Read gitonga Machitidu gha Ŵakutumika 11 Bible Online

Machitidu gha Ŵakutumika 11 - gitonga bible

Machitidu gha Ŵakutumika 11

¹Kweni ŵakutumika ndi ŵabali ŵamu Yuda ŵanguvwa kuti ŵaMitundu nawo ŵanguronde mazu ghaku Chiuta.

²Ndipo penipo Petro wangukwera ku Yerusalemu, ŵamu ŵakuchinjika ŵasuskananganayo, ŵakuti,

³“Ungusere ku ŵanthu ŵambura kuchinjika, ndipo ungurgha pamoza nawo.”

⁴Kweni wangwamuka Petro, ndipo wanguŵapatauliya kwamuruli kukutuwa ku chiyambo, wakuti,

⁵“Ndenga ine mumuziwa Yopa, ndipo ndarombanga; ndipo mulotu ndinguwona chiwona, chiyaŵi chakuti, chakusikange nchisaru chikuru chakudoromoka kuchanya chanyondu zinayi; ndipo chingusikiya mpaka kwaku ine: mwaku chenicho,

⁶ndinguti ndalereska, ndi kuthoŵa, ndinguwonavya marundi ghanayi, vyapasi ndi vikovu ndi vyakukwaŵa ndi viyuni vya mude.

⁷Ndipo so ndinguvwa liu lakukamba nane, ‘Yuka, Petro; baya ndi urghe.’

⁸Kweni ndinguti, ‘Awa na, Ambuya: pakuti chawaka pamwe chawiyu kuti chasere mu mlomo wangu kali kose cha.’

⁹Kweni liu lingwamuka kachiŵi kutuwa kuchanya, ‘Vyenivyo Chiuta watozga, ungazumbuwa vyawaka iwe cha.’

¹⁰Ndipo chenichi chingichitika katatu: ndipo vyo vyose vinguguzikiya kuchanya so.

¹¹Ndipo wonani, sosonukweni ŵanthu ŵatatu ŵanguma kubwaro ku nyumba mwenimo tenga, ŵakutumika kwaku ine kutuwa ku Kaisarea.

¹²Ndipo Mzimu wangundinene kuruta pamoza nawo, wakukayika cha. Ndipo pamoza nane ŵangurongozgana ŵabali ŵenaŵa nawo ŵankhonde ndi yumoza; ndipo tingusere mu nyumba ya munthu yo.

¹³Ndipo iyo wangutikonkhome mo wangumuwone mungelo wakuma mu nyumba yake, ndi wakumunene, ‘Tuma ku Yopa, ndi ujidaniye Simoni, yo wazumbulika so Petro;

¹⁴wakukambiyenge makani, mwaku gho utaskikiyenge, iwe ndi nyumba yako yose.’

¹⁵Kweni ndichamba ine kukamba, Mzimu Wakupaturika iyo wanguwiya paku wo uli mphaku ifwe so pa mtendeku.

¹⁶Ndipo ndingukumbuka kakambidu ka Ambuya, po ŵangunene, ‘Yohane nadi wangubatiza ndi maji, kweni imwe mwambatizika ndi Mzimu Wakupaturika.’

¹⁷Viyo asani kwaku iwo Chiuta wangupaska mpasku uli nkhwaku ifwe nafwe, taŵakuvwana mu Ambuya Yesu Kristu, ndenga yani ine, kuti ndimikane ndi Chiuta?”

¹⁸Ndipo ŵachivwa vyenivi, ŵanguchetama, ndipo ŵangumkankhuska Chiuta ŵakuti, “Ndipo ku ŵaMitundu nawo Chiuta wapaska ching'anamuka cha mu mtima ku umoyo.”

¹⁹Viyo ŵeniwo ŵangumwaranikiya pa suzgu yakuwiya paku Stefano, ŵanguporota mpaka ku Fenikia ndi Kupro ndi Antioke, ŵakukamba mazu ku yumoza cha kweni ku ŵaYuda pe.

²⁰Kweni kwenga ŵanyake mwaku wo, ŵanthu ŵaKupro ndi waku Kurene, wo wose, ŵachiza mu Antoike, ŵakambiyanga ku ŵaGriki so, ŵakumtaula Mbuya Yesu.

²¹Ndipo janja la Mbuya lenga nawo: ndipo ŵanandi limu ŵanguvwana ndi ŵangung'anamukiya ku Ambuya.

²²Ndipo makani ghapaku wo ghanguvwika mu mpingu wamu Yerusalemu: ndipo ŵangutuma Barnaba mpaka ku Antoike.

²³Mweniyo wanguti wazako, ndi wawona wezi waku Chiuta, wangukondwere; ndipo wanguŵachichizga wose, kuti ndi linweka la mtima ŵamiziriye ku Ambuya;

²⁴pakuti wenga munthu wamampha, ndi wakuzazika Mzimu Wakupaturika ndi chivwanu: ndipo mzinda ukuru ungukuskikiyako ku Ambuya.

²⁵Ndipo wanguruta ku Tarso, kwachilembe Saulo;

²⁶Ndipo wati wamsaniya, wangumtole ku Antoike. Ndipo kunguŵaŵiya kuti chirimika champhumphu ŵanguwungirana mu mpingu, ndi kusambizga mzinda ukuru: ndipo kuti ŵasambizi wo ŵangutamulika ŵaKristu danga mu Antoike.

²⁷Ndipo mu mazuŵa ghenagha ŵamchimi ku Yerusalemu ŵangusikiya ku Antoike.

²⁸Ndipo yumoza waku wo, zina lake Agabu, wangusoka, ndipo wangusimikizgiya mu Mzimu kuti chikaŵangapo chilala chikuru pa charu chose: chenicho nacho chinguŵapo wachiusa Klaudio.

²⁹Ndipo ŵamu ŵasambizi, uli ndimo yumoza ndi yumoza wasakatiyanga, yose waku wo wanguteme chiteŵeta chitumike ku ŵabali ŵakuja mu Yuda;

³⁰ichi ŵanguchita, ndipo ŵanguchituma ku ŵara mu manja ghaku Barnaba ndi Saulo.