Read gitonga Machitidu gha Ŵakutumika 15 Bible Online

Machitidu gha Ŵakutumika 15 - gitonga bible

Machitidu gha Ŵakutumika 15

¹Ndipo ŵanyake, wo ŵangusika kutuwa ku Yuda ŵasambizganga ŵabali, kuti, “Kwambura kuti muchinjika mu lusu laku Mosese kuti muziŵa kutaskika cha.”

²Paulo ndi Barnaba ŵenga ndi limbano lakofya ndi suskano ndi iwo pa mchinju: viyo kungudumulika kuti Paulo ndi Barnaba, ndi ŵara ŵanyake mu Antioke ŵarute ku Yerusalemu kwachiwonana ndi ŵakutumika ndi ŵara pa makani yagha.

³Viyo iwo, pakuperekeka pa nthowa ndi mpingu wo, ŵangudumuwa mu Fenikia ndi so Samaria, ŵangukonkhoma ching'anamuka cha ŵaMitundu: ndipo ŵaŵachitiyanga chimwemwe chikuru ŵabali wose.

⁴Ndipo ŵakutumika ndi ŵara, ndipo ŵangukonkhoma vyo vyose Chiuta wanguchita nawo.

⁵Kweni ŵanyake ŵamu pambuku la ŵaFarisi, wo ŵanguvwana, ŵangusoka, ŵakuti, “Kutenere ku ŵachinja, ndi kuŵalanguliya kusunga chilangulu chaku Mosese.”

⁶Ndipo ŵakutumika ndi ŵara wo ŵanguwungana pamoza kwachisanda makani gho.

⁷Ndipo pavuli pasuskano yikuru, wangusoka Petro, ndipo wanguti kwaku wo, “Mwa ŵabali, muziŵa imwe kuti kali Chiuta wangusankha ine, kuti ku mlomo wangu yingavwa Mitundu yo mazu gha evangeli, ndipo yivwanenge.

⁸Ndipo Chiuta, mziŵamtima, wanguŵasimikizgiya pakuŵapaska Mzimu Wakupaturika, uli nkhwaku ifwe;

⁹ndipo kuti wangupambaniska kanthu cha pakati paku ifwe ndi iwo, mu kutozga mitima yawo ndichivwanu.

¹⁰Viyo sono chifukwa chine mutumwesa Chiuta, pakuŵikapo goŵa pa khosi la ŵasambizi, lenilo chingana mbauskefwe chingana ndifwe kuti tinguziŵa cha kunyamuwa?

¹¹Kweni tivwana kuti titaskikiyenge mu wezi wa Ambuya Yesu, kwakulingana ndi ŵeniŵa.”

¹²Ndipo mzinda wo wose unguja chisisi; ndipo ŵategherezganga kwaku Barnaba ndi Paulo ŵachikonkhoma vyose visimikizgu ndi virwita vyo Chiuta wanguchitiya iwo mu ŵaMitundu.

¹³Ndipo ŵanguti ŵaja chete iwo, wangwamuka Yakobe, wakuti, “Mwa ŵabali, ndivweni.

¹⁴Simoni wakonkhoma mo Chiuta pa mtendeku wangulereske mu ŵaMitundu kwachitole zina lake khamu.

¹⁵Ndipo kwaku chenichi mazu gha ŵamchimi ghazomera, mo kwalembeke.

¹⁶‘Pavuli paku vyenivi ndamuwe, ndipo ndamzenga so hema laku Davidi, lo lawa; ndipo ndamzenga vibwanganduka vyake, ndipo ndamkulimiska:

¹⁷viyo kuti ŵakujapo mu ŵanthu ŵapenje Ambuya, ndipo ŵaMitundu wose paku wo ladanikiya zina langu,

¹⁸watiti Mbuya, mweniyo wachita vyenivi, kuti viziŵikwe kutuwa ku mtendeku.’

¹⁹“Chifukwa chenichi ine nditeruzga, kuti tireke kuŵasuzga ŵaMitundu wo ŵang'anamukiya kwaku Chiuta,

²⁰kweni kuti tilembe kwaku wo kalata wakuti ŵajitinthe ku vyaukazuzi vya ŵangoza, ndi ku uyaya, ndi ku vyakuphuphunyuka, ndi ku ndopa.

²¹Chifukwa kutuwa ku migonezi yamtendeku Mosese we nawo mu muzi, wo ŵatimumemeza, pakuŵerengeka mumasinagoge sabata ndi sabata.”

²²Sono kunguyiyamu ku ŵakutumika ndi ŵara, pamoza ndi mpingu wose, kutuma ŵanthurumi ŵakusankhika mwawo ku Antioke pamoza ndi Paulo ndi Barnaba; Yuda wakudanika Barsaba, ndi Sila, ŵanthu ŵarongozgi mu ŵabali:

²³ndi so ndi janja lawo ŵangulemba, “Ŵakutumika ndi ŵabali ŵara, ku ŵabali ŵamu ŵamitundu ŵamu Antioke ndi Siriya ndi Kilikia, chitauzga:

²⁴Pakuti tavwa kuti ŵanyake ŵamwidu ŵakuyuzgani ndi mazu, ghakung'anamuwa mizimu yinu ŵambura kulangulika ndi ifwe;

²⁵kwayiyamu kwaku ifwe, taŵakuyana mu mtima, kutumiya imwe ŵanthu ŵakusankhika pamoza ndi ŵakwanjiwa ŵidu, Barnaba ndi Paulo,

²⁶ŵanthu wo ŵakombole maumoyo ghawo pa chifukwa cha zina la Ambuyafwe Yesu Kristu.

²⁷Viyo tatuma Yuda ndi Sila, ŵeniwo nawo ŵamkukutauliyani vyenivyo pe ndi mlomo.

²⁸Chifukwa kunguoneke umampha ku Mzimu Wakupaturika, ndi kwaku ifwe, kukunyekezgani chizitu chinyake chakuruska cha, kweni vyenivyo vyakukhumbikwa pe,

²⁹kujikanizga vyakubayikiya ŵangoza, ndi ndopa, ndi vyakuphuphunyuka, ndi vyauyu; pakujitintha kwaku vyenivyo, mwamchita umampha. Paweme.”

³⁰Viyo iwo, ŵanguti ŵatumikako, ŵanguza ku Antioke; ndipo ŵati ŵawunganiska mzinda wo, ŵangupereka kalata yo.

³¹Ndipo ŵachiŵerenga ŵangukondwere pa uchichizga wake.

³²Ndipo Yuda ndi Sila, pakuŵa iwo nawo ŵamchimi ŵanguchichizga ŵabali ndi mazu ghanandi, ndipo ŵanguŵakhozga.

³³Ndipo ŵati ŵaswapo nyengo, ŵangutumika mu chimangu ndi ŵabali kwaku ŵeniwo ŵanguŵatuma kali. [

³⁴Kweni Sila wanguja kwenikuwa.]

³⁵Kweni Paulo ndi Barnaba ŵangujaririya mu Antioke, kusambizga ndi kugozga mazu gha Ambuya, pamoza ndi ŵanyake so ŵanandi.

³⁶Kweni pavuli pa mazuŵa ghanyake Paulo wangunena ndi Barnaba, “Sono tiwerengeko ndi tichezgenge ndi ŵabali ŵidu, tiwone mo ŵaliri, mu muzi wose mwenimo tingutauliya mazu gha Ambuya.”

³⁷Ndipo Barnaba wakhumbanga kutole pamoza nawo Yohane, yo wadanika so Marko.

³⁸Kweni paulo wangupima kuti kungwenere cha kuto mweniyo wangupatukako kwaku wo ku Pamfulia, ndi wengavi kuruta pamoza nawo ku mlimu so.

³⁹Ndipo kunguyuka suskano, viyo kuti ŵangupatukana iwo, yumoza kumunyake; ndipo Barnaba, wakutole pamoza nayo Marko, ŵangulowoke ku Kupro.

⁴⁰Kweni Paulo wangujisankhiya Sila, ŵanguruta, ŵanguti ŵaperekeka ndi ŵabali wo ku wezi wa Ambuya.

⁴¹Ndipo ŵadumuwanga mu Siriya ndi Kilikia, ŵakukhozga mipingu.