Read gitonga Machitidu gha Ŵakutumika 22 Bible Online

Machitidu gha Ŵakutumika 22 - gitonga bible

Machitidu gha Ŵakutumika 22

¹“Mwa ŵabali, mwaŵada, avwani chivekeru changu cho nditayiya imwe sono.”

²Ndipo ŵachivwa kuti wakamba nawo mu kakambidu ka chiHebere, ŵanguja chisisi ukongwa: ndipo wanguti,

³“Ine nde munthurumi mu Yuda, wakuwiya mu Tarso waku Kilikia, kweni wakulereke mu msumba wenuwu, pa marundi ghaku Gamaliele, wakusambizgika kwakuyana ndi rwana la langulu la auskefwe, ndawakuŵa waphamphu kuchiri kwaku Chiuta, uli ndimo muliri mose le:

⁴ndipo ndinguŵemba ine nthowa yeniyi mpaka ku nyifwa, ndawakuŵamanga ndi kuŵakombole ku maulinda ŵanthurumi ndi ŵanthukazi so;

⁵mo mzukuru nayo, ndi ura wo wose, ŵatindisimikizgiya; kwaku ŵeniwo nawo ndati ndaronde ŵakalata ku ŵabali, ndayanga ku Damasko, kwachiyore ku Yerusalemu ŵakweniko so ŵakumangika, alinga kuti ŵalangike.

⁶“Ndipo kunguŵa kuti, ndichiruta ndi kuŵandika ku Damasko, pafupi ndi msana pakati, kwamabuchibuchi kungweruka kukuru kwakutuwa kuchanya kungundimwetukiya kwakuzunguliya.

⁷Ndipo ndinguwa pasi, ndipo ndinguvwa liu lakundinene, ‘Saulo, Saulo, utindiŵembiyanji?’

⁸Ndipo ine ndingwamuka, ‘Ndimwe ayani, Ambuya?’ Ndipo wanguti kwaku ine, ‘Ine ndine Yesu waku Nazarete, mweniyo uŵemba.’

⁹Ndipo wo ŵapamoza nane ŵanguwona nadi kungweruka ko, kweni liu lakurongoro nane kuti ŵangulivwa cha.

¹⁰Ndipo ndinguti, ‘Ndachitanji, Ambuya?’ Ndipo Ambuya angunena nane, ‘Yuka, sere mu Damasko: ndipo kweniko kwamneneke iwe vyose vyo vyatemeke iwe kuvichita.’

¹¹Ndipo penipo ndengavi kulereska chifukwa cha unkhankhu wa Kungweruka kwenikuwa, ndinguza ku Damasko ndawakurongozgeka ndi janja laku wo ŵenga pamoza nane.

¹²“Ndipo yumoza, Hananiya, munthurumi wakusopa mwa chilangulu, wakusimikizgika umampha ndi ŵaYuda wose ŵakuja kweniko,

¹³wanguza kwangu, ndipo pakuma pholokoto, wangunena nane, ‘Mbali Saulo, lereska so!’ Ndipo mu ora lenilo ndingulereska pake.

¹⁴Ndipo iyo wanguti, ‘Chiuta yo wa auskefwe wakutondo iwe kuziŵa khumbo lake, ndi kuwona Murunji yo, ndi kuvwa liu lakutuwa ku mlomo wake.

¹⁵Pakuti ukaŵanga iwe kaboni kwaku iyo ku ŵanthu wose, kaboni waku vyenivyo wawona ndi wavwa.

¹⁶Ndipo sono usweriyanji? Soka, ubatizike, ndi usambe vilakwa vyako, wakudaniya pa zina lake.’

¹⁷“Ndipo kunguŵa kuti, ndati ndawere ku Yerusalemu, ndichiromba mu kasopi, ndinguŵa mu lotu,

¹⁸ndipo ndingumuwona iyo wakukamba nane, ‘Tinthimika, ndi tuwako ruŵi ku Yerusalemu: chifukwa kuti ŵazamronde ukaboni wako wapaku ine cha.’

¹⁹Ndipo ine ndinguti, ‘Ambuya, iwo ŵeneko ŵaziŵa kuti ine ndaŵatayanga mu ulinda ndi kuŵapuma mu sinagoge ndi sinagoge wo ŵavwananga mwinu:

²⁰ndipo po zachuchanga ndopa zaku Stefano, kaboni winu, ine nane ndamanga penipo, ndawakuzomerezga, ndi kukoreze minjirira yaku wo ŵambayanga.’

²¹Ndipo wangudinene, ‘Rutanga; pakuti ine nkhakutumanga kutariko ku mitundu.’ ”

²²Ndipo ŵamuvwanga mpaka pa mazu gho; ndipo ŵangusamphuska mazu, ŵakuti, “Mtuzgepo pa charu waviyo: chifukwa kuti kuyamu cha kuti waje wamoyo!”

²³Ndipo ŵachikambura iwo, ndi kuzuwa minjirira yawo ndi kuthibuskiya fuvu mude,

²⁴nduna yira yo yingulangula kuti warongozgeke mu boma lo, ndipo yingunena kuti weseke ndi likhwechu, alinga kuti waziŵe kafukwa kakumkamburiya viyo.

²⁵Kweni ŵachimumanga ndi mikoŵa, Paulo wanguti ku nduna yo yingumapo, “Kumbi kuyiyamu imwe kukhwechuwa munthu muRoma, kwambura kuti wasuskika?”

²⁶Ndipo wati wavwa kenturione yo, wanguruta ndi kutauliya nduna yira yo, wakuti, “Mukhumba kuchitanji? Chifukwa uyu munthu ndi muRoma.”

²⁷Ndipo yinguza nduna yira yo, ndipo yingukamba nayo, “Undikambiye, kumbi iwe ndiwe muRoma?” Ndipo wanguti iyo, “Inya.”

²⁸Ndipo yingwamuka nduna yira, “Ine ndingugula ndi mtengu ukuru ukweni uwu.” Kweni Paulo wanguti, “Ine ndingupapika mwanangwa.”

²⁹Viyo sosonukweni wo ŵakhumbanga kumwesa, ŵangumureka; kweni yingopa nduna yira yo, pakuziŵa kuti ndi muRoma, ndi kuti yingudanga chamumanga.

³⁰Kweni pa lamlenji, pakukhumba kuziŵa uneneska waku cho wangusumulikiya ndi ŵaYuda, wangumfwatuwa, ndi wangulanguliya ŵazukuru ŵara ndi upu wose kuwungana pamoza; ndipo wangusiskiyako Paulo wangumumika paurongo pa wo.