Read gitonga Machitidu gha Ŵakutumika 26 Bible Online

Machitidu gha Ŵakutumika 26 - gitonga bible

Machitidu gha Ŵakutumika 26

¹Ndipo Agripa wangumunene Paulo, “Uzomerezgeka kujikambiya wija.” Penipo ndipo Paulo wangutambaruwa janja, ndi wajivikiriyanga:

²“Paku vyose vyenivyo ndisumulika ndi ŵaYuda, aKaronga Agripa, ndijipima wamwaŵi kujivikiriya le paurongo pinu,

³pakuti mwe ŵakuwamo ukongwa mu marusu ghose ndi mafumbano ghamu ŵaYuda: chifukwa chenichi ndikuŵeyereni mundivwe kwakuzizipizga.

⁴“Eviyodi kajaridu kangu kakutuwa ku uhurwa wangu, weniwo kutuliya ku mtendeku wenga mu mtundu wangu ndi mu Yerusalemu, ŵaYuda wose ŵaziŵa;

⁵pakundiziŵiya limu chituliyi pa mtendeku, asani akhumba kusimika, kuti kwakuyana ndi pambuku larwana la kasopedu kidu ndinguŵa muFarisi.

⁶Ndipo sono ndituma pano kweruzgikiya chifukwa cha chigomezgu chaphanganu lo Chiuta wanguchitiya auskefwe,

⁷kwaku lenilo mafuku ghidu chumi ndi ghaŵi (12) ghagomezga kufikapo, nge ndimo watakatakiya usiku ndi msana. Ndipo pa chigomezgu chenichi ndi pachika ndi ŵaYuda, aKaronga.

⁸Chifukwa chine chiteruzgika ndi imwe chambura magomekezgeka, chakuti Chiuta wayuska ŵakufwa?

⁹“Inya ndingupima ine ndamweni, kuti kungundenere kuchita vinthu vinandi vyakumikana ndi zina lo laku Yesu waku Nazarete.

¹⁰Ndipo ndinguchita viyo mu Yerusalemu: ndipo wanandi ŵa wakupaturika ine ndinguŵajariya mu maulinda, ndawakuronde mazaza ku ŵazukuru ŵara; ndipo ŵachibayika iwo, ndingusanganapo pakuŵakombo.

¹¹Ndipo pakuŵalanga panandi mu masinagoge ghose, ndinguŵakakamizga kuti ŵatuke; ndipo pakuŵafunthiya weni ukongwa, ndaŵandondoloskanga ku misumba ya vyaru vyakubwaro.

¹²“Mukati mwaku vyenivi ndichiya ku Damasko ndi mtufu ndi mazaza ghakutuliya ku ŵazukuru ŵara,

¹³ndi msana pakati, aKaronga, ndinguwona pa nthowa kungweruka kwakutuliya kuchanya, kwakuruska kuŵala kwa dazi, kwakuŵaliya kwakuzunguliya ine ndi ŵeniwo ŵakanga nane pamoza.

¹⁴Ndipo tinguti tawa pasitose, ndinguvwa liu lakukamba nane mu chiHebere, ‘Saulo, Saulo, utindiŵembiyanji? Nkhunononu kwaku iwe kufyapuwa pa mijokoru.’

¹⁵Ndipo ine ndinguti, ‘Mwe ayani, Ambuya?’ Ndipo Ambuya anguti, ‘Ndine Yesu ine, ndamwenini utindiŵemba iwe.

¹⁶Kweni yuka, ndi umiye pa marundi ghako: chifukwa chenichi ndakuwoneke, kukumika mteŵeti ndi kaboni waku vyo wandiwoniyamo ndi so waku vyenivyo ndikuonekiyengemo.

¹⁷Ndamkukufyankhanyuwa iwe ku khamu lo, ndi ku Mitundu kwaku yo ndikutuma,

¹⁸kwachibanuwa maso ghawo, ndi kuŵanyongo ku mdima kuyiya ku ukweru, ndi kuŵanyongo ku mtufu waku Satana kulazgiya kwaku Chiuta, mwakuti iwo ŵaronde chigowoke cha mwaku ine.’

¹⁹“Viyonthu, a Karonga Agripa, kuti ndinguŵa wamtafu cha ku chiwona cho chakuchanya,

²⁰kweni ku ŵamu Damasko danga, ndi so ku ŵamu Yerusalemu, ndimu charu chose chaku Yuda, ndi ku mitundu, ndingugozga evangeli, kuti ŵang'anamuke mu mtima, ndi ŵang'anamukiye kwaku Chiuta, ndi kuteŵeta milimu yo njakwenere ching'anamuka.

²¹Pa chifukwa chaku ivi ŵaYuda ŵangundikole mu kasopi ndi ŵatinge ŵandibayenge.

²²Viyo ndati ndaronde chovyu chakutuliya kwaku Chiuta, ndamiya mpaka zuŵa lino kwachisimikizgiya mumana ndi mura, wakukamba ka pade cha paku vyenivyo ŵamchimi ndi Mosese ŵangukamba kuti vikazanga,

²³kuti Kristu wakakomwanga ndi kuti iyo, pakuŵa wakudanga kuyuka ku ŵakufwa wakataulanga kungweruka ku khamu lo ndi ku Mitundu.”

²⁴Ndipo wachijivikiriya iyo vyenivyo, Festo wanguti ndi mazu ghamkankha, “Paulo wafuntha, masambiru ghako ghanandi ghakung'anamuskiya ku vibwetu.”

²⁵Kweni Paulo wanguti, “Akweni Festo, kuti ndikufuntha cha, kweni ndikamba makani ghauneneska ndi ghakuziza.

²⁶Chifukwa wativiziŵa vyenivi karonga, kwaku mweniyo ndikamba ine kwawanangwa; chifukwa ndichichizgika kuti palive kanthu kakuvyenivi kabisika kwake; chifukwa chenichi chengavi kuchitika mu chingodya.

²⁷Karonga Agripa, kumbi muvwana ndi ŵamchimi? Ndiziŵa kuti muvwana.”

²⁸Kweni Agripa wanguti kwaku Paulo, “Mu nyengo yifupivi iyi ukhumba kuti ndiŵe muKristu.”

²⁹Ndipo Paulo wanguti, “Pamwenga yifupi pamwenga yitali, ndiromba Chiuta kuti mphanyi imwe mwija pe cha, kweni so wose wo ŵatindivwa msana wale, mungaŵa ulaka ndimo ndiliri ine, kweni kwambura magoŵa ghenagha.”

³⁰Ndipo wangusoka karonga, ndi kazembe yo, ndi Berenike, ndi ŵakuteka pamoza nawo:

³¹ndipo ŵanguti ŵawungumuka, ŵangukambirana, wakuti, “Munthu uyu walive kuchita kanthu kakwenere nyifwa pamwenga magoŵa.”

³²Ndipo Agripa wanguti kwaku Festo, “Munthu mwenuyu mphanyi wangufwatulika, asani wengavi kupazga mphara yaku Kaisare.”