Read gitonga Machitidu gha Ŵakutumika 12 Bible Online

Machitidu gha Ŵakutumika 12 - gitonga bible

Machitidu gha Ŵakutumika 12

¹Kweni pa nyengo yiya Herode karonga yo wangutambaruliya manja ghake kwachichitiya uheni ku ŵanyake ŵamu mpingu wo.

²Ndipo wangubaya ndi lipanga Yakobe, muku waku Yohane.

³Ndipo wachiwona kuti kungukondweska ŵaYuda, wangutaruliya kumko Petro nayo. Ndipo kwenga mazuŵa gha vyambura-mtupu.

⁴Ndipo wati wamko, wangumuŵika ku ulinda, ndi kumpereka ku mipingu yinayi ya ŵankhondo, ŵanayi mu mpingu ndi mpingu, kuti ŵamkhazge, pakukhumba kumtuzgiya ku khamu lo pavuli pa Phaska.

⁵Viyo Petro wasungikanga mu ulinda wo: kweni pa chifukwa chake niniziku linguchitikiya kwaku Chiuta kwakufwiririyapo ndi mpingu wo.

⁶Ndipo penipo Herode wakhasanga kumtuzga, usiku wuwa Petro waranga tulo pakati pa ŵankhondo ŵaŵi, wakumangika ndi maunyoru ghaŵi: ŵaronda so ŵa paurongo pa likomo ŵakhazganga ulinda wo.

⁷Ndipo wonani, mungelo wa Mbuya wanguma pake, ndi kungweruka kunguŵaliya mu ulinda. Ndipo wati wapamantha liŵaghara laku Petro, wangumyuska, wakunena, “Soka ruŵi!” Ndipo maunyoru ghangudeuka ku manja ghake.

⁸Ndipo mungelo yo wangumnene, “Jichinyiye, ndi mangako viyatu vyako.” Ndipo wanguchita viyo. Ndipo wanena nayo, “Phemeska chirundu chako ndi ndirondo.”

⁹Ndipo wachituwa, wamrondonga; ndipo wengavi kuziŵa kuti chenga chakuneneska cho chinguchitika ndi mungelo yo, kweni wapimanga kuti wanguwona chiwona.

¹⁰Ndipo wati waporota mu ulinda wachimoza ndi wachiŵi, wanguza ku likomo la chisulo lakuserere mu msumba; lenilo pa khumbo laku lija linguŵajurikiya: ndipo pakutuwa ŵangwenda mseu umoza; ndipo sosonukweni mungelo yo wangutuwako kwake.

¹¹Ndipo pakuzizimuka Petro watinge, “Sono ndiziŵiska kuti Mbuya watuma mungelo wake, ndipo wanditaska mu janja laku Herode, ndi ku chilereze chose cha khamu la ŵaYuda.”

¹²Ndipo wachiziŵa ichi wanguza ku nyumba yaku Mariya, nyina waku Yohane, yo wadanika so Marko; kweniko ŵanandi ŵaungananga pamoza, ndi ŵarombanga.

¹³Ndipo wachigong'oska pa chisasa cha khomu, wanguzako kwachitegherezga msungwana, zina lake Roda.

¹⁴Ndipo wachiziŵa liu laku Petro, chifukwa cha chimwemwe kuti wangujurako ku khomu cha, kweni wanguchimbiriyamo, ndi wangutaula kuti Petro iyo wamanga pabwaro pa khomu.

¹⁵Kweni iwo ŵangunena nayo, “Ufuntha!” Kweni iyo wakokomezganga kuti kwenga viyo. Ndipo iwo wanguti, “Ndi mungelo wake.”

¹⁶Kweni Petro wangurutirizga chigong'oska; ndipo ŵachijurako ŵangumwona, ndipo ŵangutondwa.

¹⁷Kweni pakuŵakonozge ndi janja kuti ŵachetame, wanguŵakonkhome mo Ambuya angumutuzgiya mu ulinda. Ndipo wanguti, “Mutauliye vyenivi kwaku Yakobe, ndi ku ŵabali wo.” Ndipo wangutuwako, ndipo wanguruta kunyake.

¹⁸Kweni, kunguti kwacha, kunguŵa chimbwambwantha chikuru, mu ŵankhondo wo, chakuti chamuwiya Petro chine.

¹⁹Ndipo penipo Herode wangumlembe kwambura kumsaniya, wanguŵafumbiriya ŵaronda, ndipo wangulangula kuti ŵabayike. Sono pakutuwa ku Yuda ndi kusikiya ku Kaisarea, watandaranga kweniko.

²⁰Herode watundiriyanga ukongwa pa ŵaTuro ndi ŵaSidoni: ndipo ndi mtima umoza ŵanguziya kwaku iyo, ndipo, ŵati ŵawoja. Elasto, mlindachita wa karonga yo, ŵapemphanga chimangu chifukwa charu chawo chinguhiŵika ndi cho chaufumu.

²¹Ndipo pa zuŵa lakutemeka Herode, wakuvwara kavwaridu kaufumu, wanguka pa chakweruzgiyapo cho, ndipo wangukamba nawo.

²²Ndipo khamu lo lingubongo, “Ndi liu laku Chiuta, la munthu cha.”

²³Kweni sosonukweni mungelo wa Mbuya wangumkoso, chifukwa kuti wagupaska unkhankhu kwaku Chiuta cha; ndipo pakunyakata ndi fusi, wanguziririka.

²⁴Kweni mazu ghaku Chiuta ghakuwanga ndi ghandananga.

²⁵Ndipo Barnaba ndi Saulo ŵanguweko ku Yerusalemu, ŵati ŵafiska uteŵeti wawo, ndipo ŵangutole pamoza nawo Yohane, wakudanika so Marko.