Read gitonga Machitidu gha Ŵakutumika 2 Bible Online

Machitidu gha Ŵakutumika 2 - gitonga bible

Machitidu gha Ŵakutumika 2

¹Ndipo lati lafikiya limu zuŵa lo la Pentekoste,[2] ŵenga wose pamoza mu malo ghamoza.

²Ndipo kwamabuchibuchi kanguŵako kayowozi kakutuwa kuchanya ulaka nchimphunga cha mphepu yanthazi, ndipo kanguzaza nyumba yose mwenimo ŵajanga.

³Ndipo ghanguŵawoneke malilime ghakugaŵikana ulaka nga moto; ndipo unguja pa yumoza-yumoza waku wo wose.

⁴Ndipo ŵanguzazika wose ndi Mzimu Wakupaturika, ndi ŵangwamba kurongoro ndi malilime ghamwenga, uli ndimo Mzimu waŵapaskiyanga kwachirongoro.

⁵Ndipo mwajangamo mu Yerusalemu ŵaYuda ŵanthu ŵakopa Chiuta, ŵakutuwa ku mitundu yose ya ŵapasi pa kuchanya.

⁶Ndipo pakuŵapo kayowozi yaka, urapasi wo ungukumana pamoza, ndipo unguzizikika, pakuti munthu yose waŵavwanga kuŵereŵeta mu karongoroledu kake.

⁷Ndipo ŵarwitanga wose ndipo ŵazizwanga, ŵakuti, “Awonani, asi wose yaŵa wo ŵarongoro mbaGalile?

⁸Na, tituvwa uli ifwe yumoza-yumoza mu karongoroledu kidu, mwenimo tunguwiya?

⁹TaŵaPartia ndi taŵaMedia ndi taŵaElami, ndi taŵakuja ku Mesopotamia, ku Yuda naku ndi ku Kapadokia, ku Pontu ndi ku Asia,

¹⁰ku Frugia ndi ku Pamfulia, ku Egipiti ndi ku vigaŵa vya Libya vya kuchiri ku Kurene, ndi taŵakuja ku Roma, taŵaYuda nafwe ndi so taŵakhozi,

¹¹taŵaKrete ndi taŵaku Arabia, tituŵavwa wachirongoro mumakambidu ghidu vinthu vikuru vyaku Chiuta.”

¹²Ndipo wose ŵarwitanga ndipo ŵazizwanga ŵakunenerana, “Nchine chenichi?”

¹³Kweni ŵamwenga ŵakutombozga ŵatinge, “Mbakuloŵe vinyo mufya.”

¹⁴Kweni Petro, pakusoke pamoza ndi chumi ndi yumoza wo, wangusamphuska mazu ghake ndipo wanguŵakambiya pakweru, “Mwaŵanthu, mwaŵaYuda, ndi mose mwaŵakuja mu Yerusalemu, chenichi chiziŵikwe kwaku imwe, ndi tegherezgani mazu ghangu.

¹⁵Chifukwa kuti ŵaloŵe cha yaŵa, uli ndimo imwe mughanaghaniya; pakuti ndi ora la chitatu pe la msana;

¹⁶kweni chenichi ndicho chakuneneka ndi mchimi Yoele:

¹⁷‘Ndipo kuŵenge mu mazuŵa ghakumariya, watiti Chiuta, nkhapunguliyanga Mzimu wangu pa ŵanthu wose ndipo ŵamchima ŵana ŵanthurumi ŵinu ndi ŵana ŵanthukazi ŵinu, ndipo majaha ghinu ghamuwona viwoniwoni, ndi madoda ghinu ghamlota maloto;

¹⁸ndipo pa ŵateŵeti ŵanthurumi ŵangu ndi ŵateŵeti ŵanthukazi ŵangu mu mazuŵa ghenigha nkhapunguliyangapo Mzimu wangu; ndipo ŵamloska.

¹⁹Ndipo nkhapaskanga virwita mumachanya kuchanya, ndi visimikizgu pa charu cha pasi; ndopa, ndi moto, ndi mvuchi wa usi:

²⁰dazi lamsanduka mdima, ndi mwezi ndopa, leche lindaze zuŵa lo la Mbuya, zuŵa lo likuru ndi lathenthe:

²¹ndipo kukaŵanga kuti yose yo wangadana zina la Mbuya, wakataskikanga.’

²²“Mwaŵanthu mwaŵa Yisraele, tegherezgani mazu yagha; Yesu waku Nazareti, munthu wakupanikizgikiya kwaku imwe, kuti wangutuwa kwaku Chiuta, ndi vyanthazi ndi minthondwi ndi visimikizgu, vyenivyo Chiuta wanguchitiya mwaku iyo mukati mwinu, nge ndimo mwaŵeni muziŵiya,

²³mwenuyu Yesu, wati wakomboleke mu khumbu lakutemeka ndi mziŵirulimu waku Chiuta, mungumpayika ndi manja gha ŵachikana marangu, ndimungubaya.

²⁴Kweni Chiuta wangumuyuska, wati wamasuwa maurwirwi gha nyifwa, chifukwa kuti kwenga kwamachitika cha kuti wagodeke nayo.

²⁵Chifukwa Davidi watiti ndi iyo, ‘Ndathoŵanga Ambuya paurongo pangu nyengo zose; pakuti we ku marghe kwangu, alinga kuti ndingasukunika cha.

²⁶Chifukwa chenichi ungusangaruka mtima wangu, ndipo lilime langu lingumwemwete; ndipo so ine wachifweni nkhajanga mu chigomekezgu.

²⁷Chifukwa kuti mwamjowo mzimu wangu mu Hadesi cha, chingana nkhuti mwampaska Wakupaturika winu kuwona chivuzi cha.

²⁸Mwandiziŵiska nthowa za umoyo: mundizazenge ndi likondwa pakuŵapo kwinu.’

²⁹“Mwaŵanthu mwa ŵabali, ndikambe namwe kwaulera vyapa mbuyafwe Davidi, kuti wakufwa ndi so wakuŵikika, ndipo muunda wake weche mwidu mpaka zuŵa lino.

³⁰Viyo pakuŵa mchimi, ndipo pakuziŵa kuti ndi rapu Chiuta wamurapiya kuti ku chipasi chamu chiunu chake wangajarikapo yumoza pa chitengu chake cha ufumu.

³¹Pakuwona limu chenichi wangurongoro chiyuka chaku Kristu, kuti wangujowoleka mu Hadesi cha, chingana nkhuti liŵavu lake linguwona chivuzi cha.

³²Yesu mwenuyu Chiuta wanguyuska, waku chenicho tose te ŵakaboni.

³³Viyo pakukwezgeke ku marghe ghaku Chiuta ndipo wati waronde ku Dada chipanganu cho cha Mzimu Wakupaturika, wapunguliya paku ifwe chenicho imwe muwona ndi mutuvwa.

³⁴Chifukwa kuti Davidi wangukweriyako kuchanya cha: kweni iyo mweneko watiti, ‘Ambuya angumnene Mbuya wangu, Janiku ku marghe ghangu,

³⁵mpaka po ndaŵika ŵamawongu ŵinu kuŵa mpandu wa marwayo ghinu.’

³⁶“Yiziŵepo kaunthu viyo nyumba yose yaku Yisraele kuti Chiuta wamchita Mbuya ndi so Kristu, Mwenuyu Yesu yo imwe mungupayika.”

³⁷Ndipo ŵachivwa, ŵanguchontheka mu mtima, ndipo ŵangunene Petro ndi ŵakutumika ŵanyake, “Mwaŵanthu mwaŵabali, tichitengenji?”

³⁸Ndipo Petro wanguti kwaku wo, “Ng'anamukani, ndipo munthu yose waku imwe wabatizikiye mu zina laku Yesu Kristu ku chireke cha vilakwa vinu; ndipo mukarondanga mpasku wa Mzimu Wakupaturika.

³⁹Chifukwa chipanganu cho che kwaku imwe, ndi ku ŵana ŵinu, ndi kwaku wose ŵakutari, wose wo wangajidaniya Mbuya Chiuta widu.”

⁴⁰Ndipo ndi mazu ghanyake ghanandi waŵasimikizganga ndi waŵachichizganga, wakuti, “Jitaskeni ku mgonezi wenuwu wakunyongoroka.”

⁴¹Viyo ŵeniwo ŵanguronde mazu ghake ŵangubatizika, ndipo kungukuskikiyako kwaku wo mu zuŵa liya mizimu ankhumba vikwi vitatu (3,000).

⁴²Ndipo ŵajaririyanga chitatata mu chisambizgu cha ŵakutumika, ndi mu wanase wo, ndi mu chimenya cho cha chiŵande, ndi mu marombo gho.

⁴³Ndipo wofi unguwiya pa mzimu wose; ndipo virwita ndi visimikizgu vinandi vinguchitika ndi ŵakutumika wo.

⁴⁴Ndipo wose ŵakuvŵana ŵaŵanga pamoza, ndipo ŵanguŵa navyo vyose kwamasanga;

⁴⁵ndipo ŵasaskanga viŵetu ndi vyuma vyawo ndipo ŵanguvigaŵiya kwaku wose, uli ndimo munthu we yose wangukavukiya.

⁴⁶Ndipo zuŵa ndi zuŵa, pakujaririya kwachitatata ndi mtima umoza mu kasopi[3] ŵakumenya chiŵande, ŵarghanga, chaukurgha mu chimwemwe ndi chiyanamtima,

⁴⁷ŵakumthamika Chiuta, ndi ŵakuŵa ndi rumbu ku khamu lo lose. Ndipo Ambuya ŵangukuskiyako ku unandi wawo ŵakutaskika zuŵa ndi zuŵa.