Read gitonga Machitidu gha Ŵakutumika 27 Bible Online

Machitidu gha Ŵakutumika 27 - gitonga bible

Machitidu gha Ŵakutumika 27

¹Ndipo penipo kungutemeka kuti tilowoke ifwe ku Italia, ŵangupereka Paulo ndi so ŵamagoŵa ŵanyake ku kenturione, zina lake Julio, wa liŵanja laku Augusto.

²Ndipo tati taseremo mu ngaraŵa yaku Adramutio, yakukhasa kulowoke ku madowoko gha ku Asia, tingukwere ku nyanja, pakuŵa nafwe pamoza Aristarko, mu Makedonia waku Tesalonika.

³Ndipo lamlenji tingukwezga ku Sidoni, kweniko Julio yo wangumchitiya Paulo kwaulemu, ndi kumzomerezga kuya ku ŵabwezi ŵake kwachiphwerereka ndi iwo.

⁴Ndipo tinguti tasoro kwenikuwa, tingusewe kusi ku Kupro, chifukwa mphepu zingumikana nafwe.

⁵Ndipo tinguti tadumuwa nyanja yaku dera laku Kilikia ndi Pamfulia, tingupaukiya ku mura, muzi waku Lukia.

⁶Ndipo kweniko kenturione wangusaniya ngaraŵa yaku Alekezandara, yakulowoke ku Italia; ndipo wangutiserezga mwenimo.

⁷Ndipo tinguti tasema kamanakamana mazuŵa ghanandi, ndi kufika kwaunononu kwakuthoŵezgana ndi Kunido, mphepu yengavi kutizomerezga, ndipo tinguseme kusi ku Krete, kwakuratana ndi Salmone;

⁸ndipo kwaunononu tingudumuwa charu chiya, ndipo tingufika ku malo ghakuzumbulika Mabondu Ghakutowa; kwaku ghenigho kufupi kwenga muzi waku Lasea.

⁹Ndipo yati yakapo nyengo yikuru, ndipo pakuŵa sono laurwani lwendo lapa nyanja (chifukwa nyengo ya chifunga nayo ndipo yarutapo kali), Paulo wanguŵachenjezga, ndi kuŵakambiya,

¹⁰“Mwaŵanthu, ndithoŵa kuti lwendo lidu liŵenge ndi wanangiku ndi uyowi unandi, wa mphingu ndi ngaraŵa pe cha, kweni so wa maumoyu ghidu.”

¹¹Kweni kenturione yo wanguvwiya wasigiru ndi mweneko wa ngaraŵa kwakuruska vyenivyo vingukambika ndi Paulo.

¹²Ndipo chifukwa bondu lo kuti lenga lakwenere cha kutandaramo chipwepwe, ŵanandi ŵangupima kusoro kweniko, kuti vinu ŵangafika ku Feniki, ndi kutandara chipwepwe kweniko; ndilo bondu laku Krete, lakurata ku nkhondi ndi ku mwera.

¹³Ndipo penipo mwera unguputa wenguwengu, ŵapimanga kuti ŵafikako ku chitema chawo, ndipo, pakuzuwuwa ndondowa, ŵangukwakwaska mumphepete mu Krete.

¹⁴Kweni sosunukweni kunguvuruvunduka mphepu ya liringa, yakuzumbulika Urakilo;

¹⁵ndipo yichiguzika ngaraŵa yo po yengavi nthazi kurata ku mphepu, tinguyizomerezga kusema.

¹⁶Ndipo taŵakuchimbiya kusi ku kachirwa kakuzumbulika Kauda, tinguŵa ndi unononu kukhozga bote:

¹⁷ndipo ŵanguti ŵalikwezga, ŵanguchita mikoŵa kwachimangiriya ngaraŵa kusi; ndipo, pakofyerwa kuti vinu ŵangakwezga mu chiphari, ŵangusiska thanga, ndi viyo ŵasewanga.

¹⁸Ndipo taŵakupiping'ika, ukongwa, pa zuŵa lapavuli ŵangupakaruwa chombo;

¹⁹ndipo pachitatu ŵangutaya ndi manja ghawo viyaŵi vya ngaraŵa.

²⁰Ndipo penipo chingana ndi dazi, chingana ndi nyenyezi, mu mazuŵa ghanandi, vyengavi kuwoneka, pakutiŵiya kanthenga mukuru, chigomekezgu chose chakuti tingataskika, chingumariya limu.

²¹Ndipo pakuŵavi kurgha mazuŵa ghanandi, Paulo wangusoka mukati mwawo, ndi wanguti, “Mwaŵanthu, mphanyi munguvwiya ine kureka kusoro ku Krete, wanangiku uwu ndi uyowi uwu mphanyi palivi.

²²Ndipo sono ndikuchichizgani kuŵa ŵakusangaruka; chifukwa paŵengevi uyowi wa umoyo mwaku imwe, kweni wa ngaraŵa pe.

²³Chifukwa kungumiya kwangu usiku uno mungelo waku Chiuta, waku mweniyo ndiri, Mweniyo so nditeŵete,

²⁴wakuti, ‘Ungopanga cha, Paulo; kutenere iwe kwachima paurongo paku Kaisare: ndipo awona, Chiuta wakupaska wose ŵakwenda nawe pamoza.’

²⁵Chifukwa chenichi, mwaŵanthu, sangarukani, chifukwa ndivwana mwaku Chiuta, kuti kuŵengedi uli ndimo kwataulikiya ine.

²⁶Kweni tikatayikanga pa chirwa chakuti.”

²⁷Kweni po kunguŵa usiku wa chumi ndi chinayi tichiputiskikiya mu nyanja ya Adria, akhumba pa usiku pakatikati, ŵamlima-nyanja ŵangupima kuti ŵanguŵandika ku charu chakuti.

²⁸Ndipo pakupima maji, ŵangusaniya mikwamba machumi ghaŵi; ndipo ŵachiruta kamanavi, pakupima so, ŵangusaniya mikwamba chumi ndi yinkhonde.

²⁹Ndipo, pakopa vinu tingaphatiya mu malo gha majarawe, ku matambi ŵangutaya ndondowa zinayi, ndi ŵangunweke mlenji.

³⁰Ndipo achilembe ŵamlima-nyanja kuthaŵamo mu ngaraŵa, ndi ŵachisiska bote mu nyanja; kwakupusika nge ŵamtaya ndondowa ku musu,

³¹Paulo wangumunene kenturione ndi ŵankhondo, “Kwambura kuti ŵaja mu ngaraŵa yaŵa, kuti muziŵenge imwe kutaskika cha.”

³²Sono ŵankhondo wo ŵangudumuwa mikoŵa ya bote, ndi ŵangulirutiska.

³³Ndipo kuchicha, Paulo wanguŵachichizga wose kusanganapo chaukurgha, wanguti, “Le ndi mazuŵa chumi ndi ghanayi mwalereze ndi kujaririya ŵakufunga ŵaka, ŵambura kujitole kakurgha.

³⁴Chifukwa chenichi ndikuŵeyereni kutoku chaukurgha: pakuti chenichi chituŵiya ku utaski winu; chifukwa kuti lisosokenge cha sisi laku mutu wa yumoza waku imwe.”

³⁵Ndipo wanguti wakamba viyo, wanguto chiŵande, wangumwonga Chiuta paurongo paku wose, ndipo wanguti wamenya, wangwanda kurgha.

³⁶Viyo ŵa wose, pakusangaruka, nawo so ŵangujitole chaukurgha.

³⁷Ndipo tenga tose mu ngaraŵa mauzima machumi pe chumi ghaŵi ndi machumi ghankhonde ndi ghaŵi ndi ŵankhonde ndi yumoza (276).

³⁸Ndipo ŵanguti ŵaguta, ŵanguyuyuska ngaraŵa pa kupangaruliya trigu mu nyanja.

³⁹Ndipo penipo kungucha, kuti ŵanguchiziŵa cho charu cha: kweni ŵanguthoŵa bondu lakuti e, lakuŵa ndi likumba lamchenga, mwaku lenilo wangupima kukwezgamo ngaraŵa yo, asani kungachitika.

⁴⁰Ndipo ŵati ŵafwatuwa ndondowa zo, ŵanguzileka mu nyanja, ndi so ŵanguzunguruwa vimangiru vya sigiru zo; ndipo ŵati ŵakwezga ku mphepu thanga laku musu, ŵangulazgiya ku likumba.

⁴¹Sono pakuŵamo mu malo gha nyanja ziŵi, ŵangusinthika ngaraŵa; ndi musu ungusamwa ndi unguphatiya, kweni matambi ghaphwitukanga ndi kubumuwa kwa mayigha.

⁴²Ndipo fundu ya ŵankhondo yenga yakuti ŵabaye ŵamikoli, vinu pakusamba yumoza waku wo wangathaŵa.

⁴³Kweni kenturione yo, pakukhumba kumtaska Paulo, wanguŵakanuwako ku khumbu lawo; ndipo wangulangula kuti wo ŵangaziŵa kusambira, ŵabire mu nyanja ndi kuya ku mtunda:

⁴⁴ndi kuti ŵakujapo wo ŵaŵarondonge, ŵanyake pa mathabwa, ndi ŵanyake pa viŵaruka vinyake vya ngaraŵa. Ndipo viyo kunguŵa kuti wose ŵangupozomoke ku mtunda.