Read gitonga Machitidu gha Ŵakutumika 24 Bible Online

Machitidu gha Ŵakutumika 24 - gitonga bible

Machitidu gha Ŵakutumika 24

¹Kweni pavuli pa mazuŵa ghankhonde wangusika mzukuru mura yo, Hananiya, pamoza ndi ŵara ŵanyake, ndi mkambi yumoza Tertulu; ŵeniwo ŵangumvumbuliya kazembe yo vyakusumuwa Paulo.

²Ndipo ŵati ŵadanika, wangwamba Tertulu kumpanikizga, wakuti, “Mwakuti tafikiya ku chimangu chinandi mwaku imwe; Afeliko mwamazaza, ndi kosekose chifukwa chakuphwere kwinu,

³tivizomera ndi chiwonga chose.

⁴Kweni kuti ndireke kumtangwamiskani kwakurutiriya so, ndikuŵeyereni kutivwa ifwe kwachiduli mu ulemu winu.

⁵Chifukwa tikumsaniya munthu mwenuyu kuŵa chideru, ndi wakuyuska vivurupi mu ŵaYuda wose ŵamu charu chose, ndi chirongozgi wa pambuku la ŵaNazarete:

⁶mweniyo wangwesa kukazuzga kasopi nayo: yo so tingumko. [Tingukhumba kumweruzga kwakuyana ndi dangu laku taŵeni,

⁷kweni nduna Lusia: wanguza ndi chimutimbaheka chikuru, ndi wangumukwamphuwa kwaku ifwe.

⁸Viyo Lusia wangulangula kuti ŵakupacha ŵake ŵazi paurongo pinu.] Asani mungamufumba munthu uyu, mwaŵeni mukavwanga kwaku iyo, vinthu vyose vyo titumupacha navyo.”

⁹Ndipo ŵaYuda nawo ŵangusanganapo, ndi kukokomezgapo kuti vyenivyo vyenga viyo.

¹⁰Ndipo kazembe yo, wanguti wacheuwa kwaku iyo kuti wakambe, Paulo wangwamuka, “Pakuziŵa kuti virimika vinandi mwaŵa imwe mweruzgi ku mtundu uwu, ndi kukondwa nditijivikiriya:

¹¹pakuti mungaziŵa imwe kuteska kuti ghandakepo mazuŵa ghakuruska chumi ndi ghaŵi po ndingukwere kwachisopa mu Yerusalemu;

¹²ŵengavi kundisaniya, chingana ndi mu kasopi, chingana ndi mu masinagoge, chingana ndi mu msumba wo, wakususkana ndi munthu pamwenga wakuyuska chivurupi.

¹³Chingana nkhuti ŵaziŵa kukusimikizgiya paku vyenivyo sono ŵatindisumuliya.

¹⁴Kweni chenichi ndizomera kwaku imwe, kuti kwakuyana ndi Nthowa, yeniyo iwo ŵatiyitamula pambuku, viyo ndimteŵete Chiuta wa ŵaseku, ndawakuvwaniya mwaku vyose kwakulingana ndi chilangulu cho, ndi mwaku vyo vyalembeka ndi ŵamchimi;

¹⁵pakuŵa ndi chigomekezgu mwaku Chiuta, chenicho iwo nawo ŵeneko ŵalereze, kuti chiŵengepo chiyuka cha ŵarunji ndi ŵaziraurunji.

¹⁶Mwaku chenichi nacho nane ndilimbiya kuŵa ndi njuŵi zambura kalema kuchiri kwaku Chiuta ndi ku ŵanthu nyengo zose.

¹⁷Kweni pavuli pa virimika vinandi ndinguza wakupinga vyawezi ndi mipasku ku mtundu wangu.

¹⁸Mwaku vyenivyo ŵangundisaniya nda wakutozgeka mu kasopi pamoza ndi mzinda cha, chingana ndi bwawatu cha. Kweni ŵaYuda ŵanyake ŵaku Asia ndi wo,

¹⁹ŵangwenere kuŵapo panu paurongo pinu, ndi kundipanikizga, asani ŵe ndi kanthu paku ine.

²⁰Pamwenga, ŵenaŵa ŵeneko ŵaukambe uheni wo ŵangusaniya, ndichima ine paurongo pa upu wawo;

²¹vinu iku pa mazu ghenigha ghamoza gho ndingubongo, ndichima mukati mwawo, kuti, ‘Ine le nditeruzgika paurongo pinu pa fundu ya chiyuka cha ŵakufwa.’ ”

²²Kweni Feliko, yo wanguwamo kwakufikapo vya Nthowa yo, wanguŵalindika, wakuti, “Penipo Lusia, nduna yira yo, wasikiya kuno, ndamziŵiska chikhomo cha mrandu winu.”

²³Ndipo wangulanguliya kenturione yo, kuti Paulo wasungike, kweni so kuti waŵe ndi wanangwa; ndi kuti wareke kukanizga yumoza wa ŵabali ŵake kumteŵete.

²⁴Kweni ghanguti ghakapo mazuŵa ghanyake, wanguzako Feliko pamoza ndi Drusila, muwoli wake yo wenga muYuda, ndipo wangumudana Paulo ndipo wangumuvwa vyapa chivwanu mwaku Kristu Yesu.

²⁵Kweni wachipokoto iyo vyapa urunji, ndi kujitintha ndi cheruzgu cho chikazanga, Feliko wangumbwambwantha, ndi wangwamuka, “Sono rutanga; ndipo ndichiŵa ndi nyengo, ndamkukudana.”

²⁶Kweni so wagomezganga kuti chuma chingapaskika ndi Paulo kwaku iyo: chifukwa chenicho wamdananga kaŵikaŵi, ndi wakambiskananga nayo.

²⁷Kweni vinguti vyafiskika virimika viŵi, Porkio Festo wangusere mu ura waku Feliko; ndipo pakukhumba kuŵakondweska ŵaYuda, Feliko wangumureka Paulo mu magoŵa.