuŵakaniya maji, kuti ŵareke kubatizika, wo ŵaronde Mzimu Wakupaturika ngendi ifwe?”

⁴⁸Ndipo wangulanguliya kuti ŵabatizikiye mu zina laku Yesu Kristu. Sono ŵangumuŵeyere kutandarapo mazuŵa ghakuti.