Read gitonga Machitidu gha Ŵakutumika 23 Bible Online

Machitidu gha Ŵakutumika 23 - gitonga bible

Machitidu gha Ŵakutumika 23

¹Ndipo Paulo, wakuti dodoli pa upu wo, wanguti, “Mwa ŵabali, ine ndajariya mu njuŵi yose yamampha paurongo paku Chiuta mpaka zuŵa lino.”

²Ndipo mzukuru mura yo, Hananiya, wangulanguliya wo ŵanguma pafupi pake kumpamantha pa mlomo.

³Sono Paulo wangunena nayo, “Chiuta wapamanthenge iwe, wachimati chakukuruŵika tu: ndipo iwe kumbi waja po kunderuzga ine kwakulingana ndi dangu, pakuti kwakumikana ndi dangu ulangula kuti ndipumike?”

⁴Ndipo ŵa ŵanguma pafupi ŵanguti, “Kumbi umtuka mzukuru mura waku Chiuta?”

⁵Ndipo Paulo wanguti, “Ndengavi kuziŵa, mwa ŵabali, kuti ndi mzukuru mura: chifukwa kwalembeka, ‘Ungakambanga uheni pa cheruzga wa khamu lako cha.’ ”

⁶Kweni Paulo, wanguti wateska kuti chigaŵa chimoza chenga cha ŵaSaduki, ndi chinyake cha ŵaFarisi, wangukambura mu upu wo, “Mwa ŵabali, ine ndine muFarisi, mwana wa ŵaFarisi: pa chigomekezgu muchiyuka cha ŵakufwa nditeruzgika ine.”

⁷Ndipo wanguti wakamba viyo iyo, kunguyuka gaukano pakati pa ŵaFarisi ndi ŵaSaduki: ndipo unguswekana upu wo.

⁸Chifukwa ŵaSaduki ŵakamba kuti kulive chiyuka, chingana ndi mungelo, chingana ndi mzimu; kweni ŵaFarisi ŵazomerezga wose.

⁹Ndipo chinguŵapo chiwawa chikuru: ndipo ŵalembi ŵanyake ŵa chigaŵa cha ŵaFarisi ŵangusoka, ndipo ŵalimbalimbanga, ŵakuti, “Tirive kusaniya kanthu kaheni mu munthu mwenuyu: ndipo, na kwati, asani mzimu pamwenga mungelo wakamba nayo?”

¹⁰Ndipo pakuŵapo gaukano likuru, nduna yira, pakopa vinu yiwo ŵangamparuwa Paulo, yingulanguliya liŵanja kupauka kwachimkwamphuwa mukati mwawo ndi kumtole mu linga.

¹¹Ndipo ndi usiku wapavuli Mbuya pakumiya pake, wanguti, “Khwima mtima: chifukwa uli ndimo wasimikizgiya vyapaku ine mu Yerusalemu, viyo kukhumbikwa kuti ukasimikizge mu Roma so.”

¹²Ndipo kwati kwaŵa msana, ŵaYuda wo ŵangumotoka, ndipo ŵangujirapiya ndi tembu, ndi kukamba kuti ŵangargha chingana nkhumwa cha mpaka ŵambaya Paulo.

¹³Ndipo ŵanguruska machumi ghanayi wo ŵangurapa rapu lenili.

¹⁴Ndipo ŵanguza iwo ku ŵazukuru ŵara ndi ŵara, ndi ŵanguti, “Tajirapiya ndi tembu likuru, kurgha kanthu cha mpaka tambaya Paulo.

¹⁵Viyo sono imwe, pamoza ndi upu wo, muvumbuliye nduna yira yo, alinga ŵamsiskiye kwaku imwe, nge mwe ŵakukhumba kwarwana kuziŵa vyapaku iyo; ndipo ifwe, wenga wandaŵandike iyo, te ŵakurongosoleka kumbaya.”

¹⁶Kweni wati wavwa muphwa waku Paulo chiraliya cho, wanguzachisere mu linga lo, ndipo wangutauliya Paulo.

¹⁷Ndipo Paulo wangudana yumoza wa ŵakenturione wo, ndipo wanguti, “Rongozga jaha lenili ku nduna yira; chifukwa we nako kanthu kwachimunene.”

¹⁸Viyo iyo wangumto ndipo wanguya nayo ku nduna yira, ndipo wanguti, “Paulo, wamkoli yo, wangundidaniya kwake, ndiwangundipempha kutole kwinu jaha lenili, lo le ndi kanthu kukukambiyani.”

¹⁹Ndipo nduna yira yo pakumko pa janja yingulazga nayo ku ubende, ndipo yingumfumba, “Nchine cho we nacho kundikambiya?”

²⁰Ndipo wanguti, “ŴaYuda wo ŵapangirana kwachifumba imwe mawa mu upu kumsiska Paulo, ulaka nkhuti mukhumba kufumbiriya kanthu kwarwana paku iyo.

²¹Viyo imwe mureke kuyirukiya kwaku yiwo: chifukwa ŵamraliya ŵanthurumi ŵamwaku wo ŵakuruska machumi ghanayi ŵeniwo ŵajirapiya ndi tembu kurgha cha, chingana nkhumwa, mpaka ŵambaya: ndipo sono mbakurongosoleka, ndipo ŵalereze phanganu lakutuliya kwinu.”

²²Viyo nduna yira yo yingurutiska jaha lo, yati yalichinyiya, “Ungachisuziyapo yumoza cha kuti wandivumbuliya vyenivi.”

²³Ndipo wati wajidaniya ŵaŵi ŵa ŵakenturione, wanguŵanene, “Rongosoni ŵankhondo machumi pe chumi ghaŵi, kuti ŵarute mpaka ku Kaisarea pa ora lachitatu la usiku, ndi ŵapakavalo so machumi ghankhonde ndi ghaŵi, ndi ŵamikondo machumi pe chumi ghaŵi.

²⁴Ndi so kuti ŵarongosole limu viŵetu vyamphingu, kuti ŵamgariskepo Paulo, ndi kumtole kwambura urwani kwaku Feliko kazembe yo.”

²⁵Ndipo wangulemba karata wakuti viyo:

²⁶“Klaudio Lusia ku Kazembe wamazaza Feliko, tauzgo.

²⁷Munthu mwenuyu wangukoleka ndi ŵaYuda, ndi wangukhasa kubayika ndi iwo, penipo, ndati ndaza paku wo ndi liŵanja, ndingumronda ndichiziŵa kuti wenga muRoma.

²⁸Ndipo pakukhumba kuziŵiska chifukwa cho ŵamsumuliyanga,

²⁹ndingumsiskiya ku upu wawo; ndipo ndingusaniya wasumulikiya iyo mafumbo gha langulu lawo, ndikweni wambura kusumulikiya kanthu kakwenere nyifwa pamwenga magoŵa.

³⁰Kwati kwavumbulikiya ine kuti chikamuŵiyanga munthu yo chivwamba, ndamtuma kwaku imwe sosonukweni, ndipo ndaŵalanguliya ŵakumsumuwa kukamba vyapaku iyo paurongo pinu. Paweme!”

³¹Viyo ŵankhondo, kwakulingana ndi cho chinguŵalangulikiya, ŵangumto Paulo, ndi ŵanguruta nayo ku Antipatri.

³²Ndipo pa lamlenji ŵanguŵareka ŵapakavalo kuka nayo pamoza ndipo ŵangunyongoke ku boma.

³³Ndipo po ŵanguza mu Kaisarea, ŵangupaska karata yo ku kazembe, ndipo ŵangumpereka Paulo nayo kwaku iyo.

³⁴Ndipo wanguti waŵerenga karata yo, ndi wati wafumba kuti wenga wa charu ninchi;

³⁵ndipo pakuziŵiska kuti wenga waku Kilikia, wali, “Ndivwenge iwe penipo ŵakukusumuwa nawo ŵaburika.” Ndipo wangulangula kuti wasungike mu nyumba ya ufumu yaku Herode.