Read gitonga Machitidu gha Ŵakutumika 16 Bible Online

Machitidu gha Ŵakutumika 16 - gitonga bible

Machitidu gha Ŵakutumika 16

¹Ndipo ŵangufika so ku Derbe ndi ku Lustra: ndipo wonani, msambizi yumoza wenga kweniko, zina lake Timote, mwana wa muYudakazi wachivwanu, kweni wiske wenga muGriki.

²Mweniyo wangusimikizgika umamphavi ndi ŵabali ŵamu Lustra ndi Ikonio.

³Iyo Paulo wangukhumba kuka nayo; ndipo wati wamto wangumchinjiya pa chifukwa cha ŵaYuda ŵakuŵa mumalo gha: chifukwa ŵanguziŵa wose kuti wiske wenga muGriki.

⁴Ndipo ŵachidumuwamu mu mizi ŵangupereka vyeruzgu kwachisunga, vyo vingudumurika ndi ŵakutumika ndi ŵara ŵamu Yerusalemu.

⁵Viyo mipingu yakhozgekanga mu chivwanu, ndipo yakuwanga mu unandi zuŵa ndi zuŵa.

⁶Ndipo ŵangudumuwa mu charu cha Frugia ndi Galatia, pakukanizgika ndi Mzimu Wakupaturika kukamba mazu mu Asia;

⁷ndipo po ŵanguza pakutghana ndi Musia, ŵesanga kusere mu Bithunia; kweni Mzimu waku Yesu wengavi kuŵazomerezga;

⁸ndipo pakurutiya ŵaka pa Musia, ŵangusikiya ku Troa.

⁹Ndipo chiwona chinguwoneka kwaku Paulo ndi usiku; munthurumi yumoza waku Makedonia wamanga, ndi wamuŵeyerenga, wakuti, “Yambukiya kuno ku Makedonia, ndi mutovye.”

¹⁰Ndipo wati wawona chiwona cho, sosonukweni tingulembe kuyako ku Makedonia, taŵakurunguruka kuti Chiuta watidaniyako kwachiŵatauliya evangeli.

¹¹Viyo pakusoro ku Troa, tingutaya thaliku ku Samotrako ndi pa zuŵa lapavuli ku Neapoli;

¹²ndipo kutuwa kweniko ku Filipi, wo ndi msumba wachimoza wachigaŵa cho cha Makedonia, chizengezga chauRoma, ndipo tatandaranga mu msumba weniwo mazuŵa ghakuti.

¹³Ndipo zuŵa la sabata tingutuliya kubwaro ku likomo lo, ku mphepete ku msinji, kweniko tingupima kwenga malo ghakurombe, ndipo tati tateka pasi, tarongoronga ndi ŵanthukazi, wo ŵanguwungana.

¹⁴Ndipo munthukazi yumoza, zina lake Ludia, yo wasaskanga vyaropa, wa muzi waku Thiatira, wakusopa Chiuta, ndiyo wativwanga: mtima waku mweniyo Ambuya angujura, kuti waphwere vyo vyakambikanga ndi Paulo.

¹⁵Ndipo wachibatizika, ndi nyumba yake yo, wangutiŵeyere, wakuti, “Asani mwanderuzga wamagomekezgeka ku Ambuya, sereni ku nyumba yangu, ndi jani kweniko.” Ndipo wangutikakamizga.

¹⁶Ndipo kunguŵa, tichiruta ifwe ku malo ghakurombe, kuti msungwana yumoza, wakuŵa ndi mzimu wa kuwukwa, wangukumana nafwe, mweniyo watoliyanga ambuyake chanduwu chinandi wachiloska.

¹⁷Ndiyo wangurondo Paulo ndi ifwe, ndi wangukambura kuti, “Yaŵa ŵanthu mbateŵeti ŵaku Chiuta Wapachanya limu, wo ŵakutauliyani nthowa ya utaski.”

¹⁸Ndipo wachitanga chenichi mazuŵa ghanandi. Kweni Paulo pakusororeka mtima, wangung'anamuka ndi wanguunene mzimu, “Ndikulanguliya mu zina laku Yesu Kristu tuwamo mwake.” Ndipo ungutuwamo pa ora leniliya.

¹⁹Ndipo ŵati ŵawona ambuyake kuti chatuwapo chigomekezgu cha chanduwu chawu, ŵanguŵako Paulo ndi Sila, ndipo ŵanguŵaguziya ku msika wa maronda paurongo pa ŵara;

²⁰ndipo pakuŵatole ku ŵeruzgi, ŵanguti, “Yaŵa ŵanthu ŵaYuda ŵayuzga ukongwa muzi widu,

²¹ndipo ŵataula marusu ghambura kuyiyamu ifwe taŵaRoma kuronde, chingana nkhuchita.”

²²Ndipo mzinda wo unguŵayukiya, ndi ŵeruzgi ŵanguŵaparuliya minjirira yawo ndipo ŵangulangula kuti ŵakwechulike.

²³Ndipo ŵati ŵaŵikiya mbumu zinandi paku wo ŵanguŵapong'a mu ulinda, ndi ŵangulanguliya mronda kuŵalindizga kwakukho:

²⁴mweniyo, pakupangizgika viyo wanguŵapong'a mu ulinda wa mukati ndi marundi ghawo wangumanga mu katereni.

²⁵Ndipo ndi usiku pakati Paulo ndi Sila ŵarombanga ndi ŵambiyanga zisumu kwaku Chiuta, ndipo ŵamikoli ŵaŵavwanga,

²⁶ndipo kwamabuchibuchi kunguŵapo chiyeuyeu chikuru, viyo kuti viŵanja vya nyumba yamagoŵa vinguyaghayika: ndipo sosonukweni visasa vyose vingujurika, ndi vimangiru vyaku wose vingufwatuka.

²⁷Ndipo mlindamikoli yo, pakuyuka ku tulo, ndi kuwona visasa vya ulinda vyajurika, wanguwewepuwa lipanga, ndi wakhasanga kujibaya, pakurunguruka kuti ŵamikoli ŵathaŵa.

²⁸Kweni Paulo wangukambura ndi liu likuru, wakuti, “Ungajichitiya kaheni kose cha: chifukwa tose te muno.”

²⁹Ndipo wangudana malimbuni, ndipo wangungwininikiyamo, ndipo wakutenthema, wanguwiya pasi paurongo paku Paulo ndi Sila;

³⁰ndipo pakuŵatole kubwaro, wanguti, “Mafumu nditenere kuchita chine, kuti nditaskike?”

³¹Ndipo iwo ŵanguti, “Vwanani mu Ambuya Yesu Kristu, ndipo utaskikenge, iwe ndi nyumba yako.”

³²Ndipo ŵangukamba mazu gha Ambuya kwaku iyo, ndi kwaku wose mu nyumba yake.

³³Ndipo mu ora leniliya la usiku wanguŵato, ndi wangusambiska mbumu zawo; ndipo wangubatizika iyo ndi ŵake wose.

³⁴Ndipo wachiŵakwezge ku nyumba yake, wanguŵayariya gome, ndipo wangukondwa ukongwa, pamoza ndi wose ŵamu nyumba yake, ŵati ŵavwana mwaku Chiuta.

³⁵Ndipo kwati kwacha, ŵeruzgi ŵangutuma ŵasirikari, kuti, “Fwatuwani ŵanthu ŵa!”

³⁶Ndipo mlinda-mikoli wangukonkhome mazu gho kwaku Paulo, kuti, “Ŵeruzgi ŵatuma kuti mufwatulike: viyo sono tuwani, ndi murute mu chimangu.”

³⁷Kweni Paulo wangunena nawo, “Ŵanguti kwechuwa pakweru, taŵambura kweruzgika taŵanthu taŵaRoma, ndipo ŵangutipong'a mu ulinda; ndipo sono ŵatituzgiya ku ubende kumbi? Awa na! Kweni ŵaze ŵeneko, ndi ŵatirongozge kubwaro.”

³⁸Ndipo ŵasirikari wo ŵangukonkhome ku ŵeruzgi makani ghenigho: ndipo iwo ŵangopa ŵachivwa kuti mbaRoma;

³⁹ndipo wanguzachiŵaŵeyere, ndipo pakuŵatole kubwaro, ŵanguŵapempha kutuwako ku muzi wo.

⁴⁰Ndipo ŵati ŵatuwako ku ulinda wo, ŵangusere mu nyumba yaku Ludia: ndipo ŵachiwona ŵabali, ŵanguŵachiska ndipo wangutuwako.