Read gitonga Machitidu gha Ŵakutumika 13 Bible Online

Machitidu gha Ŵakutumika 13 - gitonga bible

Machitidu gha Ŵakutumika 13

¹Kweni mu Antoike, mu mpingu wa kweniko, mwenga ŵamchimi ndi ŵasambizgi: Barnaba, ndi Simeone, wakuzumbulika Nigere, ndi Lukoi mKurene, ndi Manaena, yo wangulereka pamoza ndi Herode, chinaikiru yo, ndi Saulo.

²Ndipo ŵachiteŵete iwo Ambuya, ndi kufunga, Mzimu Wakupaturika wanguti, “Ndipatuliyeni Barnaba ndi Saulo ku mlimu wo ndaŵadaniya.”

³Sono, ŵati ŵafunga ndi kuromba ndi kuŵaŵika manja, ŵanguŵatuma.

⁴Viyo iwo, pakutumika ndi Mzimu Wakupaturika iyo, ŵangusikiya ku Selukia; kutuwa kweniko nako ŵangulowoke ku Kupro.

⁵Ndipo pakuŵa mu Salami, ŵataulanga mazu ghaku Chiuta mu masinagoge gha ŵaYuda; ndipo ŵaŵanga ndi Yohane nge ngwakovya.

⁶Ndipo ŵati ŵadumuwamo mu chirwa chose mpaka Pafo, ŵangusaniya muwukwi yumoza, mchimimtesi, muYuda, zina lake lenge Barayesu (lo ling'anamuwa kuti Mwana waku Yesu);

⁷mweniyo wenga ndi kazembe, Sergio Paulo, munthu wa vinjeru. Mweniyo wangujidaniya Barnaba ndi Saulo, ndi wangulembe kuvwa mazu ghaku Chiuta.

⁸Kweni wangumikana nawo Elumase muwukwi yo (chifukwa zina lake ling'anamuwa viyo), ndipo wangwesa kumunyongo kazembe yo ku chivwanu.

⁹Kweni Saulo, yo nayo ndi Paulo, wakuzazika Mzimu Wakupaturika, wangumlereska dodoli,

¹⁰Ndipo wanguti, “Awa, wakuzazika fuvyo lose ndi uchenjezi wose, wamwana wa diabolo, wamawongo we wa urunji wose, asi urekenge, kunyongonthowa zakunyoroka za Mbuya?

¹¹Ndipo sono, awona, janja la Ambuya le pako, ndipo uŵenge wachiburumutiya, wakulereska so dazi cha mpaka mazuŵa.” Ndipo sosonukweni kunguwiya pake chizgezge ndi mdima; ndipo wendayendanga ndi kupenja wakumrongozga ndi janja.

¹²Sono kazembe yo, wachiwona cho chinguŵapo, wanguvwana, pakurwita pa chisambizgu cha Ambuya.

¹³Kweni ŵapamoza ndi paulo, ŵati ŵasoro pa Pafo, ŵanguza ku Perga waku Pamfulia: kweni Yohane wangupatukako kwaku wo, ndipo wanguwere ku Yerusalemu.

¹⁴Kweni iwo ŵangutuwa ku Perga, ndipo ŵangufika ku Antoike waku Pisidia; ndipo ŵangusere mu sinagoge pa zuŵa la sabata, ndi kuja pasi.

¹⁵Ndipo pavuli pa chiŵerenga cha chilangulu ndi ŵamchimi, ŵara ŵa sinagoge ŵangutuma kwaku wo, ŵakuti, “Mwa ŵanthu mwa ŵabali, asani mwe nagho mazu ghakuchichizgiya khamu lo, kambani.”

¹⁶Ndipo Paulo, wati wasoka ndi kucheuwa ndi janja, wanguti, “Mwa ŵaYisraele ndi mwaŵakopa Chiuta, tegherezgani.

¹⁷Chiuta wa khamu lenili Yisraele, wangusankha auskefwe, ndi wangulitumphuska khamu lo mu chitandara cho chamu Egipiti, ndipo ndi janja lakutumphulika wanguŵatuzga mwenimo.

¹⁸Ndipo ankhumba kunyengo ya virimika machumi ghanayi wanguŵabapa mu bozwa lo.

¹⁹Ndipo wanguti wapopeska mitundu yinkhonde ndi yiŵi mu charu cha Kanani, wanguŵapaska charu chaku wo nge nchihara, akhumba ku nyengo ya virimika machumi pe chumi ghanayi ndi machumi ghankhonde;

²⁰ndipo pavuli penipo wanguŵapaska ŵeruzgi mpaka Samuele, mchimi yo.

²¹Kwanda po ŵangujipemphe karonga: Chiuta wanguŵapaska Sauli, mwana waku Kishi, munthu wa fuku laku Benjamini, kwa nyengo ya virimika machumi ghanayi,

²²ndipo wati wamtuzgapo, wanguŵayuskiya Davidi, kuŵa karonga kwaku mweniyo wangusimikizga, wakuti, ‘Ndamsaniya Davidi, mwana waku Jese, munthu wakuyana ndi mtima wangu, yo wamchita makhumbu ghangu ghose.’

²³Mu mbeu yaku mweniyo Chiuta wangutole Yisraele kwakulingana ndi chipanganu, Mtaski, Yesu,

²⁴penipo, wenga wandaze iyo, Yohane wangumemeze limu ku khamu lose laku Yisraele chibatizo cha ching'anamuka.

²⁵Ndipo Yohane, po wafiskanga mvizi wake, watinge, ‘Kumbi mughanaghana kuti ine ndine yani? Kuti ndine iyo cha. Kweni awonani watuza pavuli pangu Yumoza, viyato vyaku marundi ghaku mweniyo kuti nditenere cha kufwatuwa.’

²⁶“Mwaŵanthu, mwa ŵabali, mwaŵana ŵa mphapu yaku Abrahamu, ndi ŵamwinu ŵakumopa Chiuta, kwaku ifwe ghatumika mazu gha utaski wenuwu.

²⁷Chifukwa ŵakujamo mu Yerusalemu ndi ŵara ŵawo pakuŵavi kuziŵa Mtaski ndi mazu gha ŵamchimi, gho ghaŵerengeka sabata ndi sabata, ŵangughafiska pakumsuska iyo.

²⁸Ndipo chingana ŵengavi kose kusaniya mwake chifukwa cha nyifwa, ŵangupempha Pilato kuti wabayike.

²⁹Ndipo penipo ŵangufiska vyose vyakulembeka paku iyo, ŵangumpauwako ku mphinjika, ndipo ŵangumuŵika mu muunda.

³⁰Kweni Chiuta wangumyuska ku ŵakufwa;

³¹ndipo wanguwoneka iyo mazuŵa ghanandi kwaku ŵeniwo ku Galile ŵangukwere nayo ku Yerusalemu, ŵeniwo sono mbakaboni ŵake ku khamu lo.

³²Ndipo ifwe tikugozgiyani chipanganu cho chinguchitikiya auskefwe,

³³ichi Chiuta wachifiskiya kwaku ifwe taŵana ŵawo pakumyuska Yesu: mo kwalembeke mu Sumu[11] ya chiŵi, ‘Iwe we Mwana wangu, ine le ndakupapa,’

³⁴Ndipo mwakuti wangumyuska ku ŵakufwa, wakukhasa kuwere ku chivuzi cha, wakamba viyo, ‘Ndakukupaskani vyakupaturika ndi vyamagomekezgeka vyaku Davidi.’

³⁵Chifukwa chenichi watiti mu Sumu yinyake so, ‘Kuti mupaskenge wakupaturika winu kuwona chivuzi cha.’

³⁶Chifukwa nadi Davidi wati watataliya mu mgonezi wake khumbu lo laku Chiuta, wangura, ndipo wanguŵikika pamoza ndi ŵambuyake, ndipo wanguwona chivuzi;

³⁷kweni mweniyo Chiuta wanguyuska, kuti wanguwona chivuzi cha.

³⁸Viyo kuziŵikwe kwaku imwe, mwa ŵabali, kuti mwaku mweniyo chitaulikiya imwe chireke cha vilakwa:

³⁹ndipo kuti mwaku iyo, yose wakuvwana warunjiskikiya kwaku vyose kwaku vyenivyo kuti munguziŵa kurunjiskika cha ndi chilangulu cho chaku Mosese.

⁴⁰Viyo cheŵani, vinu chingaziya paku imwe cho chingukambika mu ŵamchimi wo:

⁴¹‘Onani, mwaŵakuphara, ndi tondwani, ndi muzirimitiye; pakuti nditata ine nchitu mu mazuŵa ghinu, nchitu mwaku yo kuti muvwaniyenge cha, chingana yumoza wangamkonkhoskiyani.’ ”

⁴²Ndipo ŵachituwa iwo, ŵanthu wo ŵanguŵeyere kuti makani yagha ghaŵakambikiye pa sabata lo lapavuli.

⁴³Ndipo ŵati ŵatuwa mu sinagoge, ŵanandi ŵa ŵaYuda ndi ŵa ŵakhozi ŵakusopa ŵanguŵarondo Paulo ndi Barnaba: ŵeniwo pakurongoro nawo ŵaŵachichizganga kujaririya mu wezi waku Chiuta.

⁴⁴Ndipo pa sabata lo lapavuli viŵiviŵi msumba wo wose unguwungana kwachivwa mazu ghaku Chiuta.

⁴⁵Kweni ŵaYuda ŵachiwona mizinda yo, ŵanguzazika sanji, ndipo ŵasuskanga vyo vingukambika ndi Paulo, ndi ŵamtukanga.

⁴⁶Kweni Paulo ndi Barnaba ŵangugangiya, kuti “Kungwenere kuti mazu ghaku Chiuta ghakambike danga kwaku imwe. Kweni imwe mutighapata ndipo mujesa ŵambura kwenere umoyo wo wamuyaya, awonani, ting'anamukiya ku Mitundu yo.

⁴⁷Chifukwa Ambuya atilanguliya viyo, ‘Ndakuŵika uwe kungweruka kwa Mitundu, kuti utore utaski mpaka ku chigoti cha panupasi.’ ”

⁴⁸Ndipo ŵachivwa ŵaMitundu ŵakondwanga, ndipo ŵakankhuskanga mazu ghaku Chiuta: ndipo ŵanguvwana wo wose ŵangutemeke ku umoyo wamuyaya.

⁴⁹Ndipo mazu gha Ambuya ghawandanga mu charu cho chose.

⁵⁰Kweni ŵaYuda wo ŵangukhuŵirizga ŵanthukazi ŵachisopa ŵaulemu, ndi ŵanthurumi ŵara ŵa msumba, ndipo ŵanguyuskiya paku Paulo ndi Barnaba chiŵembu, ndipo ŵanguŵadikiska mu mphaka zawo.

⁵¹Kweni iwo, pakuŵakung'unthiya fuvu la marundi ghawo, ŵanguza ku Ikonio.

⁵²Ndipo ŵasambizai ŵazazikanga chimwemwe ndi Mzimu Wakupaturika.