Read gitonga Machitidu gha Ŵakutumika 17 Bible Online

Machitidu gha Ŵakutumika 17 - gitonga bible

Machitidu gha Ŵakutumika 17

¹Ndipo ŵanguti ŵadumuwamo mu Amfipoli ndi Apolonia, ŵanguza ku Tesalonika, kweniko kwenga sinagoge la ŵaYuda,

²ndipo, uli ndimo ŵanguziŵiriya, Paulo wangusere kwaku wo, ndipo pa masabata ghatatu wangutorerana nawo mu malembo,

³wakutoro ndi wakusimikizga kuti kungwenere Kristu kukomwa, ndi kuyukako ku ŵakufwa; ndipo kuti, “Mweniyo Yesu, yo ndikutauliyani ine, ndi Kristu.”

⁴Ndipo ŵanyake ŵaku wo ŵangukopeka, ndipo ŵangusungana ndi Paulo ndi Sila, mzinda ukuru wa ŵaGriki ŵachisopa, ndi wa ŵanthukazi ŵara ŵanandi.

⁵Kweni ŵaYuda, pakukoreka sanji, ŵangujitole ŵanthurumi ŵanyake ŵatimbanizi ndi ŵaheni, ndipo pakonganiska mzinda, ŵatimbanizganga muzi, ndipo pakudumiya nyumba yaku Jasone, ŵalembenga kuŵatole ku khamu lo.

⁶Ndipo pakuŵavi kuŵasaniya, ŵanguguguziya Jasone ndi ŵabali ŵanyake ku ŵara ŵa muzi, ndi kubongo, “Wo ŵagadabuwa charu nawo ŵaziya kuno,

⁷ŵeniwo Jasone waronde: ndipo wose yaŵa ŵachita kwakumikana ndi malangulu ghaku Kaisare, pakukamba kuti karonga munyake walipo, Yesu.”

⁸Ndipo ŵanguyuzga mzinda wo ndi ŵara ŵa muzi, ŵachivwa vyenivi.

⁹Ndipo ŵanguti ŵatoku ndindira kwaku Jasone ndi ŵanyake wo, ŵanguŵafwatuwa.

¹⁰Ndipo sosonu ŵabali wo ndi usiku ŵangutuma Paulo ndi Sila ku Berea: ŵeniwo, ŵati ŵazako, ŵangusere mu sinagoge la ŵaYuda.

¹¹Ndipo yaŵa ŵenga ŵaulemu kwakuruska ŵamu Tesalonika, wose ŵangugharonde mazu ndi pamphu lose, ndipo ŵangupenjapenjamo mu malembo zuŵa ndi zuŵa, asani vyenivivyenga vyaviyo.

¹²Viyo ŵanandi mwaku wo ŵanguvwana; ŵa ŵanthukazi ŵaGriki ŵa mbiri, ndi ŵa ŵanthurumi, ŵanandi.

¹³Kweni ŵaYuda ŵaku Tesalonika ŵanguti ŵaziŵa kuti mazu ghaku Chiuta ghangutaulika, ndi Paulo mu Berea so, ŵanguza, kweniko so ŵakuyunduwa ndi ŵakuyuzga mizinda yo.

¹⁴Ndipo sosonukweni ŵabali wo ŵangutuma Paulo kuruta mpaka ku nyanja: kweni Sila ndi Timote ŵajaririyanga kweniko.

¹⁵Kweni wo ŵaperekezganga Paulo ŵanguka nayo ku Athene: ndipo pakurondere Sila ndi Timote langulu, lakuti ŵazi kwake ruŵiruŵi, ŵangutuwako.

¹⁶Ndipo wachiŵalindizga Paulo ku Athene, mzimu wake ungosororoka mwake pakuwona msumba kuzara vyangoza.

¹⁷Viyo wasuskananga mu sinagoge ndi ŵaYuda ndi ŵasopa, ndi ku mphara zuŵa ndi zuŵa ndi wo ŵakumananga nayo kweniko.

¹⁸Ndipo ŵanyake ŵanjazeru ŵaEpikuro ndi ŵaStoa ŵangukumana nayo. Ndipo ŵanyake ŵatinge, “Wangakambanji mbwebweta uyu?” Ndi ŵanyake, “Wawoneka kuŵa mtaula wa vyachiuta vilendo;” chifukwa wataulanga Yesu ndi chiyuka cho.

¹⁹Ndipo ŵati ŵamko ŵangumrongozge ku Areopago, Wakuti, “Kumbi tingaziŵa mo chiriri chisambizgu chenichi chifya, cho chikambika ndi iwe?

²⁰Chifukwa utole ku makutu ghidu vinthu vilendo.”

²¹Viyo tikhumba kuziŵa vyenivi vingaŵa uli, kweni ŵaAthene wose ndi ŵalendo ŵakuja kweniko kuti ŵafwasiyanga kanyake so cha, kweni kukamba ndi kuvwapo kanthu kafya.

²²Ndipo paulo wanguma mukati mu Areopago, ndi wanguti,

²³“MwaŵaAthene, ndiwona kuti mwaku vyose mwe ŵakusopa ukongwa, chifukwa ndichisorotapo ndi kuthoŵa vyo musopa ndingusaniya chisoperu nacho, po pangulembeka, ‘Kwaku Chiuta Wambura Kuziŵikwa.’ Viyo mweniyo musopa mwambura kumziŵa, ine ndikutauliyani iyo.

²⁴Chiuta yo wangwata charu ndi vyose vyamwake, pakuŵa iyo mbuya wa kuchanya ndi pasi, kuti waja muŵakasopi ŵakumangika ndi manja cha;

²⁵chingana nkhuti wateŵeteka ndi manja gha ŵanthu cha, nge ngwakukavuka kanthu, pakuŵa mweneko wakupaska wose umoyo, ndi mvuchi, ndi vyose;

²⁶ndipo wangwata ku ndopa zimoza mtundu wose wa ŵanthu kwachija pa chisku chose cha charu, wati wateme nyengo zakulangulika, ndi mphaka za ujazi wawo;

²⁷kuti ŵamlembe Chiuta, vinu ŵangampapaska, ndi ŵangambowozga, chingana nkhuti we kutali cha kwaku yose waku ifwe.

²⁸Chifukwa, ‘Mwaku iyo tijariya ŵamoyo, ndi titenda, ndi tiripo,’ mo so ŵanyake ŵakwata sumu ŵaku imwe ŵakambiya, ‘Chifukwa te mbumba yake.’

²⁹“Pakuŵa viyo mbumba yaku Chiuta, tingarunguruka cha kuti Uchiuta wo ukozgana ndi golide pamwenga siliva pamwenga mwa, wakusemeka ndi chinjeru ndi njeza ya munthu.

³⁰Viyo nadi Chiuta wangujumphiskiya maso pa nyengo zo za ujira; kweni sono walanguliya ŵanthu wose kosekose kung'anamuka:

³¹chifukwa watema zuŵa, mwaku lo wakhasa kweruzgiya charu mu urunji mu munthu yo wamumika; wati wapaska chimbondu kwaku wose pakumyuska ku ŵakufwa.”

³²Kweni pakuvwa ndi chiyuka cha ŵakufwa, ŵanguwera ŵanyake; kweni ŵanyake ŵanguti, “Tikuvwenge panyake so vyapaku chenichi.”

³³Viyo Paulo wangutuwamo mukati mwawo.

³⁴Kweni ŵanthurumi ŵanyake, ŵakuskepererana nayo ŵanguvwana: mwaku wo so mwenga Dionusio, waAreopago, ndi munthukazi, zina lake Damarisi, ndi ŵanyake pamoza nawo.