Read gitonga Machitidu gha Ŵakutumika 3 Bible Online

Machitidu gha Ŵakutumika 3 - gitonga bible

Machitidu gha Ŵakutumika 3

¹Kweni Petro ndi Yohane ŵakweriyanga ku kasopi pa ora la marombo, ndilo lachinkhonde ndi chinayi.

²Ndipo munthu ngana, yo wenga mkwakwa kutuwa ku kawi kake, wanyamulikanga, ndi wajarikikanga zuŵa ndi zuŵa pa likomo la kasopi, lakuzumbulika Thora,[4] kwachipempha kawezi ku ŵakusere mu kasopi.[5]

³Pakuwona Petro ndi Yohane ŵakuŵondika kusere mu kasopi bwanguŵafumba kuti warondeko chawanangwa.

⁴Kweni Petro wangulereska pake, pamoza ndi Yohane, ndipo wanguti, “Tilereske.”

⁵Ndipo iyo wanguŵaphwere, wakugomekezga kurondako kanthu kwaku wo.

⁶Kweni Petro wanguti, “Siliva ndi golide ndirive; kweni cho nde nacho ndicho nditukupaska. Mu zina laku Yesu Kristu waku Nazareti, yendanga!”

⁷Ndipo wati wamkole janja lamarghe, wangumsoska: ndipo sosonukweni misoronthe yake ndi tusingininge tungukhomeskeka.

⁸Ndipo wakuzininika, wangusoka, ndi wendayendanga; ndipo wangusere pamoza nawo mu kasopi yo, wakwendayenda, ndi wakuzininika, ndi wakuthamika Chiuta.

⁹Ndipo khamu lose lamwonanga wakwendayenda ndi wakumthamika Chiuta,

¹⁰ndipo ŵangumteska kuti ndiyo wajariyanga kawezi pa Thora, khomu la kasopi; ndipo ŵanguzazika chirwita ndi chizizwisku paku cho chingumuŵiya.

¹¹Ndipo wachimeremete iyo Petro ndi Yohane, khamu lose lo lingumotoke pamoza kwaku wo mu khondi lakuzumbulika laku Solomoni ŵakurwita ukongwa.

¹²Kweni wachiwona, Petro wangunene khamu lo, “Mwaŵanthu mwaŵaYisraele muzizwiyanji paku chenichi, pamwenga mulereskiyanji paku ifwe, nge ndi nthazi yidu pamwenga usopi widu tayendeska mwenuyu?

¹³Chiuta iyo waku Abrahamu, ndi waku Yisaki, ndi waku Yakobe, Chiuta yo wa auskefwe, wamkankhuska Mwana wake Yesu, mweniyo imwe mungukombo ndi mungukana paku Pilato, wachidumuwa yuwa kuti wamfwatuwe.

¹⁴Kweni wakupaturika ndi murunji yo imwe mungumkana, ndipo mungupempha kuti munthu wambanda wapaskike waka kwaku imwe,

¹⁵kweni chirongozgi wa Umoyo mungubaya, mweniyo Chiuta wanguyuska ku ŵakufwa; waku chenicho te ŵakaboni ifwe.

¹⁶Ndipo ndi chivwanu chamu zina lake, zina lake lo lamkhomeska mweniyo mutumwona ndi kumziŵa: nadi, chivwanu cha mwaku iyo champaska umusuma[6] wenuwu uzirima pa maso paku wose.

¹⁷“Ndipo sono, mwa ŵabali, ndaziŵa kuti munguchita cho mu ujira, ulindimo ŵanguchitiya ŵaraŵara ŵinu nawo.

¹⁸Kweni vyenivyo Chiuta wangutauliya limu mu milomo ya ŵamchimi wose, kuti Kristu wake wakomwenge, wafiska iyo viyo.

¹⁹Viyo ng'anamukani, ndi nyongokani, alinga kuti visisitike vilakwa vinu, viyo kuti zingaza nyengo za chisisipuska kutuwa ku chisku cha Ambuya:

²⁰ndipo kuti wangutuma Kristu yo watemeke limu kwaku imwe,

²¹ndiyo Yesu: mweniyo kutenere kuchanya kumronde mpaka nyengo za chiwerezga chaku vyose, vyenivyo Chiuta wangurongorole ndi mlomo wo ŵamchimi ŵake wose wakupaturika kutuwa ku mwaka.

²²Mosese nadi wanguti, ‘Mbuya Chiuta wamyuskiya imwe mchimi mu ŵabali ŵinu ulaka ndine; mweniyo muvwiyenge mwaku vyose vyo wamkukukambiyani.

²³Ndipo kukaŵanga kuti mzimu wose wo ukarekanga kumuvwa Mchimi yo ukanangikiyanga limu mu khamu lo.’

²⁴Ndipo ŵamchimi wose kutuwa kwaku Samuele ndi ŵapavuli pake, wo wose ŵarongoro ŵanguloska nawo so mazuŵa yagha.

²⁵Imwe mwe ŵana ŵa ŵamchimi wo, ndi ŵa chipanganu cho wangupangana Chiuta ndi auskemwe, wachikamba ndi Abrahamu, ‘Mu mbeu yako ndimo zamtumbikikiya mbumba zose za panupasi.’

²⁶Chiuta wati wayuska Muŵanda wake, wangumtuma danga kwaku imwe kukutumbikani, mu kunyongo munthu yose waku imwe ku viheni vinu.”