Read gitonga Machitidu gha Ŵakutumika 18 Bible Online

Machitidu gha Ŵakutumika 18 - gitonga bible

Machitidu gha Ŵakutumika 18

¹Pavuli paku vyo, Paulo, pakutuwako ku Athene, wanguza ku Korinte.

²Ndipo wangusaniya muYuda yumoza, zina lake Akula, mPontu pa kawi, yo wangutuwa sono ku Italia, pamoza ndi Priskila muwoli wake, chifukwa Klaudio wangulangula kuti ŵaYuda wose ŵatuweko ku Roma; ndipo wanguza kwawo,

³ndipo chifukwa ŵenga ŵa uwomba umoza, wajanga nawo, ndi ŵatataliyanga nchitu pamoza: chifukwa kuchiri ku uwo mbawenga wakusona mahema.

⁴Ndipo mu sinagoge sabata ndi sabata wangutorerana nawo, ndipo wakopanga ŵaYuda ndi ŵaGriki.

⁵Kweni penipo Sila ndi Timote ŵangusikako ku Makedonia, Paulo wafinyirizgikanga ndi mazu, wakusimikizgiya ku ŵaYuda kuti Yesu ndi Kristu.

⁶Kweni po ŵangumikirana nayo iwo, ndi kutuka, wangukung'untha minjirira yake, ndipo wangunena nawo, “Ndopa zinu ziŵi pa mitu yinu; ndasasamo ine; kwanda sono ndikenge ku ŵaMitundu.”

⁷Ndipo wachituwako kweniko wanguza mu nyumba ya munthu, zina lake Tito Justo, wakusopa Chiuta, nyumba yaku mweniyo yinguthoŵezgana ndi sinagoge lo.

⁸Ndipo Krispu, mura wa sinagoge, wanguvwana mu Ambuya pamoza ndi nyumba yake yose; ndipo ŵanandi ŵaku Korinte ŵanguvwa ndi ŵanguvwana, ndipo ŵangubatizika.

⁹Kweni Ambuya angumunene Paulo mu chiwona ndi usiku, “Ungopanga cha, kweni kambanga, ndi ungachetama cha;

¹⁰chifukwa ine nde nawe pamoza, ndipo paŵengevi yumoza wakudumiyenge kukuchitiya uheni, chifukwa nde nalo khamu likuru mu msumba uwu.”

¹¹Ndipo wangujaririya kweniko chirimika chimoza ndi myezi yinkhonde ndi umoza, wakusambizga mwawo mazu gho ghaku Chiuta.

¹²Ndipo pakuŵa Galio kazembe waku Akhaia, ŵaYuda ndi mtima umoza ŵangumyukiya Paulo, ndipo ŵangumtole ku mphara yakweruzgiyapo,

¹³ŵakuti, “Mwenuyu wakopa ŵanthu kusopa Chiuta kwakupambana ndi chilangulu.”

¹⁴Ndipo Paulo watinge wajurenge mlomo wake, kweni Galio wangunena ndi ŵaYuda, “Asani kenga kanthu kautimbanizi pamwenga kaheni, mwa ŵaYuda, mphayi ndakunthiyapo namwe kwakulingana ndi mazu:

¹⁵kweni asani kwe mafumbo ghapa mazu ndi mazina ndi chilangulu chakwinu, thoŵani mwaŵeni; ine kuti ndikhumba cha kuŵa cheruzga mwaku vyenivi.”

¹⁶Ndipo wanguŵadikiskamo mu mphara yo.

¹⁷Ndipo wose ŵanguko Sosthene mura yo wa sinagoge, ndipo ŵangumpuma paurongo pa mphara. Ndipo Galio wengavi kuphwere kanthu kose paku vyenivi.

¹⁸Ndipo Paulo, wati waswapo so mazuŵa ghanandi, wangurayirana ndi ŵabali wo, ndipo wangulowoke ku Siriya; ndi pamoza nayo Priskila ndi Akula; wanguti wameta sisi mu Kenkirea, chifukwa waŵanga ndi rapu.

¹⁹Ndipo wangufika ku Efeso, ndi kweniko wanguŵasiya: kweni mweneko wangusere mu sinagoge, ndi wangususkana ndi ŵaYuda.

²⁰Ndipo ŵachimpempha kuswapo nyengo yakuruska, wengavi kuzomera;

²¹Kweni pakurayirana nawo, wanguti, “Ndamwere so kwinu, asani Chiuta wakhumba;” ndipo wangukwera mu ngaraŵa kutuwa ku Efeso.

²²Ndipo wati wakwezga pa Kaisarea, wanguzuwuka ndi kuwutauzga mpingu, ndipo wangusikiya ku Antioke.

²³Ndipo wati waswapo nyengo yakuti, wangutuwako, ndipo pakudumuwa kwa muruliku mukati mu charu cha Galatia ndi Frugia, wangukhozga ŵasambizi wose.

²⁴Kweni muYuda yumoza, zina lake Apolo, waku Alekezandara pa kawi, munthu warwana kukamba, wangufika ku Efeso; ndipo wenga wanthazi mu malembo.

²⁵Mweniyo wenga wakusambizgika nthowa ya Ambuya; ndipo pakuŵa waphamphu ku mzimu, wakambanga ndi wasambizganga kaunthu vyapaku Yesu, wakuwamo chibatizo chaku Yohane pe:

²⁶ndiyo so wangwanda kukamba khwerukhweru mu sinagoge lo. Kweni ŵachimuvwa Priskila ndi Akula, ŵangumto ndi kumpatauliya umamphamampha nthowa yaku Chiuta.

²⁷Ndipo pakukhumba iyo kwambukiya ku Akhaia ŵabali wo ŵangumchichizga, ndi ŵangulembe ku ŵasambizi kuti ŵamronde: ndipo wachifikako, wangovyana ukongwa ndi wo ŵanguvwaniya mu wezi;

²⁸chifukwa kwanthazi wangupanikizgiya ŵaYuda pakwero, wakurongole mu malembo kuti Yesu ndi Kristu.