Read gitonga Machitidu gha Ŵakutumika 19 Bible Online

Machitidu gha Ŵakutumika 19 - gitonga bible

Machitidu gha Ŵakutumika 19

¹Ndipo kunguŵa kuti, Apolo weche mu Korinte, Paulo, wati wadumuwa muvigaŵa vyanena, wangufika ku Efeso, ndi wangusaniya ŵasambizi ŵanyake:

²ndipo wanguti kwaku iwo, “Kumbi munguronde Mzimu Wakupaturika po munguvwana?” Ndipo ŵangumunene iwo, “Awa na, tengavi kuvwa chingana nkhuti Mzimu Wakupaturika walipo.”

³Ndipo wanguti, “Na, mungubatizikiya chine?” Ndipo iwo ŵanguti, “Mu chibatizo chaku Yohane.”

⁴Ndipo wanguti Paulo, “Yohane wangubatiza chibatizo cha ching'anamuka, pakukambiya khamu lo, kuti ŵavwane mwaku yo wakhasanga kuza pavuli pake, ndiku kuti, paku Yesu.”

⁵Ndipo ŵachivwa, ŵangubatizikiya mu zina la Ambuya Yesu.

⁶Ndipo penipo Paulo wanguŵika manja paku iwo Mzimu Wakupaturika wanguza paku wo; ndipo ŵarongoronga ndi malilime, ndipo ŵaloskanga.

⁷Ndipo wose ŵenga akhumba ŵanthurumi chumi ndi ŵaŵi.

⁸Ndipo wangusere mu sinagoge lo, ndi wangukamba ndi chiganga myezi yitatu, wakuŵanduliya ndi wakuŵakope vyapa ufumu waku Chiuta.

⁹Kweni po ŵanyake ŵenga ŵanononu ndi ŵamtafu, ŵakukambiya uheni pa nthowa yo paurongo pa urapasi wo, wangutuwako kwawo, ndi wanguŵapatuwa ŵasambizi, wakuŵanduliya zuŵa ndi zuŵa mu skulu yaku Turano.

¹⁰Ndipo chenichi chinguchitika virimika Viŵi; viyo kuti wose wo ŵajanga mu Asia ŵavwanga mazu gha Ambuya, ŵaYuda ndi so ŵaGriki.

¹¹Ndipo Chiuta wachitiyanga vyanthazi vyakuzungura ndi manja ghaku Paulo;

¹²viyo kuti saru zakuleske kutuwa ku liŵavu lake pamwenga zo mpangu zingutoreke ku ŵarwali nthenda zinguŵataya, ndipo so mizimu yiheni yingutuwamo.

¹³Kweni ŵanyake ŵa ŵaYuda ŵakuyingayinga, vyanusi, ŵangujitole kudaniya paku ŵeniwo ŵenga ndi mizimu yiheni zina la Ambuya Yesu, ŵakuti, “Ndikurapiyani ndi Yesu mweniyo wamemeza Paulo!”

¹⁴Ndipo kwenga ŵana ŵanthurumi ŵankhonde ndi ŵaŵi ŵaku Skeva, muYuda, mzukuru mura, wo ŵachitanga ichi.

¹⁵Ndipo mzimu uheni wo ungwamuka, ndi ungunena nawo, “Yesu ndimzomera, ndipo Paulo ndimziŵa; kweni imwe mwe ŵayani?”

¹⁶Ndipo munthu mwaku yo mwenga mzimu uheni wo, wanguzininikiya paku wo, ndipo pakuŵa ndi nthazi wose ŵaŵi, wanguŵagoda, viyo kuti ŵangusotopokamo mu nyumba ŵankhuli ndi ŵakupotekeka.

¹⁷Ndipo ichi chinguŵa chakuziŵika kwaku wose, ku ŵaYuda ndi so ku ŵaGriki, ŵakuja mu Efeso; ndipo wofi unguŵawiya, ndipo lakuzgikanga zina la Ambuya Yesu.

¹⁸Anandi so ŵaku wo ŵanguvwana ŵazanga, ŵakujisumuwa ndi ŵakuzomera machitidu ghawo.

¹⁹Ndipo ŵanandi ŵaku wo ŵachitanga mayera, ŵanguwunjika mabuku ghawo, ndipo ŵangughawocha paurongo paku wose; ndipo pakupenda mitengu yawo ŵangusaniya vyasiliva vikwi machumi ghankhonde.

²⁰Kwamazaza viyo ghakuwanga ndi ghapundanga mazu gha Ambuya.

²¹Ndipo penipo vingufiskika vyenivi, Paulo wangupukwa mu mtima, wanguti wadumuwamo mu Makedonia ndi Akhaia, kuruta ku Yerusalemu, wakuti, “Ndati ndajapo nkhawonanga ku Roma nako.”

²²Ndipo wati watuma ku Makedonia ŵaŵi ŵaku wo ŵamumiriyanga Timote ndi Erasto, wangutandara iyo mu Asia kanyengo.

²³Ndipo ku nyengo yiya chinguŵapo chiyaghayizga, chikuru, chapa vya nthowa yo.

²⁴Chifukwa yumoza, ndi zina Demetrio, msuzi wa siliva, yo wasulanga twakavuŵa twasiliva twaku Diana, wangutole ŵanchitu ŵake wanduzi, umana cha;

²⁵wo wanguŵawungang'a pamoza, ndi ŵasuzi ŵanyawo ndi wanguti, “Mwaŵanthu, muziŵa kuti ku uwomba wenuwu te nawo usambasi.

²⁶Ndipo muwona ndi mutuvwa, kuti mu Efeso pe cha, kweni viŵiviŵi mu Asia yose mwenuyu Paulo wakopa ndi wapuruska urapasi wa ŵanthu, pakukamba kuti mbachiuta cha wo ŵachitika ndi manja:

²⁷ndiviyo kwe urwani wakuti uwomba widu pe cha wo uyuyulikenge, kweni so kuti kasopi waku chiutakazi Diana nayo wapimikenge kanthu cha, ndi so kuti wanangikenge ukuru wake, waku mweniyo Asia yose ndi charu viyo chisopa.”

²⁸Kweni ŵachivwa ghenigho ŵanguzazika kandundu, ndipo ŵakamburanga kuti, “Mura ndiyo Diana wa ŵaEfeso!”

²⁹Ndipo msumba wose unguzazika ndi bwawatu: ndipo ŵangumotoke ndi mtima umoza mululuwa la maseŵero, ŵakugumizgiyamo Gayo ndi Aristarko, ŵaMakedonia, ŵalendo ŵanasi ŵaku Paulo.

³⁰Ndipo penipo Paulo wakhumbanga kusere ku khamu lo, ŵasambizi ŵengavi kumzomerezga.

³¹Ndipo ŵanyake ŵa ŵara ŵaku Asia nawo, pakuŵa ŵabwezi ŵake, ŵangutuma kwaku iyo, ndi kumjuŵeyere kusere cha mu luluwa lo la maseŵero.

³²Viyo ŵanyake ŵangukambura kakuti, ŵanyake kamwenga: pakuti unganu wo wenga wa chimtimbaheka; ndipo urapasi kuti unguziŵa cha cho ŵanguziya pamoza.

³³Ndipo mzinda wo wungutuzga Alekezandara, yo ŵaYuda ŵangumkuzga. Ndipo Alekezandara, pakukonozga ndi janja, wakhumbanga kujiŵeke ku khamu lo.

³⁴Kweni pakuteska iwo kuti wenga muYuda, kunguŵa bwawatu limoza kwaku wose, nge mpha maora ghaŵi, “Mura ndiyo Diana wa ŵaEfeso!”

³⁵Ndipo wati wachetamiska mzinda wo mlembi wa msumba, wanguti, “Mwaŵanthu mwaŵaEfeso, njani mu ŵanthu, yo walive kuziŵa kuti mu msumba waEfeso ndimo musungika kasopi waku Diana Mura ndi ŵangoza ŵakumbotoka pasi kutuwa kwaku Zeu!

³⁶Viyo pakuŵa vyenivi vyambura ma suskika, mutenere kujitintha ndi kuchita kanthu ndi mawara cha.

³⁷Chifukwa mwatole kuno ŵanthurumi yaŵa, wo kuti mbakuskowa ŵakasopi cha, chingana mbakutokoska chiutakazi widu cha.

³⁸Viyo asani Demetrio, ndi ŵasuzi pamoza nayo, ŵe nagho makani pa ŵanthu yaŵa, mphara ye mwazi, ndi ŵakazembe ŵalipo; ŵasumulane.

³⁹Kweni asani mufumbiriya kanthu kapa makani ghanyake, kadumulikiye mu unganu wa dangu.

⁴⁰Chifukwa nadi te mu urwani kusumulika pachivurupi cha msana wale, pakuwuravi chifukwa chake; ndipo kuti tiziŵenge cha kukonkhoma nkhani ya chimotoka chinichi.”

⁴¹Ndipo wanguti wakamba vyenivi, wanguwutuzga unganu wo.